उत्पत्ति 6

¹ बाक याग मंळसा धरती मा हापाळ वाळुसली कुरतुर, अदिक आंदुर पोरगोळ पैदा आदुर,

² आग परमेश्वर उन पारगोळ मंळसा अन पोरगोळी नोळदुर, कि आंदुर सुंदर आर, अदिक यारी चाहासदुर आंदुर से मदा माळ कोंडुर.

³ आग यहोवा अंदुन, “नान आत्मा मंळसागोळ सांगुळ हमेशा साटी लळाई माळतीदील, यतिकी मंळसा भी शरीर अच हुन; आंदुर ऊमर ऊंद सौ ईप्‍पत वर्ष इन ईत्‍तीत.”

⁴ आ दिन दा पृथ्‍वी मा दानव ईरतोगोर; अदिक ईदुर बाद्‍दा याग परमेश्वर उन पार मंळसा अन पोरगोळ हात्‍ती होदुर आग आंदुर द्वारा जो पार पैदा आदुर आंदुर शूरवीर आगोर, यार्द किर्ती हाळाबाट्‍टुर से प्रचलित आद.

⁵ यहोवा नोळदुन कि मंळसा अन बुराई पृथ्‍वी मा वाळुसीग्‍याद, अदिक आंदुर मन इन विचार दा जो येनारा पैदा आगतद अद हमेशा गलत अच आगतद.

⁶ अदिक यहोवा पृथ्‍वी मा मंळसा अक माळदुर देल पछतासदुन, अदिक आव मन देल हापाळ दुखी आदुन.

⁷ आग यहोवा अंदुन, “ना मंळसा अक यारी ना निर्माण माळदीन पृथ्‍वी इन म्‍याकुच टु मिटुस बुळाईन; येन मंळसा, येन जनावर, येन रांगसावाळा किळा, येन आकाश इन पक्षी, सप्‍पा अक नाश माळ बुळाईन, यतिकी ना आंदरी माळदुर से पछतासतीन.”

⁸ लेकीन यहोवा अन्द अनुग्रह अन्द नजर नूह मा बन्सकु ईत्‍त.

⁹ नूह इन वंशावली ईद हुन. नूह धर्मी मंळसा अदिक तान समय दा लॉकुर दा खरा ईरोन; अदिक नूह परमेश्वर उन अच सांगुळ नळुतेला ईत्‍तुन.

¹⁰ नूह नोर मुर चिकोर ईरोर; शेम, हाम अदिक येपेत.

¹¹ आ समय पृथ्‍वी परमेश्वर उन नजर दा बीगळुसेगीत, अदिक हिंसा देल तुमकु ईरोद.

¹² अदिक परमेश्वर पृथ्‍वी मा जो नजर हाकदुन रा नोळदुन कि अद बिगळुसकु आद; यतिकी सप्‍पा प्राणीगोळ पृथ्‍वी मा तान तान चाल-चलन बिगळुस बुटीदव.

¹³ आग परमेश्वर नूह से अंदुन, “सप्‍पा प्राणीगोळ्द अन्‍त माळोद सवाल नान मुंद होट बंदाद; यतिकी आंदुर कारण पृथ्‍वी उपद्रव देल तुम्‍मेग्‍याद, इदुरसाटी ना आंदरी पृथ्‍वी सांगुळ नष्‍ट माळ बुळाईन.

¹⁴ इदुरसाटी नी गोपेर इन मार्र इन हुळ्ली इन ऊंद जहाज माळकोम, अदुर दा कमरागोळी माळेत, अदिक व्‍हार्या-बुळ्क अदुर मा राल हचेत.

¹⁵ ई ढंग देल नी अदरी माळेत: जहाज इन लंबाई मुर सौ कय, चौळाई पचास कय, अदिक ऊचाई तीस कय इन ईरूल.

¹⁶ जहाज दा ऊंद खिळकी माळेत, अदिक अदुर ऊंद कय म्‍याकुच टु अदुर छत माळेत, अदिक जहाज इन ऊंद दी ऊंद दरवाजा ईटेत; अदिक जहाज दा पयला, दुसरा, तीसरा खण्‍ड माळेत.

¹⁷ अदिक केळ, ना खुद पृथ्‍वी मा जल-प्रलय माळकु सप्‍पा प्राणीगोळ इक, यदुर दा जीवन प्राण आद, आकाश इन ल्‍यालमा टु नष्‍ट माळदुर मा आईन; अदिक सप्‍पा जो पृथ्‍वी मा आर सोतोदार.

¹⁸ लेकीन ना नीन सांगुळ वादा माळतीन; इदुरसाटी तान पारगोळ, आर्त, अदिक तान सास्सा सांगुळ दा प्रवेश माळेत.

¹⁹ अदिक सप्‍पा जित्ता प्राणी दा टु नी ऊंद ऊंद जाती इन येढ्‍ढ येढ्‍ढ, मतलब ऊंद नर अदिक मादा जहाज दा वोतकु, तान सांगुळ जीत्‍ता ईटेत.

²⁰ हर ऊंद जाती इन पक्षी, अदिक हर ऊंद जाती इन जनावर, अदिक हर ऊंद जाती इन जमीन मा रांगसावाळा, सप्‍पा दा टु येढ्‍ढ येढ्‍ढ नीन हात्‍ती बंदव, नी अवरी जीत्‍ता ईटेत.

²¹ अदिक अलग अलग तिनोद सामान, अवरी नी हुळकु तान हात्‍ती जमा माळकु ईटेत; जो नीनी अदिक अऊर तिनोर साटी ईत्‍तीत.”

²² परमेश्वर उन ई आग्‍या अन अनुसार नूह माळदुन.