मीका 1

¹ यहोवा अन वचन, जो यहूदा अन राजा योताम, आहाज अदिक हिजकिय्याह अन दिनगोळ दा मोरेशेतवासी मीका अक पोहचुस्त, यदरी आव सामरी नगर अदिक यरूशलेम इन बारा दा अरतुन.

² हे राज्य राज्य अन सप्पा लॉकुरा, केळी! हे धरती नी आ सप्पा सांगुळ जो नीन दा आद, ध्यान कोळ! यहोवा नीन खिलाप प्रभु तान पवित्र मंदिर दा टु नीन मा गवाही कोळुल.

³ यतिकी नोळ, यहोवा तान पवित्र जागा दा टु व्हार्या होळेत्यान, अदिक आव ईळुकु धरती इन ऊचा स्थानगोळ मा नळदान.

⁴ पहाळीगोळ आऊन ल्यालमा गलुसेदाव, अदिक ऊतार भाग हिंग हरदाव, जसा मोम बेक्की इन आच देल, अदिक नीर जो घाट से ल्यालमा वाहुसतद.

⁵ ई सप्पा याकूब उन अपराध अदिक इस्त्राएल इन घराना अन कारण आगतद. याकूब उन अपराध येन आद? येन सामरिया आल्लच? अदिक यहूदा उन ऊचा स्थान येन हुव? येन यरूशलेम आल्लच?

⁶ परमेश्वर अंदुन, ई कारण ना सामरिया अक मैदान इन ढेर माळ बुळाईन, अदिक अंगुर इन बेली बनुसाईन; अदिक ना अऊर कल्लगोळी गड्डा दा ढकलुस बुळाईन, अदिक अदुर्द पायवा कित्त बुळाईन.

⁷ अऊर्द सप्पा माळदव मुर्तीगोळ तुकळा तुकळा माळकु आदव; अदिक जो येनारा आव कसुकु कमुस्यान अद बेक्की देल भस्म माळकु आदीत, अदिक आऊन सप्पा प्रतिमागोळी ना चुरचुर माळाईन; यतिकी वेश्‍यावृत्ति इन कमाई देला आव अऊर्द जमावळा माळ्यान, अदिक अद मात्त वेश्‍यावृत्ति घाई कमाई आगेदीत.

⁸ ई कारण ना याद्दा बडुकु हाय, हाय, माळाईन; ना उगळा काल अदिक बिन फळक्या देल ओयाळतोगाईन; ना कोल्यागोळ घाई चिल्लासाईन, अदिक शुतुरमुर्ग उन घाई वर्लाईन.

⁹ यतिकी आऊन घाव यागलु तुम सकाल; अदिक विपत्ति यहूदा मा भी बंदकु बित्त, उलटा आव नान लॉकुर मा बिदकु यरूशलेम इन फाटक ताका पोहचुसेग्याद.

¹⁰ गत नगर दा ईदुर्द चर्चा माळबाळी, अदिक वर्लबाळी; बेतआप्रा दा धूलि दा लोटपोट माळी.

¹¹ हे शापीर इन ईरावळ्त बिना कपळा अन आगकु निर्लज होटोग; सानान इन ईरावळ्त होळ सकालुर; बेतसेल इन ओर्लोद कारण अदुर्द शरण इन जागा नीन से ताकोमकु आदीत.

¹² यतिकी मारोत उन ईरावळ्त रा मदत इन हादी काईत काईत दुखी आगेग्यार, यतिकी यहोवा अन दी टु यरूशलेम इन फाटक ताका विपत्ति बंदकु बिदाद.

¹³ हे लाकीश इन ईरावळ्त तान रथगोळ दा वेग देल नळावाळा घ्वाळागोळ जोत्स; नीन देला सिय्योन इन प्रजा अन पाप इन सुरवात आत, यतिकी इस्त्राएल इन अपराध नींदा का कांळ्सकु बिद्दव.

¹⁴ ई कारण नी गत इन मोरेशेत इक दान कोटकु दुर माळबुट्या; अकजीब इन मान्ना से इस्त्राएल इन राजागोळ ध्वाका अच तिंदार.

¹⁵ हे मारेशा अन ईरावळती ना मात्त नीन मा ऊंद अधिकारी ठहरूसाईन, अदिक इस्त्राएल इन प्रतिष्ठित लॉकुरी अदुल्लाम इन गुफा दा बरोद बिद्दीत.

¹⁶ तान प्यारा चिकोर साटी दुख दा तान ताल्ला चुट्टी कोय, उलटा तान पुरा ताल्ला गिधाळ घाई टक्कल माळ कोम, यतिकी आंदुर बन्दी आगकु नीन हात्ती टु होटोग्यार.