उत्पत्ति 14

¹ शिनार उन राजा अम्रापेल, अदिक एल्लासार उन राजा अर्योक, अदिक एलाम उन राजा कदोर्लाओमेर, अदिक गोयीस उन राजा तिदाल उन दिनगोळ दा हिंग आत,

² कि आंदुर सदोम उन राजा बेरा, अदिक गमोरा अन राजा बिर्शा, अदिक अदमा अन राजा शिनाब, अदिक सबोयीम उन राजा शमेबेर, अदिक बेला जो सोअर भी कहलुसतान, ई राजागोळ्द विरूद्ध युद्ध माळदुन.

³ इंदुर अईदु मुंदुर सिद्दीम हेसुर इन तराई दा, जो खारा समुद्र अन हात्‍ती आद, एकता माळदुर.

⁴ हन्‍नेळ वर्ष ताका रा इंदुर कदोर्लाओमेर उन हात्‍ती ईतकु स्यावा माळदुर; लेकीन तेरहवा वर्ष दा आऊन खिलाप विद्रोह माळदुर.

⁵ चौहदावा वर्ष दा कदोर्लाओमेर अदिक आऊन संगी राजा बंदुर, अदिक अशतरोत्‍कनम दा रपाईयो अक, अदिक हाम दा जूजियोगोळ इक, अदिक शाबेकिर्यातैम दा एमियोगोळ इक,

⁶ अदिक सेईर हेसुर इन पहाळी मा होरी अक बडुत बडुत आ एल्‍पारान ताका जो आळी इन हात्‍ती आद, पोहचुसेदुर.

⁷ अल आंदुर वापस आगकु एन्‍मिशपात इक बंदुर, जो कादेश भी कहलुसतद, अदिक अमालेकियों अन पुरा द्‍याश इक अदिक आ एमोरीगोळी भी जीक्स कोंडुर, जो हससोन्‍तामार दा ईरतोगोर.

⁸ आग सदोम, गमोरा, अदमा, सबोयीम, अदिक बेला, जो सोअर भी कहलुसतान; इंदुरव राजा होट्‍टुर अदिक सिद्दीम हेसुर इन तराई दा, आंदुर सांगुळ युद्ध इन साटी पाँती कटदुर:

⁹ मतलब एलाम उन राजा कदोर्लाओमेर, गोयीम उन राजा तिदाल, शिनार उन राजा अम्रापेल, अदिक एल्लासार उन राजा अर्योक, ई नाकु मुंदुर्द खिलाप आ अईदु मुंदुर पाँती कटदुर.

¹⁰ सिद्दीम हेसुर इन तराई दा येल दलदला मुण्‍ण इन खॉदरा अच खॉदरा ईरव; सदोम अदिक गमोरा अन राजा ओळ्‍त ओळ्‍त अऊर दा बिदोदुर, अदिक जो ऊळदोदुर आंदुर पहाळी मा वोळेदुर.

¹¹ आग आंदुर सदोम अदिक गमोरा अन सप्‍पा धन अदिक भोजन वस्‍तुगोळ इक लूट पाट माळकु वोळेदुर.

¹² अदिक अब्राहम उन पुतणा लूत, जो सदोम दा ईरतोगोन, आऊक भी आंदुर धन इन सांगुळ ओत कोंडुर.

¹³ आग ऊंद मंळसा जो ओळकु ऊळदोगीदुन आव होगकु इब्री अब्राहम उक समाचार कोट्‍टुन; अब्राहम रा एमोरी मम्रे, जो एश्‍कोल अदिक आनेर उन वार्ट ईरोन, आऊन बांज मार्रगोळ बीच दा ईरतोगोन; अदिक ई लॉकुर अब्राहम उन सांगुळ वादा कटकु ईरोर.

¹⁴ ईद केळकु कि आऊन पुतणा बंदी माळकु आग्‍यान, अब्राहम तान मुर सौ अठराह कल्‍द मंळसा, युद्ध कौशल दा निपुण दासगोळी हुडुकु जो आऊन कुटुम्‍ब दा पैदा आगीदुर, अस्त्र-शस्त्र धारण माळकु दान ताका आंदुर्द पीछा माळदुन;

¹⁵ अदिक तान दासगोळ्‍द अलग अलग दल कटकु ईळ्‍ल्‍क इक आंदुर मा चळाई माळकु आंदरी कोंद बुट्‍टुर अदिक होबा ताका, जो दमिश्क इन उत्‍तर इन दी आद, आंदुर्द पीछा माळदुन.

¹⁶ अदिक आव सप्‍पा धन इक, अदिक तान पुतणा लूत अदिक आऊन धन इक, अदिक आर्तेर इक, अदिक सप्‍पा बंदीगोळी वापस तंदुन.

¹⁷ याग आव कदोर्लाओमेर अदिक आऊन साथी राजागोळी हारूसकु वापस बरोन, रा सदोम इन राजा, शाबे इन घाटी जो राजा अन घाटी अनकु आगतद, आऊन से भेंट माळली बंदुन.

¹⁸ आग शालेम इन राजा मलिकिसिदक, रोट्‍टी अदिक अंगुर इन रास्सा तंदुन. आव परमप्रधान परमेश्वर उन याजक ईरोन.

¹⁹ आग आव आऊक ईद आशीर्वाद कोट्‍टुन “स्‍वर्ग अदिक पृथ्‍वी इक माळावाळा परमप्रधान परमेश्वर उन दी टु अब्राहम धन्‍य आगुल;

²⁰ परमप्रधान परमेश्वर भी धन्‍य आन, याव नीन दुश्‍मनगोळी नीन वश दा माळ कोंडुन. बाक अब्राहम आऊक सप्‍पा वस्‍तुगोळ्‍द हतवा अंश कोट्‍टुन.”

²¹ आग सदोम इन राजा अब्राहम से अंदुन, “लॉकुरी रा नानी कोळ अदिक धन संपत्ती तान साटी ईट बुळ.”

²² अब्राहम सदोम इन राजा से अंदुन, “ना स्‍वर्ग अदिक पृथ्‍वी इन परमप्रधान परमेश्वर यहोवा अन कसम ताकोंडीन,

²³ आऊन ना ईद किर्‍या तिनतीन, कि जो येनारा नींद आद अदुर दा टु ना रा ऊंद सूत, अदिक ना जुता अन बंध, अदिक न येनारा वस्‍तु ताकोमाईन कि नी हिंग अन बाळुल कि अब्राहम नांद अच कारण धनी आग्‍यान.

²⁴ लेकीन जो येनारा ई हारोदोर तीन कोंडार अदिक आंदुर्द भाग, जो नान सांगुळ होगीदुर मतलब आनेर, एश्‍कोल, अदिक मम्रे, ना वापस माळतीदील, आंदुर रा तान तान हिस्‍सा ईट कोमुल.”