याकूब 3

¹ हे नान वार्टुरा अदिक आकतींगेरा, नीम दा टु हापाळ सा लॉकुर शिक्षा कोळावाळेर बन्सबाळुल, यतिकी जान्सतीर कि नाव शिक्षा कोळावार्ळेद यक्कुल गंभीरता देल न्याय माळकु आदीत.

² इदुरसाटी कि नाव सप्पा मुंदुर हापाळ घन चुकसेगतेव; लेकीन अगर यावारा माताळदुर दा यातोदारा भी गलती माळतीदील रा आव ऊंद सिद्ध मंळसा आन अदिक सप्पा मय मा भी नियंत्रण ईट सकतान.

³ याग नाव तान आग्या मानसुसोर साटी घ्वाळा अन्द बाय दा लगाम हचतेव, रा नाव अदरी बाक यल चाहे अल तिर्गुस सकतेव.

⁴ जहाज भी, हिंग धोड्डेव ईरताव अदिक प्रचंड हवा देल नळ्सकु आगताव, तरी भी ऊंद स्यांळ्दतुसा सा पतवार इन द्वारा माँझी इन इच्छा अन्द अनुसार तिर्गुसकु आगताव.

⁵ हांग अच ल्यालग्या भी ऊंद स्यांळ्दतुसा सा हिस्सा आद अदिक अद धोळ्द-धोळ्द डींग होडुतद. जरासा सोची, थ्वाळासा बेक्‍की देल याट धोळ्द आळी दा बेक्‍की हत्‍तेगतद.

⁶ ल्यालग्या भी ऊंद बेक्‍की हुन; ल्यालग्या नाम मय इन हिस्सा दा अन्याय इन दुनिया हुन, अदिक सप्पा मय मा कलंक हचतद, अदिक जीवन-गति मा बेक्‍की हच बुळतद, अदिक नरक कुण्ड इन बेक्‍की देल होत्‍त ईरतद.

⁷ यतिकी सप्पा प्रकार इन आळी, पशु, पक्षी, अदिक रेंगसावाळा जन्तु, अदिक नीर इन जीव जन्तु रा मंळसा जाती इन वश दा आग सकताव अदिक आगेग्याव भी,

⁸ लेकीन ल्यालग्या अक मंळसागोळ दा टु याऊ वश दा माळ सकालुन; अद ऊंद हिंग बला आद जो यागलु अच रूकसाल, अद जीव नाशक जयर देल तुमकु आद.

⁹ इदुर देल अच नाव प्रभु अदिक आप्प उन स्तुती माळतेव, अदिक इदुर देल अच मंळसागोळी जो परमेश्वर उन स्वरूप दा पैदा आग्यार शराप कोळतेव.

¹⁰ ऊंद अच बाय देल धन्यवाद अदिक शराप येढ्ढु होळताव. हे नान वार्टुरा अदिक आकतींगेरा, हिंग ईला आग पायजे.

¹¹ येन नीर इन सोता अन्द ऊंद अच बाय देल सय अदिक डवला नीर येढ्ढु होळताव?

¹² हे नान वार्टुरा, येन अंजीर इन मार्र मा जैतून, या अंगुर इन केई मा अंजीर हत सकताव? हांग अच डवला नीर इन सोता टु सय नीर होळ सकाल.

¹³ नीम दा बुद्धिमान अदिक समझदार याव आन? जो हिंग आन आव तान क्याल्सागोळी वळ्लीद चाल चलन देल आ नम्रता सहित प्रगट माळुल जो ग्यान देल पैदा आगतद.

¹⁴ लेकीन नीव तान-तान मन दा जलन, कळवाहट अदिक स्वार्थीपन ईटतीर, रा बुद्धी मा घमण्ड माळकु सच्चाई इन विरोध दा पाप माळबाळी.

¹⁵ ईद ग्यान अद आल्लच जो स्वर्ग टु ईळुतद, उलटा सांसारिक, अदिक शारीरिक, अदिक शैतानी आद.

¹⁶ यतिकी यल जलन अदिक स्वार्थीपन ईरतद, अल अव्यवस्थापन अदिक सप्पा प्रकार इन बेकार मातगोळ आगताव.

¹⁷ लेकीन जो ग्यान स्वर्ग टु बरतद अद पयले रा पवित्र ईरतद बाक मिलनसार, मुलायम अदिक शांतीमय अदिक दया अदिक वळ्लीद काय देल लटालोम अदिक पक्षपात अदिक कपट रहित ईरतद.

¹⁸ शांती प्रस्थापित माळावाळेर लॉकुरी अच न्यायी जीवन इन काय प्राप्त आदीत अगर अदरी शांतीपूर्ण वातावरण दा बोऊस्कु आग्याद.