यूहन्ना 12

¹ यीशु फसह हाब्ब इन आर दिन पयले बैतनिय्याह दा बंदुन यल लाज़र ईरोन, यारी यीशु सोत्‍तुर दा टु जित्‍ता माळीदुन.

² अल आंदुर आऊन साठी भोजन तयार माळदुर; अदिक मार्था स्यावा माळोर, अदिक लाज़र आंदुर दा टु ऊंद ईरोन जो आऊन सांगुळ भोजन माळली कुरतीदुन.

³ आग मरियम जटामांसी इन आर्धा लीटर किमती शुद्ध अत्‍तर तनकु यीशु उन कालगोळ मा हाकदुर, अदिक तान चुट्टीगोळ देल आऊन काल सिटदुर; अदिक अत्‍तर इन वास देल सप्पा मान्ना सुगन्धित आगेत.

⁴ लेकीन आऊन चेलागोळ दा टु यहूदा इस्करियोती हेसुर ईनव ऊंद चेला जो आऊक हुळसुसदुर मा ईरोन, अनली कुरतुन,

⁵ “ईद अत्‍तर मुर सौ दीनार दा मारकु कंगालगोळी येती कोटकु आगीदील?”

⁶ आव ईद मात इदुरसाटी अंदिदील कि आऊक कंगालगोळ्द चिन्ता ईरोद लेकीन इदुरसाटी कि आव काळ्ल ईरोन, अदिक आऊन हात्‍ती आंदुर्द झ्वारा ईरतोगोद अदिक अदुर्दा जो येनारा भी हाक्‍कु आगतोगोद, आव तेगु कोम तोगोन.

⁷ यीशु अंदुन, “आऊक ईरगोळी. आऊक ईद नांद नळसा दिशी इन साठी ईटगोळी.

⁸ यतिकी कंगाल रा नीम सांगुळ सदा ईरतार, लेकीन ना नीम सांगुळ सदा ईरतीदील.”

⁹ याग यहूदीगोळ्द धोळ्द भीळ जान्सेत कि आव अल आन, रा आंदुर ना सिर्फ यीशु उन कारण बंदुर लेकीन इदुरसाटी भी कि लाज़र उक नोळुल, यारी आव सोत्‍तुर दा टु जित्‍ता माळदुन.

¹⁰ आग प्रधान याजकगोळ लाज़र उक भी कोंद बुळोद साजीश रचुसदुर.

¹¹ यतिकी आऊन कारण हापाळ सा यहूदी होटोदुर अदिक यीशु मा विश्वास माळदुर.

¹² दुसरा दिशी हापाळ सा लॉकुर जो हाब्ब दा बंदीदुर ईद केळदुर कि यीशु यरूशलेम दा बरेत्यान.

¹³ इदुरसाटी आंदुर खजुर इन डगालगोळी हुळदुर अदिक आऊन से भेंट माळोर साठी होट्टुर, अदिक कारूली कुरतुर, “होशाना ! धन्य इस्त्राएल ईनव राजा, जो प्रभु उन हेसुर देल बरतान.”

¹⁴ याग यीशु उक गधा अन्द पाड्डा सिक्त; रा आव अदुर मा कुरतुन, ह्यांग शास्त्र दा लिख्सकु आद,

¹⁵ “हे सिय्योन इन पोरी, अंजबाळ; नोळ, नीन राजा गधा अन्द पाड्डा मा येरकु नीन हात्‍ती बरेत्यान.”

¹⁶ आऊन चेलागोळ ई मातगोळी पयले सम्स सकिदील, लेकीन याग यीशु उन महिमा प्रगट आत रा आंदरी याद बत्‍त कि ई मातगोळ आऊन बारा दा लिख्सकु ईरोव अदिक लॉकुर आऊन से ईदा प्रकार इन व्यवहार माळीदुर.

¹⁷ आग भीळ इन आ लॉकुर गवाही कोट्टुर, जो आ समय आऊन सांगुळ ईरोर याग आव लाज़र उक कब्र दा टु कारूकु सोत्‍तुर दा टु जित्‍ता माळदुन.

¹⁸ ईदा कारण लॉकुर आऊन से मुलाकात माळली बंदीदुर यतिकी आंदुर केळीदुर कि आव ईद आश्चर्यकर्म तोरस्यान.

¹⁹ आग फरीसीगोळ आपस दा अंदुर, “सोची रा सही कि नीम से येनु बनसाल. नोळी, दुनिया आऊन हिंद आगेत्याद.”

²⁰ जो लॉकुर आ हाब्ब दा आराधना माळली बंदीदुर आंदुर दा टु येनारा गैरयहूदी ईरोर.

²¹ आंदुर गलील इन बैतसैदा नोर ईरावाळेर फिलिप्पुस उन हात्‍ती बंदकु आऊन से विनती माळदुन, “श्रीमान, नाव यीशु से मुलाकात माळोद चाहासतेव.”

²² फिलिप्पुस बंदकु अन्द्रियास से अंदुन, आग अन्द्रियास अदिक फिलिप्पुस होगकु यीशु से अंदुन.

²³ ईदुर मा यीशु आंदुर से अंदुन, “आ समय होट बंदाद कि मंळसा अन पार उन महिमा आगुल.

²⁴ ना नीम से खरा खरा अनतीन कि यागासताका गोदी इन बींजा जमीन मा बिदकु सोतोगाल, अद आबना ईरतद; लेकीन याग सोतोगतद, रा हापाळ फसल तरतद.

²⁵ जो तान जीव इक प्रिय जान्सतान, आव अदरी खोऊस बुळतान; अदिक जो ई दुनिया दा तान जीव इक अप्रिय जान्सतान, आव अनन्त जीवन इन साठी अदुर्द रक्षा माळ्यान.

²⁶ अगर यावारा नान स्यावा माळ्यान, रा नान हिंद आगेगुल; अदिक यल ना आईन, अल नान सेवक भी ईत्‍तान. अगर यावारा नान स्यावा माळ्यान, रा नान आप्प आऊन आदर माळ्यान.

²⁷ “ईग नान जीव व्याकुल आद. इदुरसाटी ईग ना येन अनाईन, ‘हे आप्पा, नानी ई घळी देल ऊळ्स?’ ईला, यतिकी ना ईदा कारण ई घळी इक पोहचुसीन.

²⁸ हे आप्पा, तान हेसुर इन महिमा माळ.” “आग ईद आकाशवाणी आत, ना आऊंद महिमा माळीन, अदिक मात्‍त माळाईन.”

²⁹ आग जो लॉकुर निदुरकु केळोर आंदुर अंदुर कि बादल गरजुस्त. दुसरागोळ अंदुर, येनारा स्वर्गदूत आऊन से माताळदुन.

³⁰ ईदुर मा यीशु अंदुन, “ईद आवाज नान साटी ईला, लेकीन नीम साटी बंदाद.

³¹ ईग ई दुनिया अन न्याय आगतद, ईग ई दुनिया अन सरदार तेगुकु आदान;

³² अदिक ना अगर पृथ्वी मा टु म्याकुच येर्सकु आगाईन, रा सप्पा मुंदुरी तान हात्‍ती जेडाईन.”

³³ हिंग अंदकु आव ईद प्रगट माळ बुट्टुन कि आव ह्यांग मृत्यु देल सोत्‍तान.

³⁴ इदुर मा लॉकुर आऊन से अंदुर, “नाव व्यवस्था अन्द ईद मात केळेव कि मसीह हमेशा ईत्‍तान, बाक नी येती अनत्या कि मंळसा अन्द पार उक म्याकुच येरसोद जरूरी आद? ईव मंळसा अन पार याव हुन?”

³⁵ यीशु आंदुर से अंदुन, “ज्योति ईग थ्वाळासा देर ताका नीम बीच दा आद. यागासताका ज्योति नीम सांगुळ आद आगासताका नळुतेला ईरी, हिंग आगबाळुल कि अंधकार नीमी बंदकु घेर्सुल; जो अंधकार दा नळुतान आव जानसालुन कि यात्‍त होगतान.

³⁶ यागासताका ज्योति नीम सांगुळ आद, ज्योति मा विश्वास माळी ताकी नीव ज्योति अन औलाद आगी.” यहूदीगोळ अविश्वास दा बन्सकु ईरेतीर ईव मातगोळी अंदकु यीशु ओळेदुन अदिक आंदुर से होचकु ईत्‍तुन

³⁷ आव आंदुर मुंद ईस चमत्कार तोर्सदुन, तरी आंदुर आऊन मा विश्वास माळीदिल;

³⁸ ताकी यशायाह भविष्यवक्ता अन्द वचन पुरा आगुल जो आव अंदुन: “हे प्रभु, नाम बातणी इन याव विश्वास माळ्यान? अदिक प्रभु अन्द ताकत यार मा प्रगट आग्याद?”

³⁹ ई कारण आंदुर विश्वास माळ सकिदील, यतिकी यशायाह ईद भी अंदान:

⁴⁰ “आव आंदुर कण्णगोळी कुढ्ढ, अदिक आंदुर मन कठोर माळ बुटुन; येल्यारा हिंग आगबाळुल कि आंदुर कण्णगोळ देल नोळुल, अदिक मन देल समसुल, अदिक तिर्गुल, अदिक ना आंदरी चंगा माळाईन.”

⁴¹ यशायाह ई मातगोळी इदुरसाटी अंदुन कि आव आऊन महिमा नोळदुन, अदिक आव आऊन बारा दा मातगोळी हेळदुन.

⁴² तरी अधिकारीगोळ दा टु हापाळ लॉकुर आऊन मा विश्वास माळदुर, लेकीन फरीसीगोळ कारण प्रगट दा ईला मानसोर, येल्यारा हिंग आगबाळुल कि आंदुर यहूदी लॉकुर्द सभागृह दा टु तेगुकु आदार:

⁴³ यतिकी मंळसागोळ दी टु प्रशंसा आंदरी परमेश्वर उन दी टु प्रशंसा अन्द अपेक्षा यक्कुल प्रिय हततोगोद.

⁴⁴ यीशु कारूकु अंदुन, “जो नान मा विश्वास माळतान, आव नान मा ईला उलटा नान कळावाळा मा विश्वास माळतान.

⁴⁵ अदिक जो नानी नोळतान, आव नान कळावाळा अक नोळतान.

⁴⁶ ना दुनिया दा ज्योति आगकु बंदीन, ताकी जो यावारा नान मा विश्वास माळुल आव अंधकार दा ईरबाळुल.

⁴⁷ अगर यावारा नान मातगोळी केळकु मान्सालुन, रा ना आऊक दोषी ठहरूसालीन; यतिकी ना दुनिया अक दोषी ठहरूसोर साटी ईला, लेकीन दुनिया अन्द उद्धार माळोर साटी बंदीन.

⁴⁸ जो नानी तुच्छ जानस्तान अदिक नान मातगोळी ग्रहण माळालुन आऊक दोषी ठहरूसावाळा रा ऊंद आन: मतलब जो वचन ना अंदीन, अदा हिंदळोव दिन दा आऊक दोषी ठहरूसीत.

⁴⁹ यतिकी ना तान दी टु मातगोळी माळीदिल; लेकीन आप्प याव नानी कळ्यान आवा नानी आग्या कोटान कि येन येन अनाईन अदिक येन येन माताळाईन?

⁵⁰ अदिक ना जान्सतीन कि आऊन आग्या अनन्त जीवन आद. इदुरसाटी ना जो येनारा माताळतीन, अद ह्यांग आप्प नान से अंदान हांगा माताळतीन.”