लूका 1

¹ श्रीमान थियुफिलुस, हापाळ सा लॉकुर आ मातगोळी जो नाम न्याड्या दा घळुस्याव, इतिहास लिखसोर साटी कय हच्यार,

² ह्यांग कि आंदुर जो पयले टु ना ई मातगोळव नोळावाळेर अदिक खुशखबरी इन प्रचार माळावाळेर सेवक ईरोर, नाम ताका पोहचुसदुर.

³ इदुरसाटी, थियुफिलुस नानी भी ईद उचित मालूम आत कि आ सप्पा मातगोळ्द पुरा हाल सुरू टु वळ्लीसा-वळ्लीसा जाँच माळकु, आंदरी नीन साटी क्रम इन अनुसार लिख्साईन.

⁴ ना ईद इदुरसाटी लिख्सदीन ताकी नीमी पुरा हकिगत यकीन मालूम आगेगुल.

⁵ यहूदीगोळव राजा हेरोदेस उन समय अबिय्याह अन्द दल दा जकरयाह हेसुर ईनव ऊंद याजक ईरोन, अदिक आऊन हिंग्स हारून इन वंश इनोर ईरोर आकिन हेसुर इलीशिबा ईरोद.

⁶ आंदुर येढ्ढु मुंदुर परमेश्वर उन नजर दा न्यायी ईरोर, अदिक प्रभु उन सप्पा आग्यागोळ मा अदिक सप्पा विधीगोळ मा निर्दोष नळावाळेर ईरोर.

⁷ आंदुर्द यातोदु औलाद ईला ईरोद, यतिकी इलीशिबा वांझला ईरोर, अदिक आंदुर येढ्ढु मुंदुर बाट्ट हाळामुंड ईरोर.

⁸ याग जकरयाह तान दल इन पारी मा परमेश्वर उन मुंद याजक उन क्याल्सा माळोन,

⁹ रा याजकगोळ्द रीति इन अनुसार आऊन हेसुर मा चिट्ठी होळ्त कि प्रभु उन मंदिर दा होगकु धूप होताकुल.

¹⁰ धूप होताका समय लॉकुर्द सप्पा मंडली व्हार्या प्रार्थना माळोद.

¹¹ आ समय प्रभु उन ऊंद स्वर्गदूत धूप इन वेदी इन ऊम्मा कय दी नीदुरकु आऊन मुंद प्रगट आदुन.

¹² जकरयाह आऊक नोळकु घबरूस्दुन अदिक आऊन मा धोळ्द अंज्क तुम्मेत.

¹³ लेकीन स्वर्गदूत आऊन से अंदुन, “हे जकरयाह, अंजबाळ, यतिकी नीन प्रार्थना केळकु आगेग्याद; अदिक नीन हिंग्स इलीशिबा देल नीन साटी ऊंद पार पैदा आदान, अदिक नी आऊन हेसुर यूहन्ना ईटेत.

¹⁴ आऊन जनम इन कारण नीनी खुशी अदिक हर्ष आदीत: अदिक हापाळ लॉकुर आऊन जनम इन कारण खुश आदार,

¹⁵ यतिकी आव प्रभु उन नजर दा महान आदान; अदिक अंगुर इन रास्सा अदिक सारा यागलु कुडुतीदील; अदिक तान मोय इन व्हाट्टा दा टु अच पवित्र आत्मा देल परिपुर्ण आगेदान;

¹⁶ अदिक इस्त्राएलगोळ दा टु हापाळ लॉकुरी आंदुर प्रभु परमेश्वर उन दी वापस तंदान.

¹⁷ आव एलिय्याह अन्द घाई आत्मा अदिक सामर्थ्य दा आगकु आऊन मुंद मुंद नळदान कि आप्प दादागोळ्द मन चिकोर-चिनगेर दी हतकु ईरूल; अदिक आग्या ईला मान्सावाळेर इक न्यायीगोळ्द घाई आंदुर समझ दा तरूल; अदिक प्रभु उन साटी ऊंद योग्य प्रजा तयार माळुल.”

¹⁸ जकरयाह स्वर्गदूत से केळदुन, “ना ईद ह्यांग जानसाईन? यतिकी ना रा हाळाबाट आईन; अदिक नान हिंग्स भी हाळामुंड आगेग्यार.”

¹⁹ स्वर्गदूत आऊक उत्‍तर कोट्टुन, “ना जिब्राईल हुईन, जो परमेश्वर उन मुंद निदुरकु ईरतीन; अदिक नानी नीन से मातगोळी हेळली अदिक नीनी ईद खुशखबरी केळ्सली नानी कळुकु आग्याद.

²⁰ नोळ, या दिन ताका ई मातगोळ पुरा आगालव, आ दिन ताका नी मौन अवस्था दा ईत्या अदिक माताळ सकतीदिल, यतिकी नी नान मातगोळ्द जो तान समय मा पुरा आदव, ई नान वचनगोळ मा नी विश्वास माळीदिल.”

²¹ लॉकुर जकरयाह अन्द हादी कायतेला ईत्‍तुर अदिक आश्चर्य माळली कुरतुर कि आऊक मंदिर दा ईट समय येती हत.

²² याग आव व्हार्या बंदुन, रा आंदुर से माताळ सकिदील: अत: आंदुर अर्त कोंडुर कि आव मंदिर दा यातोद तरी दर्शन नोळ्यान; अदिक आव अदुर बारा दा आंदुर से संकेत माळतेला ईत्‍तुन, अदिक मुक्‍का आगकु ईतोदुन.

²³ याग आऊन मंदिर इन स्यावा अन्द दिन पुरा आदव, रा आव तान मान्नी होटोदुन.

²⁴ ई दिनगोळ्द बाद्दा आऊन हिंग्स इलीशिबा व्हाट्या दी ईत्‍तुर; अदिक आक ईद अनकु तान तान इक अईद तिंगुळ ताका होचकु ईटदुर,

²⁵ अदिक इलीशिबा खुद अच अनतोगोर, कि “ई दिनगोळ दा प्रभु नान मा कृपा नजर माळकु, मंळसागोळी नान अपमान इक दुर माळोर साटी इच प्रभु नान साटी हिंग माळदुन.”

²⁶ इलीशिबा अन्द गर्भ-अवस्था अन्द आर तिंगुळ दा परमेश्वर उन दी टु जिब्राईल स्वर्गदूत, गलील इन नासरत नगर दा,

²⁷ ऊंद कुवारा पोर इन हात्‍ती कळुकु आदुन यार्द सगाई यूसुफ हेसुर इन दाऊद उन घराना अन्द ऊंद मंळसा से आगीत: आ कुवारा पोर इन हेसुर मरियम ईरोद.

²⁸ स्वर्गदूत आकिन हात्‍ती बुळ्क बंदकु अंदुन, “नी धन्य आय, नीन मा परमेश्वर उन अनुग्रह आग्याद! प्रभु नीन सांगुळ आन!”

²⁹ मरियम आ स्वर्गदूत उन वचन देल हापाळ घबरूसेदुर, अदिक मन दा सोचली कुरतुर कि ईद याता प्रकार इन अभिवादन हुन?

³⁰ स्वर्गदूत आकिन से अंदुन, “हे मरियम, अंजबाळ, यतिकी परमेश्वर उन अनुग्रह नीन मा आग्याद.

³¹ नोळ, नी व्हाट्या दी ईत्या, अदिक नीनी ऊंद पार पैदा आदान; नी आऊन हेसुर यीशु ईटेत.

³² आव महान ईत्‍तान अदिक परमेश्वर उन पार जो सब से धोड्डेव आन अंदकु आदान; अदिक प्रभु परमेश्वर आऊन आप्प दाऊद उन सिंहासन आऊक कोट्टान,

³³ अदिक आव याकूब ऊंद घराना मा हमेशा राज माळ्यान; अदिक आऊन राज्य अन्द अन्त यागलु आगतीदील.”

³⁴ मरियम स्वर्गदूत से अंदुर, “ईद ह्यांग आदीत. ना रा यातोवारा भी मंळसा अन्द संपर्क दा हैलेच.”

³⁵ स्वर्गदूत आक इक उत्‍तर कोट्टुन, “पवित्र आत्मा दी टु नी व्हाट्या दी ईत्या, अदिक परमेश्वर उन सामर्थ्य नीन मा सावली माळीत; इदुरसाटी आ पवित्र जो पैदा आगावाळा आन, परमेश्वर उन पार अंदकु आदान.

³⁶ अदिक नोळ, नीन कुटुम्ब इनोर इलीशिबा अक भी बुळपन दा पार आगावाळा आन, ईद आकिन, यारी लॉकुर वांझला अनतोगोर आरवा तिंगुळ हुन.

³⁷ यतिकी परमेश्वर उन साटी येनु असम्भव हैलेच.”

³⁸ मरियम अंदुर, “नोळ, ना प्रभु उन दासी हुईन, नानी नीन वचन इन अनुसार अच आगुल.” आग स्वर्गदूत आकिन हात्‍ती टु होटोदुन.

³⁹ आ दिनगोळ दा मरियम यदकु तुरन्त अच पहाळी द्याश दा यहूदा अन्द ऊंद नगर इक होदुर,

⁴⁰ अदिक आव जकरयाह अन्द मान्या होगकु मरियम इलीशिबा अक नमस्कार माळदुर.

⁴¹ आग हिंग आत कि ह्यांग इलीशिबा मरियम इन नमस्कार केळदुर, हांग अच चिग्द आकिन व्हाट्या दा हारदुन, अदिक इलीशिबा पवित्र आत्मा देल परिपुर्ण आगेदुर.

⁴² अदिक इलीशिबा धोळ्द शब्द दा कारूकु अंदुर, “नी आर्तेर दा धन्य आय, अदिक नीन व्हाट्या अन्द चिग्द भी धन्य आद!

⁴³ ईद अनुग्रह नानी यल टु आत कि नान प्रभु उन मोय नान हात्‍ती बंदुर?

⁴⁴ ह्यांग नीन नमस्कार इन शब्द नान किव मा बित्‍त, हांग अच चिग्द नान व्हाट्या दा खुशी देल हारली हत.

⁴⁵ धन्य आर आक यार विश्वास माळदुर कि जो मातगोळ प्रभु उन दी टु आकिन से अंदकु आग्याव, अव पुरा आदव!”

⁴⁶ आग मरियम अंदुर, “नान जीवन प्रभु उन बळाई माळतद

⁴⁷ अदिक नान आत्मा नान उद्धार माळावाळा परमेश्वर देल खुश आद,

⁴⁸ यतिकी आव तान दासी मा नजर ईट्यान; इदुरसाटी नोळी, ईगी टु सप्पा युग-युग इन पीढ़ी नानी धन्य अंदीत,

⁴⁹ यतिकी आ शक्तिमान प्रभु नान साटी धोळ्द-धोळ्द क्याल्सा माळ्यान. आऊन हेसुर पवित्र आद,

⁵⁰ अदिक आऊन दया आंदुर मा, जो आऊन से अंजतार, पीढ़ी टु पीढ़ी ताका बन्सकु ईरतद.

⁵¹ आव तान भुजा अन्द ताकत तोर्सदुन, अदिक जो तान मन दा घमण्ड माळतोगोर, आंदरी तितर-बितर माळदुन.

⁵² आव बलवानगोळी आंदुर्द राज सिंहासनगोळ मा टु केळ्द बुट्टुन; अदिक नम्र लॉकुरी म्याकुच नेगदुन.

⁵³ आव हस्तकु लॉकुरी वळ्लीद वस्तुगोळ देल संतुष्ट माळदुन, अदिक धनवानगोळी खाली कय तेग्द बुट्टुन.

⁵⁴ आव तान सेवक इस्त्राएल उक सम्भाल्स कोंडुन कि तान आ दया अक याद माळुल,

⁵⁵ जो अब्राहम अदिक आऊन वंश मा हमेशा ईत्‍तीत, ह्यांग आव नाम आप्प-दादागोळ से अंदिदुन.”

⁵⁶ मरियम इलीशिबा अन्द सांगुळ लगभग मुर तिंगुळ ईतकु तान मान्नी वापस बंदुर.

⁵⁷ आग इलीशिबा अन्द चिग्द हाळोद समय पुरा आत, अदिक आक पार उक जनम कोट्टुर.

⁵⁸ आकिन मान्ना अन्द हात्‍तीवाळेर अदिक कुटुम्बीगोळ ईद केळकु कि प्रभु आकिन मा हापाळ दया माळ्यान, आकिन सांगुळ खुशी मनुस्दुर,

⁵⁹ अदिक हिंग आत कि आठवा दिशी आंदुर आ चिग्द ऊंद खतना माळली बंदुर अदिक आऊन हेसुर आऊन आप्प उन हेसुर मा जकरयाह ईटावाळेर ईरोर.

⁶⁰ इदुर मा आऊन मोय उत्‍तर कोट्टुर, “ईद ईला; उलटा आऊन हेसुर यूहन्ना ईटकु आगुल.”

⁶¹ आंदुर आकिन से अंदुर, “नीन कुटुम्ब दा यारदु हेसुर ईद हैलेच!”

⁶² आग आंदुर आऊन आप्प उक इशारा माळकु केळदुर कि नी आऊन हेसुर येन ईटोद चाहासत्या?

⁶³ आव लिखसोद पट्टी कारस्कु लिख्स बुट्टुन, “आऊन हेसुर यूहन्ना आद,” अदिक सप्पा लॉकुरी आश्चर्य आत.

⁶⁴ आग आ चिग्द उन बाय अदिक ल्यालग्या तुरन्त खुलसेत; अदिक आव माताळली अदिक परमेश्वर उन धन्यवाद माळली कुरतुन.

⁶⁵ आऊन आसपास इनोर सप्पा ईरावाळेर मा अंज्क तुम्मेत; अदिक आ सप्पा मातगोळ्द चर्चा पुरा यहूदी इन पहाळी प्रदेश दा फैलुसेत,

⁶⁶ अदिक सप्पा केळावाळेर तान-तान मन दा विचार माळकु अंदुर, “ई पार ह्यांग ईतीदान?” यतिकी प्रभु उन कय आऊन मा ईरोद.

⁶⁷ आऊन आप्प जकरयाह पवित्र आत्मा देल परिपुर्ण आगेदुन, अदिक आव परमेश्वर उन बातणी कोळली कुरतुन:

⁶⁸ “प्रभु इस्त्राएल ईनव परमेश्वर धन्य ईरूल, यतिकी आव तान लॉकुर मा नजर ईटदुन अदिक आंदुर्द छुटकारा माळदुन,

⁶⁹ अदिक तान सेवक दाऊद उन घराना दा नाम साटी ऊंद सामर्थ्यकारी उध्दारक कोटान.

⁷⁰ आव तान पवित्र भविष्यवक्तागोळ्द द्वारा जो दुनिया अन्द सुरूवात टु आगतेला बंदार, अंदिदुन.

⁷¹ मतलब नाम दुश्मनगोळ से अदिक नाम से नफरत ईटावाळेर्द कय देल नाम उद्धार माळदुन,

⁷² आव तान आप्प-दादागोळ से अंदिदुन कि आव दया माळ्यान कि तान पवित्र वाचा अन्द याद माळुल,

⁷³ अद किर्‍या आव नामव आप्प अब्राहम से तिंदीदुन,

⁷⁴ आव नामी ईद कोट्टान कि नाव तान दुश्मनगोळ्द कय दा टु बिटकु,

⁷⁵ आऊन मुंद पवित्रता अदिक न्यायीपन देल पुरा जीवन तीम निडर ईतकु आऊन स्यावा माळतेला ईत्‍तेव.

⁷⁶ अदिक नी हे पारा, परमेश्वर उन भविष्यवक्ता कहलुस्या, यतिकी नी प्रभु उन हादी तयार माळोर साटी आऊन मुंद-मुंद नळद्या,

⁷⁷ कि आऊन लॉकुरी उद्धार इन ग्यान कोट्टान, जो आंदुर्द पापगोळी माफ माळीत.

⁷⁸ ईद नाम परमेश्वर उन अदा धोळ्द करूणा देल आग्याद; यदुर कारण म्याकुच टु नाम मा व्हातुर इन उजुळ उदय आदीत,

⁷⁹ कि अंधकार अदिक मृत्यु ऊंद सावली दा कुरावाळेर इक प्रकाश कोळुल, अदिक नाम कालगोळी शांती इन हादी मा सरका नळसुल.”

⁸⁰ अदिक आ चिग्द धोळ्द अदिक आत्मा दा बलवन्त आगतेला ईत्‍तुन, अदिक इस्त्राएल मा प्रगट आगोद दिन ताका आळीगोळ दा ईत्‍तुन.