उत्पत्ति 4

¹ याग आदम तान हिंग्‍स हवा अन हाती होदुन आग आक व्‍हाट्‍यादी ईतकु कैन उक जनम कोट्‍टुर अदिक अंदुर, “नानी यहोवा अन सहारा देल ऊंद गंळ्स सिकदुन.”

² बाक आक आऊन श्‍याण वार्ट हाबिल उक भी जनम कोट्‍टुर. हाबिल मर्र-म्यांडागोळी आळसावाळा आदुन, लेकीन कैन जागा मा खेती माळावाळा किसान आदुन.

³ येनारा दिन इन बाद्‍दा हिंग आत कि कैन तान जागा अन्द ऊपज दा टु यहोवा अन साटी भेंट तंदुन.

⁴ अदिक हाबिल भी तान मर्र-म्यांडा गोळोव पयला चिकोर दा टु भेंट येर्सली तंदुन अदिक अऊर न्याण भेंट येर्सदुन; आग यहोवा हाबिल अदिक आऊन भेंट इक रा ग्रहण माळदुन,

⁵ लेकीन कैन अदिक आऊन भेंट इक ग्रहण माळीदिल. आग कैन हापाळ सिट्‍ट दा बंदुन? अदिक आऊन मार्रा मा उदासी होट्‍ट बत्‍त.

⁶ आग यहोवा कैन से अंदुन, “नी येती सिट्‍टी बंद? अदिक नीन मार्रा मा उदासी यती बत्‍त?

⁷ अगर नी भला माळ्‍या रा येन नीन भेंट ग्रहण माळकु आगतीदील? अगर नी भला माळाल, रा पाप दरवाजा मा होचकु ईरतद; अदिक अदुर लालसा नीन दी ईत्‍तीत, अदिक नीनी अदुर मा प्रभुता माळोद आद.”

⁸ आग कैन तान वार्ट हाबिल से येनारा अंदुन; अदिक याग आंदुर मैदान मा ईरोर, आग कैन तान वार्ट हाबिल मा येरकु आऊक कोंद बुट्‍टुन;

⁹ आग यहोवा कैन से केळदुन, “नीन वार्ट हाबिल येल आन?” आव अंदुन, यम्‍बाल; येन ना तान वार्ट उन रखवाला हुईन?

¹⁰ आव अंदुन, “नी येन माळ्‍द? नीन वार्ट उन रक्‍ता जमीन टु नान दी चिळ्‍लासकु नान दोहाई कोळेत्‍याद!

¹¹ इदुरसाटी ईग जागा नीन वार्ट उन रक्‍ता नीन कय देल कुडोर साटी तान बाय तेरदाद, अदुर दी टु नी श्रापित आय.

¹² अगर नी जागा मा खेती माळ्‍या, तरी भी अदुर पुरा ऊपज बाक नीनी सिकतीदील; अदिक पृथ्‍वी मा भटकुसावाळा अदिक भगोळा आद्‍या.”

¹³ आग कैन यहोवा से अंदुन, “नान दण्ड सहन इन व्‍हार्या आद.

¹⁴ नोळ, नी ईंद इन दिशी नानी भूमी मा टु तेगद्‍या, अदिक ना नीन नजर इन मुंद ईराईन; अदिक पृथ्‍वी मा भटकुसावाळा अदिक भगोळा ईराईन; हिंग आग बाळुल कि जो यावारा नानी पाऊस्‍यान, नानी कोंद बुट्‍टान.”

¹⁵ ई कारण यहोवा आऊन से अंदुन, “जो यावारा कैन इक कोंदान आऊन सांगुळ येळ गुणा बदला ताकोमकु आदीत.” अदिक यहोवा कैन उन साटी ऊंद चिन्ह ठहरूसदुन हिंग आग बाळुल कि यावारा आऊक पाऊसकु कोंद बुळुल.

¹⁶ आग कैन यहोवा अन हाती टु होटोदुन, अदिक नोद हेसुर इन द्‍याश दा जो अदन इन पूर्व अन दी आद, ईरली कुरतुर.

¹⁷ याग कैन तान हिंग्‍स उन हाती होदुन आग आक व्‍हाट्‍यादी ईत्‍तुर, अदिक आक हनोक उक जनम कोट्‍टुर; बाक कैन ऊंद नगर बसुसदुन अदिक आ नगर इन हेसुर तान पार उन हेसुर मा हनोक ईटदुन.

¹⁸ अदिक हनोक देल ईराद पैदा आदुन, अदिक ईराद देल महूयाएल पैदा आदुन, अदिक महूयाएल देल मतूशाएल, अदिक मतूशाएल देल लेमेक पैदा आदुन.

¹⁹ लेमेक येढ्‍ढ हिंग्‍सुर माळदुन: आंदुर दा टु ऊंद इन हेसुर आदा, अदिक दुसरा अन हेसुर सिल्‍ला ईरोद.

²⁰ आदा याबाल उक जन्म कोट्‍टुर. आव आ सप्‍पा लॉकुरव पुर्वज आदुन जो ड्‍यारागोळ दा ईरतोगोर अदिक जनावरगोळ सालुतोगोर.

²¹ अदिक आऊन वार्ट उन हेसुर यूबाल ईरोद. ईव आ लॉकुरव पुर्वज आदुन जो विणा अदिक कोळ्‍ल उयतोगोर.

²² अदिक सिल्‍ला भी तूबल-कैन हेसुर इनव पार उक जनम कोट्टुर: आव कासा अदिक लोहा अन सप्‍पा सामान माळावाळा आदुन. अदिक तूबल-कैन उन आकतींग नामा ईरोर.

²³ अदिक लेमेक तान हिंग्‍सुर से अंदुन: “अने आदा अदिक अने सिल्‍ला, नान मात केळी, अने लेमेक उन हिंग्‍सुरा, नान मात ध्‍यान देल केळी: ना ऊंद गंळ्स उक याव नानी घायल माळीदुन, मतलब ऊंद जवान उक याव नानी चोट पोहचुसीदुन, कोंद बुटीन.”

²⁴ अगर कैन उन बदला येळ गुणा रा लेमेक उन बदला सत्‍तर गुणा चुकुसकु आदीत.

²⁵ आदम बाक मात तान हिंग्‍स उन हाती होदुन, अदिक आक ऊंद पार उक जनम कोट्‍टुर अदिक आऊन हेसुर ईद अनकु शेत ईटदुर: “परमेश्वर नान साटी हाबिल इन बदला, यारी कैन कोंद बुट्‍टीदुन, ऊंद अदिक पार कोट्‍टुन.”

²⁶ शेत उक भी ऊंद पार पैदा आदुन. आव आऊन हेसुर एनोश ईटदुन. अदा समय टु लॉकुर यहोवा अन्‍द हेसुर ताकोमकु प्रार्थना माळली कुरतुर.