लैव्यव्यवस्था 1

¹ आग यहोवा मूसा अक कारूकु भेटवाळा तम्बु दा टु आऊन से अंदुन,

² इस्राएलिगोळ सांगुळ मातगोळ माळ अदिक आंदुर से ईद अन, याग नीम दा टु यावारा मंळसा यहोवा अन्‍द साटी बलिदान तरूल रा आव पालस्द पशु ईला रा म्यांडा मर्रगोळ दा टु उच तनकु येरसुल.

³ अगर आऊन चढ़ावा पालस्द पशु दा टु होमबली आगुल रा आव दोषरहित नर इक येरसुल. आव अदरी भेंटमाळोद तम्बू उन दरवाजा मा येरसुल कि अद खुद यहोवा अन्द मुंद ग्रहण लायक ठहरूसुल.

⁴ आव तान कय होमबली इन पशु उन ताल्ला मा ईटुल, अदिक अद आंदुर साटी प्रायश्चित माळोर साटी ग्रहण माळकु आदीत.

⁵ आग आव आ वासरू उक यहोवा अन्द मुंद बली येरसुल, अदिक हारून उन पार जो याजक आन आंदुर रकत इक हात्ती ओतकु आ वेदी इन नाकु दी सिपसुल जो भेंटमाळोद तम्बू उन दरवाजा मा आद.

⁶ आग आव आ होमबली इन पशु उन तोगुल तेगुकु आ पशु उन तुकळा-तुकळा माळ बुळुल.

⁷ आग हारून याजक उन पार वेदी मा बेक्की ईटुल, अदिक बेक्की मा हुळ्ली रचस्कु ईटुल.

⁸ अदिक हारून उन पार जो याजक आन अऊर ताल्ला अदिक न्याण सांगुळ पशु उन तुकळागोळी आ हुळ्ली मा जो वेदी इन बेक्की मा आद रचस्कु ईटुल,

⁹ अदिक आव अदुर्द कळ्लपच्चीगोळी अदिक कालगोळी नीर देल तोळुल. आग याजक ईव सप्पा अक होमबली माळकु वेदी मा होताकुल कि अद होमबली यहोवा अन साटी सुखदायक सुगन्धित बलिदान ठहरूसुल.

¹⁰ “अगर आव म्यांडागोळ या व्हातगोळी होमबली येरसुल रा तंदरूस्त नर उक येरसुल;

¹¹ अदिक आव अदरी वेदी इन उत्तरी दिशा दी यहोवा अन मुंद बली माळुल अदिक हारून उन पार जो याजक आन अदुर्द रकत इक वेदी इन नाकु दी सिपसुल.

¹² अदिक आव अदरी तुकळा-तुकळा माळुल, ताल्ला अदिक न्याण इक अलग माळुल, अदिक याजक ईव सप्पा चीज इक आ हुळ्ली मा रचकु ईटुल जो वेदी इन बेक्की मा ईत्तीत;

¹³ अदिक आव अदुर्द कळ्लपच्चीगोळी अदिक कालगोळी नीर देल तोळुल. अदिक याजक सप्पा चीज इक हात्ती वोतकु वेदी मा होताकुल कि अद होमबली आगुल अदिक यहोवा अन्द साटी सुखदायक सुगन्धवाळा बलिदान ठहरूसुल.”

¹⁴ “अगर आव यहोवा अन्द साटी पक्षीगोळ्द होमबली येरसुल, रा पंडुका या कबूतर इन पाड्डगोळ्द चढ़ावा येरसुल.”

¹⁵ याजक अदरी वेदी इन हात्ती वतकु अऊरव कुतक्या मुरकुळ्सकु ताल्ला अक धळ देल अलग माळुल, अदिक वेदी मा होताकुल; अदिक अदुर्द पुरा रकत आ वेदी इन बाजु मा केडुकु आगुल;

¹⁶ अदिक आव कुतक्या-थैली अदिक पिक्‍कागोळी तेगुकु वेदी इन पूर्व दी राख हाक्कोद जागा मा भीट बुळुल.

¹⁷ आग आव येढ्ढु पिक्‍कागोळी हुडुकु अदरी बीच दा टु हरूल, लेकीन अदरी अलग-अलग माळबाळुल. आग याजक अदरी वेदी मा आ हुळ्ली इन म्याकुच ईटकु जो बेक्की मा ईत्तीत होताकुल कि अद होमबली अदिक यहोवा अन्द साटी सुखदायक सुगन्धवाळा बलिदान ठहरूसुल.