इब्रानिगोळ 13

¹ आबुर दाबुर दा विश्वासी वार्टुर्द प्यार बन्सकु ईरूल.

² अनजाना लॉकुर्द तान मान्या सत्कार माळोद मारूबाळी, यतिकी हिंग माळतेला अच थ्वाळासा लॉकुर अनजाना दा स्वर्गदूतगोळ्द स्वागत माळदुर.

³ कैदीगोळ्द इत्‍ता सुधी ताकोमी, कि मान्सी आंदुर सांगुळ नीव भी कैद आईर; अदिक यार सांगुळ बुरा बर्ताव माळकु आगतद, आंदुर्द ईत्‍ता प्रकार सुधी ताकोमी, मान्सी नीव भी पिळीत आगेतीर.

⁴ मदा सब दा आदर इन मात सम्सकु आगुल, अदिक गांड-हिंग्स आबुर दाबुर सांगुळ विश्वासयोग्य ईरूल, यतिकी परमेश्वर अनैतिक अदिक व्यभिचारीगोळ्द न्याय माळ्यान.

⁵ नीम स्वभाव धन से प्यार माळोद ईरबाळुल, अदिक जो नीम हात्‍ती आद, अदुर दा संतुष्ट ईरी यतिकी परमेश्वर अंदान ना नीनी यागलु बिळतीदील, अदिक यागलु मारूतीदिल.

⁶ इदुरसाटी नाव बेधळक आगकु अनतेव, कि प्रभु, नान सहायक आन; ना अंजालीन; मंळसा नान येन माळ सकतान.

⁷ जो नीमोर अगुवागोळ ईरोर, अदिक यार नीमी परमेश्वर उन वचन केळस्यार, आंदरी याद ईटी; अदिक ध्यान देल आंदुर्द चाल चलन इन अन्त नोळकु आंदुर्द विश्वास इन अनुकरण माळी.

⁸ यीशु मसीह नीन अदिक ईंद अदिक युगानुयुग ऊंदा घाई आन.

⁹ हर प्रकार इन अपरिचित शिक्षागोळ देल भरमुसकु आगबाळी. नाम मन इन साटी ईद वळ्लीद आद कि आंदुर अनुग्रह अन द्वारा मजबूत बनसुल ना कि तिनोद कुडोद संबंध दा नियमगोळी मान्सदुर देल, यदुर देल आंदुर यागलु भला आगीदील यार अवरी मान्सदुर.

¹⁰ नाम्द ऊंद हिंग वेदी आद यदुर मा टु तिनोद अधिकार आ याजकगोळी हैलेच, जो तम्बू दा स्यावा माळतार.

¹¹ यतिकी याता पशुगोळ रक्ता महायाजक पाप-बली इन साटी महापवित्र जागा दा ओयतान, अदिक आ जनावरगोळ शरीर आ तम्बूगोळ्द छावनी इन व्हार्या होताक्कु आगताव.

¹² ईदा कारण, यीशु भी नगर इन व्हार्या सोत्‍तुन ताकी लॉकुर पापगोळ देल आऊन रक्ता अन द्वारा शुद्ध आग सकुल.

¹³ रा बाक बरी, आऊन हात्‍ती छावनी इन व्हार्या होगाता, अदिक आऊन अपमान दा सहभागी आगाता.

¹⁴ यतिकी ईल पृथ्वी मा नाम येनु स्थाई नगर हैलेच, बल्‍की नाव ऊंद बरावाळा नगर इन हादी कायेतेव.

¹⁵ नळी नाव यीशु उन द्वारा परमेश्वर उक स्तुतिरूपी बलिदान अर्पण माळाता जो आ टुटगोळ्द काय हुन यार आऊन हेसुर इक अरतार.

¹⁶ भलाई माळोद अदिक आबुर दाबुर सहायता माळोद मारूबाळी, यतिकी परमेश्वर हिंगा बलिदानगोळ देल खुश आगतान.

¹⁷ तान अगुवागोळ्द आग्या मान्सी अदिक आंदुर आदेशगोळ मा नळी. आंदुर नीम मा बिना आराम माळ्द हिंग सावधानी ईटतार ह्यांग मान्सी आंदरी तान क्याल्सागोळ्द लेखा जोखा परमेश्वर उक कोळोद आद; अगर नीव आंदुर आग्या मानसीर रा आनन्द इन सांगुळ तान क्याल्सा माळ्यार, अगर मान्सतीदील रा आंदुर दुख इन सांगुळ तान क्याल्सा माळ्यार अदिक अद नीम साटी मदतगार साबित आगतीदील.

¹⁸ नाम साटी प्रार्थना माळतेला ईरी, यतिकी नामी भरोसा आद कि नाम विवेक शुद्ध आद: अदिक नाव सप्पा मातगोळ दा वळ्लीद चाल नळोद चाहसतेव.

¹⁹ ना नीम से आग्रह माळतीन कि नीव प्रार्थना माळतोगी ताकी राटनेरी ना नीम हाती बर सकाईन.

²⁰ याव म्यांडागोळ घाई आ महान चरवाहा नाम प्रभु यीशु उन रक्ता अन द्वारा आ सनातन वाचा मा मोहर हचकु सोत्‍तुर दा टु जित्‍ता माळदुन आव शांती इन दाता परमेश्वर,

²¹ नीमी सप्पा वळ्लीद साधनगोळ देल संपन्न माळुल, यदुर देल नीव आऊन इच्छा पुरा माळ सकीर, अदिक यीशु मसीह अन द्वारा आव नाम बुळ्क आ सप्पा मातगोळी सक्रिय माळुल जो आऊक वळ्लीद हततद. मसीह अन महिमा युगानुयुग आगतेला ईरूल. आमीन.

²² हे वार्टुरा अदिक आकतींगेरा, ना नीम से आग्रह माळतीन कि ईद प्रोत्साहन इन संदेश इक धीरज इन सांगुळ केळी, यतिकी ई चिट्टी जो ना नीमी लिख्सीन यक्कुल धोळ्द हैलेच.

²³ ना चाहासतीन कि नीमी ईद पता नळुल नाम वार्ट तीमुथियुस कैद दा टु बिटकु आग्यान. अदिक अगर आव राटनेरी बंदुन रा ना आऊन सांगुळ नीम से मुलाकात माळली बराईन.

²⁴ तान सप्पा अगुवागोळी अदिक सप्पा परमेश्वर उन लॉकुरी नमस्कार अनेतीर. इटलीवाळेर विश्वासी लॉकुर नीमी नमस्कार अनतार.

²⁵ नीम सप्पा मुंदुर मा परमेश्वर उन अनुग्रह आगतेला ईरूल. आमीन.