योना 2

¹ योना मेन इन व्हाट्टा दा तान परमेश्वर यहोवा से प्रार्थना माळदुर.

² आव अंदुन: “हे यहोवा, ना तान संकट दा नीन इक कारदीन, अदिक नी नान इक उत्तर कोट्ट. ना अधोलोक इन खाई दा नीन दुहाई कोट्टीन, अदिक नी बिना संकोच नान पुकार केळ्द.

³ नी नानी ल्यालमा समुद्र अन गहराई दा हाक्क कोंडीद; ना धारागोळ बीच दा बिदकु ईरीन. नीन भळकुस्द लयरगोळ अदिक तरंगगोळ नान म्याकुच टु वाहुसेदव.

⁴ आग ना ईद सोचदीन: ना नीन मुंदु टु तेगुकु आगेगीन. ईग ना ह्यांग नीन पवित्र मंदिर इन दर्शन माळ सकाईन?

⁵ ना नीर देल ईल ताका घेर्सकु ईरीन कि नान जीव होळतोगोद; गयरा सागर नान नाकु दी ईरोद, अदिक नान ताल्ला दा काई गुंळ्सकु ईरोद.

⁶ ना पहाळगोळ्द जळी ताका पोहचुसेगीदीन. ना हमेशा साटी जमीन दा बन्द आगेगीदीन; तरी भी हे नान परमेश्वर यहोवा, नी नान जीव इक गड्डा दा टु नेगद्या.

⁷ याग ना बेहोस आगावाळा अच ईरीन, आग ना यहोवा अक याद माळदीन; अदिक नान प्रार्थना नीन हात्ती उलटा नीन पवित्र मंदिर दा पोहचुसेत.

⁸ जो लॉकुर ध्वाका अन बेकार वस्तुगोळ मा मन हचतार, आंदुर तान अनुग्रह माळावाळा परमेश्वर उक बिट बुळतार.

⁹ लेकीन ना धन्यवाद इन हाळ हाळकु नीनी बलिदान येर्साईन; जो मन्नत ना मानसीन, अदरी पुरा माळाईन. उद्धार यहोवा देल अच आगतद!”

¹⁰ आग यहोवा मेन इक आग्या कोट्टुन, अदिक मेन योना अक समुद्र किनारा मा व्हार्या तेग्त बुळ्त.