मत्ती 1

¹ अब्राहम उन पार, दाऊद उन पार, यीशु मसीह अन्द वंशावली ई प्रकार देल आद.

² अब्राहम देल इसहाक पैदा आदुन, इसहाक देल याकूब, याकूब देल यहूदा अदिक आऊन वार्टुर पैदा आदुर.

³ यहूदा अदिक तामार देल फिरिस अदिक जोरह पैदा आदुर, फिरिस देल हिस्त्रोन, अदिक हिस्त्रोन देल एराम पैदा आदुन.

⁴ एराम देल अम्मीनादाब पैदा आदुन, अम्मीनादाब देल नहशोन, अदिक नहशोन देल सलमोन पैदा आदुन.

⁵ सलमोन अदिक राहाब देल बोअज पैदा आदुन, बोअज अदिक रूत देल ओबेद, अदिक ओबेद देल यिशै पैदा आदुन.

⁶ अदिक यिशै देल दाऊद राजा पैदा आदुन. अदिक दाऊद देल सुलैमान, आ आर्त इन व्हाट्या टु पैदा आदुन जो पयले उरिय्याह अन्द हिंग्स ईरोर.

⁷ सुलैमान देल रहबाम पैदा आदुन, रहबाम देल अबिय्याह, अदिक अबिय्याह देल आसाफ पैदा आदुन.

⁸ आसाफ देल यहोशाफात पैदा आदुन, यहोशाफात देल योराम, अदिक योराम देल उज्जियाह पैदा आदुन.

⁹ उज्जियाह देल योताम पैदा आदुन, योताम देल आहाज, अदिक आहाज देल हिजकिय्याह पैदा आदुन.

¹⁰ हिजकिय्याह देल मनश्शिह पैदा आदुन, मनश्शिह देल आमोन, अदिक आमोन देल योशिय्याह पैदा आदुन.

¹¹ अदिक बाक इस्त्राएल इन लॉकुरी बंदी माळकु बेबीलोन ओया होती योशिय्याह देल यकुन्याह, अदिक आऊन वार्टुर पैदा आदुर.

¹² बंदी आगकु बेबीलोन पोहचुसदुर बाद्दा यकुन्याह देल शालतिएल पैदा आदुन, अदिक शालतिएल देल जरूब्बाबिल पैदा आदुन.

¹³ जरूब्बाबिल देल अबीहूद पैदा आदुन, अबीहूद देल इल्याकीम, अदिक इल्याकीम देल अजोर पैदा आदुन.

¹⁴ अजोर देल सदोक पैदा आदुन, सदोक देल अखीम, अदिक अखीम देल इलीहूद पैदा आदुन,

¹⁵ इलीहूद देल इलियाजार पैदा आदुन, इलियाजार देल मत्‍तान, अदिक मत्‍तान देल याकूब पैदा आदुन.

¹⁶ याकूब देल यूसुफ पैदा आदुन, जो मरियम इनव गांड्ड ईरोन, अदिक मरियम देल यीशु जो मसीह कहलुस्तान, पैदा आदुन.

¹⁷ ईद प्रकार अब्राहम टु हुळकु दाऊद ताका चौदा पीढ़ी आदव, अदिक दाऊद टु बेबीलोन इक बंदी आगकु पोहचुस्कु आगासताका चौदा पीढ़ी, अदिक बंदी आगकु बेबीलोन इक पोहचुस्कु आगा समय टु मसीह ताका चौदा पीढ़ी आदव.

¹⁸ यीशु मसीह अन्द जनम इत्‍ता प्रकार देल आत, कि याग आऊन मोय मरियम इन सगाई यूसुफ उन सांगुळ आगेत, रा आंदुर्द मिलन आगोर से पयले अच आक पवित्र आत्मा दी टु व्हाट्या दी ईरोर.

¹⁹ इदुरसाटी आकिन गांड्ड यूसुफ जो न्यायी मंळसा ईरोन अदिक आकी बदनाम माळोद ईला चाहासोन, आकी चुपचाप बिट्ट बुळोद विचार माळदुन.

²⁰ याग आव ईव मातगोळ्द सोच दा का ईरोन रा प्रभु उन स्वर्गदूत आऊक कान्सा दा कांळ्सकु अनली कुरतुन, “हे यूसुफ! दाऊद उन पार, नी मरियम उक हिंग्स माळली अंजबाळ, यतिकी जो आकिन गर्भ दा आद, अद पवित्र आत्मा दी टु आद.

²¹ आक पार उक हाळदार अदिक नी आऊन हेसुर यीशु ईटेत, यतिकी आव तान लॉकुरी आंदुर पापगोळ देल बिळस्यान.”

²² ईद सब इदुरसाटी आत कि जो वचन प्रभु भविष्यवक्ता अन्द द्वारा अंदिदुन, अद पुरा आगुल:

²³ “ऊंद कुवारा पोर व्हाट्या दी ईत्‍तार अदिक ऊंद पार उक हाळदार, अदिक आऊन हेसुर इम्मानुएल ईटकु आदीत,” यदुर्द मतलब आद, “परमेश्वर नाम सांगुळ.”

²⁴ आग यूसुफ जप दा टु यदकु प्रभु अन्द स्वर्गदूत उन आग्या अन्द अनुसार मरियम उक हिंग्स माळकु मान्या तंदुन;

²⁵ अदिक यागासताका आक पार हाळदिदील आगासताका यूसुफ आकिन हात्‍ती होगीदिल: अदिक आव आ पार उन हेसुर यीशु ईटदुन.