इब्रानिगोळ 8

¹ ईग जो मातगोळ नाव अनतेव आंदुर दा टु अदुर्दा सब से धोळ्द मात ईद आद कि नाम ईत्‍ता महायाजक आन, जो स्वर्ग मा महा महिमा अन्द सिंहासन इन ऊमा कय दी होगकु कुरतान,

² अदिक पवित्र जागा दा मतलब खरा तम्बू दा यदरी परमेश्वर स्थापित माळ्यान ना कि मंळसा, आ जागा दा आव महायाजक क्याल्सा माळतान.

³ यतिकी हर ऊंद महायाजक भेंट अदिक बलिदान येरसोर साटी ठहरूस्कु आगतान, ईद कारण जरूरी आद कि ई याजक उन हात्‍ती भी येनारा येर्सली ईरूल.

⁴ अगर आव पृथ्वी मा ईरायदुन रा यागलु याजक ईला आगायदुन, यतिकी अल पयले टु अच हिंग याजक आर जो यहूदी व्यवस्था अन्द अनुसार भेंट येर्सतार.

⁵ जो याजकपन इन क्याल्सा आंदुर माळतार, अद स्वर्ग दा जो आद अदुर्द ऊंद सावली अदिक प्रतीकृती आद. ईद हांगा प्रकार आद याग मूसा पवित्र तम्बू उन निर्माण माळावाळा अच ईरोन आग परमेश्वर आऊन से अंदिदुन, “ध्यान दा ईरूल कि नी हर चीज बराबर अदा प्रतिरूप इन अनुसार माळ जो नीनी पहाळी मा तोर्सकु आगीत.”

⁶ लेकीन आ याजकगोळ से वाळुसकु स्यावा यीशु उक सिक्त यतिकी आव मात्त वळ्लीद-वळ्लीद वाचा अन मध्यस्थ ठहरूसदुन, जो मात्त वळ्लीद प्रतिग्यागोळ आसरा देल कटकु आग्याद.

⁷ यतिकी अगर अद पयला वाचा निर्दोष ईराईत, रा दुसरा वाचा साटी येनु जरवत ईला ईराईत.

⁸ लेकीन परमेश्वर उक आ लॉकुर दा दोष सिक्त अदिक आव अनतान, “प्रभु अनतान, नोळी, अव दिन बरताव कि ना इस्त्राएल इन लॉकुर सांगुळ, अदिक यहूदा अन्द लॉकुर सांगुळ व्हाशोद वाचा कटाईन.

⁹ ईद आ वाचा अन घाई ईरतीदील, जो ना आंदुर आप्प-दादागोळ सांगुळ आ समय कटकु आगीत, याग ना आंदुर्द कय हुळकु आंदरी मिस्त्र द्याश टु तेगुकु तंदीन; यतिकी आंदुर नान वाचा मा विश्वासयोग्य ईतीदील यदरी ना आंदुर सांगुळ कटीदिन, अदिक इदुरसाटी ना आंदुर मा ध्यान हचीदिल.

¹⁰ बाक प्रभु अनतान, कि जो वाचा ना आ दिनगोळ बाद्दा इस्त्राएल इन घराना अन सांगुळ कटाईन, अद ईद हुन कि ना तान व्यवस्था अक आंदुर मनगोळ दा हाकाईन, अदिक अदरी आंदुर दिलगोळ मा लिख्साईन, अदिक ना आंदुरव परमेश्वर ठहरूसाईन अदिक आंदुर नान लॉकुर ठहरूस्यार.

¹¹ अदिक यावारा भी तान संगीगोळी अदिक मान्ना हात्‍तीवाळेर वार्टुर इक ईद शिक्षा कोळतीदील, कि नी प्रभु उक अरू, यतिकी स्याण हाती टु धोड्डेर ताका सप्पा नानी अर्त कोंडार.

¹² ना आंदुर पापगोळी माफ माळाईन अदिक यागलु आंदुर पाप याद ईटतिदिल.”

¹³ ई वाचा अक व्हाशोद अंदकु आव पयला वाचा अक हाळोद माळ बुट्टुन अदिक जो हाळोद अदिक जीर्ण आगेगतद अद रा बाक राटनेरी गायब आगेदीत.