मत्ती 28

¹ आराम इन दिन इन बाद्दा हप्ता अन्द पयला दिन व्हातुर आगतेला अच मरियम मगदलीनी अदिक दुसरा मरियम कब्र अक नोळली बंदुर.

² अदिक नोळी, ऊंद हापाळ अच भारी भूकम्प आत, यतिकी परमेश्वर उन ऊंद स्वर्गदूत स्वर्ग टु ईळुकु बंदुन अदिक आव कल्ल इक अलग ढकलुस्कु अदुर मा कुरतुन.

³ आऊन रूप बिजली इन घाई अदिक आऊन कपळा बरफ इन घाई बिळेव ईरव.

⁴ आऊन अंज्क देल पहरेदार नळ्गली कुरतुर, अदिक सोत्‍तुर घाई आगेदुर.

⁵ स्वर्गदूत आ येढ्ढ आर्तेर से अंदुर, “अंजबाळी ना जान्सतीन कि नीव यीशु उक जो क्रूस मा येर्सकु आगीदुन आऊक ढुंढ़सेतीर.

⁶ आव ईल हैलेच, तान वचन इन अनुसार जित्‍ता आग्यान. बरी, आ जागा अक नोळी यल प्रभु बिदकु ईरोन.

⁷ आऊन चेलागोळी इक तुरन्त होगकु हेळी कि आव सोत्‍तुर दा टु जित्‍ता आग्यान, अदिक नोळी, आव नीम से पयला गलील इक होदान. अल नीमी आऊन अव दर्शन सिक्‍केव अदिक नीव आऊक नोळ सकीर. नोळी, ना नीमी हेळ बुटीन.”

⁸ इदुर मा आंदुर अंज्क अदिक बळा खुशी इन सांगुळ तुरन्त कब्र टु वापस आगकु अदिक चेलागोळी इक ईद समाचार कोळोर साटी वोळली कुरतुर.

⁹ आग यीशु आंदरी सिकदुन. अदिक अंदुन, “सलाम.” आंदुर हात्‍ती बंदकु अदिक आऊन नव काल हुळकु प्रणाम माळदुर.

¹⁰ आग यीशु आ आर्तेरी अंदुन, “अंजबाळी; नांद वार्टुरी होगकु अनी कि गलील इक होगी, अल नानी नोळ्यार.”

¹¹ आंदुर होगतेला अच ईरोर कि पहरेदारगोळ दा टु थ्वाळासा पहरेदारगोळ बंदकु पुरा हाल प्रधान याजकगोळ से अनकु केळ्सदुर.

¹² आग आंदुर पुर्वजगोळ सांगुळ जमा आगकु सम्मति माळदुर अदिक सिपाहीगोळी हापाळ चाँदी नव सिक्‍कागोळ कोटकु अंदुर,

¹³ “ईद अनेतीर कि ईळ्लक इक याग नाव मिंगकु ईरेव, रा आऊन चेलागोळ बंदकु आऊक काळताना माळकु ओतुर.

¹⁴ अदिक अगर ईद मात न्यायाधीश उन किव ताका पहुचुसीत, रा नाव आऊक समझुस बुटेव अदिक नीमी जोखिम टु वाचुस कोंडेव.”

¹⁵ इदुरसाटी आंदुर पैस्या ताकोमकु ह्यांग आंदरी कल्सकु आगीत. हांग अच माळदुर. ईद मात यहूदीगोळ दा दुर दुर ताका फैलुसेत अदिक ईगासताका प्रचलित आद.

¹⁶ हन्नेळ चेलागोळ गलील इन आ पहाळ मा होदुर, यारी यारी यीशु हेळीदुन.

¹⁷ आंदरी यीशु नव दर्शन सिकदव अदिक आऊक प्रणाम माळदुर, पर यारीकारा यारीकारा शंका आत.

¹⁸ यीशु आंदुर हात्‍ती बंदकु अंदुन, “स्वर्ग अदिक पृथ्वी इन पुरा अधिकार नानी कोटकु आग्याद.

¹⁹ इदुरसाटी नीव होगी, सप्पा जातीगोळ लॉकुरी चेला माळी; अदिक आंदरी आप्प, पार अदिक पवित्र आत्मा अन्द हेसुर देल बपतिस्मा कोळी,

²⁰ अदिक जो आग्यागोळ ना नीमी कोट्टीन अदुर्द पालन ह्यांग माळतार अद कल्सी. अदिक नोळी, ना युग इन अन्त ताका सदा नीम सांगुळ आईन.”