यूहन्ना 2

¹ तिसरा दिशी गलील इन काना नगर दा यारदारा मदा ईरोद, अदिक यीशु उन मोय भी अल ईरोर.

² यीशु अदिक आऊन चेलागोळ भी आ मदा दा आमंत्रित ईरोर.

³ याग अंगुर इन रास्सा खतम आगेत, रा यीशु उन मोय यीशु से अंदुर, “आंदुर हात्‍ती अंगुर इन रास्सा मिकिदिल.”

⁴ यीशु आकिन से अंदुन “हे मोयी, नानी नीन से येन क्याल्सा? ईगल्या नान समय बरली आद.”

⁵ आऊन मोय सेवकगोळ से अंदुर, “जो येनारा आव नीम से अंदान, अदा माळेतीर.”

⁶ अल यहूदीगोळ्द कय-काल तोळोद प्रथा अन्द अनुसार कल्लगोळ्द आर: माळका ईटकु ईरव, हर ऊंद माळका दा लगभग येढ्ढ-येढ्ढ, मुर-मुर मन तुमकु आगोद.

⁷ यीशु सेवकगोळ से अंदुन, “माळकागोळ दा नीर तुम बुळी.” आंदुर अवरी सीगासीग तुम बुटुर.

⁸ आग आव आंदुर से अंदुन, “ईग थ्वाळासा नीर तेगुकु सयपाक माळावाळा प्रधान उन हात्‍ती ओई.” अदिक आंदुर ओतुर.

⁹ याग सयपाक माळावाळा प्रधान अद नीर इक नेकदुन, जो अंगुर इन रास्सा बनसेगित अदिक आव ईला अरोन कि अद यल टु बंदाद लेकीन जो सेवकगोळ नीर तेगदिदुर आंदुर अरोर, रा सयपाक माळावाळा प्रधान मंळगार उक कारूकु आऊन से अंदुन,

¹⁰ “हर ऊंद मंळसा पयले वळ्लीद अंगुर इन रास्सा कोळतान, अदिक याग लॉकुर कुडुकु संतुष्ट आगेगतार, आग थ्वाळासा मध्यम प्रकार इन रास्सा कोळतान; लेकीन नी रा वळ्लीद अंगुर इन रास्सा ईगासताका मिक्सकु ईट्या.”

¹¹ यीशु गलील इन काना नगर दा तान ईद पयला चमत्कार तोर्सकु तान महिमा प्रगट माळदुन अदिक आऊन चेलागोळ आऊन मा विश्वास माळदुर.

¹² इदुर बाद्दा यीशु अदिक आऊन मोय अदिक आऊन वार्टुर अदिक आऊन चेलागोळ कफरनहूम नगर इक होदुर अदिक अल थ्वाळासा दिन ईत्‍तुर.

¹³ यहूदीगोळ्द फसह अन्द हाब्ब हात्‍ती ईरोद, अदिक यीशु यरूशलेम इक होदुन.

¹⁴ आव मंदिर दा वस्ता, म्यांडा अदिक कबूतर मारावाळेर अदिक व्हान्ना मारावाळेर लॉकुरी कुर्तकु नोळदुन.

¹⁵ आग आव जाळीगोळ्द क्वाळा माळकु, सप्पा म्यांडागोळ अदिक वस्तागोळी मंदिर टु तेग्द बुट्टुन, अदिक व्हान्ना मारावाळेर लॉकुर्द पैस्या भिटकु सळा माळ बुट्टुन अदिक पांळ्सीगोळी उलटुस बुट्टुन,

¹⁶ अदिक कबूतरमारावाळेर से अंदुन, “इवरी ईल टु राटनेरी ओई. नान आप्प उन मान्ना अक व्यापार इन मान्ना माळबाळी.”

¹⁷ आग आऊन चेलागोळी याद बत्‍त कि लिख्सकु शास्त्र आद, “नीन मान्ना अन्द धुन नानी तिंद बुट्टीत.”

¹⁸ इदुर मा यहूदीगोळ आऊन से अंदुर, “नी जो ईद माळत्या रा नामी यातोद चमत्कार तोर्सत्या?”

¹⁹ यीशु आंदरी उत्‍तर कोट्टुन, “ई मंदिर इक केळ्द बुळी, अदिक ना इदरी मुर दिन दा निदरूस बुळाईन.”

²⁰ यहूदीगोळ अंदुर, “ई मंदिर इक माळदुर दा छ्यालीस वर्ष हत्याव, अदिक येन नी ईदरी मुर दिन दा निदरूस बुट्या?”

²¹ लेकीन यीशु तान मय इन मंदिर इन बारा दा अंदिदुन.

²² इदुरसाटी याग आव सोत्‍तुर दा टु जित्‍ता आदुन रा आऊन चेलागोळी याद बत्‍त कि आव ईद अंदिदुन; अदिक आंदुर पवित्रशास्त्र अदिक आ वचन इन जो यीशु अंदिदुन, विश्वास माळदुर.

²³ याग यीशु यरूशलेम दा फसह अन्द समय हाब्ब दा ईरोन, रा हापाळ मुंदुर आ चमत्कारगोळी जो आव तोर्सतोगोन नोळकु आऊन हेसुर मा विश्वास माळदुर.

²⁴ लेकीन यीशु तान तान इक आंदुर भरोसा मा बिटीदिल, यतिकी आव सप्पा मुंदुर मनगोळी अरूतोगोन;

²⁵ अदिक आऊक जरवत ईला ईरोद कि मंळसा अन्द बारा दा यावारा गवाही कोळुल, यतिकी आव खुद अच अरोन कि मंळसा अन्द मन दा येन आद?