फिलिप्पिगोळ 1

¹ मसीह यीशु उन दास पौलुस अदिक तीमुथियुस उन दी टु, सप्पा पवित्र लॉकुर हेसुर जो यीशु मसीह दा आगकु फिलिप्पी दा, अध्यक्षगोळ अदिक सेवकगोळ सांगुळ ईरतार.

² नामव आप्प परमेश्वर अदिक प्रभु यीशु मसीह अन दी टु नीमी अनुग्रह अदिक शांती सिकतेला ईरूल.

³ ना याग याग नीमी याद माळतीन, आग आग तान परमेश्वर उन धन्यवाद माळतीन;

⁴ अदिक याग यागलु नीम सप्पा अन साटी विनती माळतीन, रा हमेशा खुशी इन सांगुळ विनती माळतीन.

⁵ इदुरसाटी कि नीव पयला दिन टु हुडुकु ईंद ताका खुशखबरी बगरूसदुर दा नान सहभागी ईतीर.

⁶ नानी ई मात इन भरोसा आद कि याव नीम दा वळ्लीद क्याल्सा सुरू माळ्यान, आवा अदरी यीशु मसीह अन्द दिन ताका पुरा माळ्यान.

⁷ उचित आद कि ना नीम सप्पा मुंदुर साटी हिंग अच विचार माळाईन, यतिकी नीव नान मन दा बंदकु बसुसेगीर, अदिक ना शंकलीगोळ देल कैद दा अदिक खुशखबरी इन साटी उत्‍तर अदिक प्रमाण कोळदुर दा नीव सप्पा मुंदुर नान सांगुळ अनुग्रह दा सहभागी आगी.

⁸ इदुर दा परमेश्वर नान गवाह आन कि ना मसीह यीशु उन घाई प्यार माळकु नीम सप्पा मुंदुर्द लालसा माळतीन.

⁹ ना तरी भी ईद प्रार्थना माळतीन कि नीम प्यार ग्यान अदिक हर प्रकार इन विवेक सांगुळ अदिक यक्कुल वाळुस्त होगुल,

¹⁰ ईल ताका कि नीव वळ्लीद से वळ्लीद मातगोळ्द जाच माळी, अदिक मसीह अन्द दिन ताका खरा बन्सकु ईरी, अदिक ठोकर तिनबाळी;

¹¹ अदिक आ न्यायीपन इन काय देल जो यीशु मसीह अन्द द्वारा आगताव, यक्कुल आग्त होगी यदुर देल परमेश्वर उन महिमा अदिक स्तुति आग्त ईरूल.

¹² हे वार्टुरा, ना चाहासतीन कि नीव ईद जान्स कोमी कि नान मा जो घळुस्याद, अदुर देल खुशखबरी वाळुसतेला होग्याद.

¹³ ईल ताका कि कैसर उन राजभवन इन सप्पा पलटन अदिक मिग्द सप्पा लॉकुर मा ईद प्रगट आगेग्याद कि ना मसीह अन्द साटी शंकलीगोळ देल कैद दा आईन;

¹⁴ अदिक प्रभु दा जो वार्टुर आर, आंदुर दा टु यक्कुल मुंदुर नान शंकलीगोळ देल कैद आगदुर कारण, भरोसा माळकु परमेश्वर उन वचन बेधळक केळसोद मात्‍त यक्कुल हिम्मत माळतार.

¹⁵ थ्वाळासा रा जलन अदिक झगळा अन्द कारण मसीह अन्द प्रचार माळतार अदिक थ्वाळासा भला इच्छा देल.

¹⁶ हापाळ पुरा रा ईद जान्सकु कि ना खुशखबरी इन साटी उत्‍तर कोळली ठहरूस्कु आगीन, प्यार देल प्रचार माळतार.

¹⁷ अदिक हापाळ मुंदुर रा सरका ईला लेकीन मतलब देल मसीह अन्द कात्‍ता केळ्सतार, ईद विचार माळकु कि ना शंकलीगोळ देल कैद दा आईन नान साटी क्लेश पैदा माळुल.

¹⁸ रा येन आत? सिर्फ ईद कि हर प्रकार देल, या बहाना देल या सच्चाई देल, मसीह अन्द कात्‍ता केळ्सकु आगतद, अदिक ना ईदुर देल खुश आईन अदिक खुश भी ईराइन.

¹⁹ यतिकी ना जान्सतीन कि नीम विनती इन द्वारा, अदिक यीशु मसीह अन्द आत्मा अन्द दान इन द्वारा, इदुर्द प्रतिफल नान उद्धार आदीत.

²⁰ ना रा ईदा हापाळ लालसा अदिक आशा ईटतीन कि ना यातोदु मात दा लज्जित आगतीदील, लेकीन ह्यांग नान प्रबल हिम्मत इन कारण मसीह अन्द बळाई नान मय इन द्वारा हमेशा आग्त ईताद, हांग अच ईग भी आगुल, चाहे ना जित्‍ता ईराइन या सोतोगाईन.

²¹ यतिकी नान साटी जित्‍ता ईरोद मसीह हुन, अदिक सोतोगोद फायदा हुन.

²² लेकीन अगर मय दा जित्‍ता ईरोद अच नान क्याल्सा साटी फायदा मंद आद रा ना जान्सालीन कि यदुर्द चुनाव माळाईन.

²³ यतिकी ना येढ्ढु चीज इन न्याड्या अधर दा हिलगुसकु आईन; जीव रा चाहासतद कि होगकु मसीह अन्द हात्‍ती ईराइन, यतिकी ईद रा हापाळ वळ्लीद आद,

²⁴ लेकीन मय दा ईरोद नीम कारण मात्‍त यक्कुल जरूरी आद.

²⁵ इदुरसाटी कि नानी इदुर्द भरोसा आद इदुरसाटी ना जान्सतीन कि ना जित्‍ता ईराइन, उलटा नीम सप्पा मुंदुर सांगुळ ईराइन यदुर देल नीव विश्वास दा मजबूत आग्त होगी अदिक अदुर दा खुश ईरी;

²⁶ अदिक जो घमण्ड नीव नान बारा दा माळतीर, अद नांद मात्‍त नीम हात्‍ती बंदुर देल मसीह यीशु दा यक्कुल वाळुसेगुल.

²⁷ सिर्फ ईट माळी कि नीम चाल-चलन मसीह अन्द खुशखबरी इन लायक ईरूल कि चाहे रा ना बंदकु नीमी नोळाईन, चाहे रा बर भी तिदिल, नीम बारा दा नानी ईदा केळ सिकुल कि नीव ऊंद अच अंतरात्मा दा जित्‍ता आईर, अदिक ऊंद मन आगकु खुशखबरी इन विश्वास इन साटी मयनत माळ्त ईरतीर.

²⁸ अदिक यातोदारा मात दा विरोध माळावाळेर से अंज्क तुमालीर. ईद आंदुर साटी विनाश इन स्पष्ट चमत्कार हुन, लेकीन नीम साटी उद्धार इन अदिक ईद परमेश्वर उन दी टु आद.

²⁹ यतिकी मसीह अन्द कारण नीम मा ईद अनुग्रह आत कि ना सिर्फ आऊन साटी भरोसा कोळी लेकीन आऊन साटी दुख भी नेगी;

³⁰ अदिक नीमी हांग अच मयनत माळोद आद, ह्यांग नीव नानी माळतेला नोळीर, अदिक ईग भी केळतीर कि ना हांग अच माळतीन.