उत्पत्ति 11

¹ पुरा पृथ्‍वी मा ऊंद अच भाषा अदिक ऊंद अच बोली ईरोद.

² आ समय इन लॉकुर पूर्व इन दी नळुत नळुत शिनार द्‍याश दा ऊंद मैदान सिक्त अदुर्दा बसुसेदुर.

³ आग आंदुर आपस दा अनली कुरतुर, “बरी, नाव ईटा माळ माळकु अवरी वळ्‍लीसा बेक्‍की दा बेईसाता.” अदिक आंदुर कल्‍ल इन जागा दा ईटा देल, अदिक चुना अन जागा मा मुण्‍ण इन गारा देल क्‍याल्‍सा तांकोडुर.

⁴ बाक आंदुर अंदुर, “बरी, नाव तान साटी ऊंद नगर अदिक ऊंद गुम्मट माळ कोमाता, यदुर्द चोटी आकाश उन सांगुळ मात माळुल, ई प्रकार देल नाव तान हेसुर माळाता, हिंग आगबाळुल कि नामी सप्‍पा पृथ्‍वी मा फैलुसोद बिळुल.”

⁵ याग लॉकुर नगर अदिक गुम्मट इक माळली कुरतुर, आग आंदरी नोळोर साटी यहोवा ईळुकु बंदुन.

⁶ अदिक यहोवा अंदुन, “नोळी, ना येन नोळेतीन कि आंदुर ऊंद अच जाती नोर उर अदिक आंदुर सप्‍पा मुंदुर्द ऊंद अच भाषा हुन. अगर आंदुर ईग ईद अनली कुरतार रा आंदुर जो येनारा भी माळोद ठांस कोंडार, आंदुर साटी येनारा भी माळोद असम्भव आगतीदील.

⁷ बरी, नाव ईळुकु आंदुर भाषा दा गळबळी हाकाता, कि आंदुर आबुर दाबुर बोली इक सम्‍सबाळुल.”

⁸ ई प्रकार यहोवा आंदरी अल टु पुरा पृथ्‍वी मा फैलुस बुट्‍टुन; अदिक आंदुर आ नगर इक माळोद बंद माळदुर.

⁹ ईद कारण आ नगर इन हेसुर बेबीलोन बीत्‍त; यतिकी पुरा पृथ्‍वी इन भाषा दा जो गळबळी आद, अद यहोवा अल्‍या हाकदुन, अदिक अल टु उच यहोवा मंळसागोळी पुरा पृथ्‍वी इन म्‍याकुच फैलुस बुट्‍टुन.

¹⁰ शेम उन वंशावली ई प्रकार देल आद. जल-प्रलय इन येढ्‍ढ वर्ष इन बाद्‍दा याग शेम ऊंद सौ वर्ष इनव आदुन, आग आऊन से अर्पक्षद उन जनम आत;

¹¹ अदिक अर्पक्षद उन जनम इन बाद्‍दा शेम अईद सौ वर्ष जीत्‍ता ईत्‍तुन; अदिक आऊनोर अदिक भी पोर पारगोळ पैदा आदुर.

¹² याग अर्पक्षद पैतीस वर्ष इनव आदुन, आग आऊन से शेलह उन जनम आत;

¹³ अदिक शेलह उन जनम इन बाद्‍दा अर्पक्षद नाक सौ मुर वर्ष अदिक जीत्‍ता ईत्‍तुन, अदिक आऊनोर अदिक भी पोर पारगोळ पैदा आदुर.

¹⁴ याग शेलह तीस वर्ष इनव आदुन, आग आऊन से एबेर पैदा आदुन;

¹⁵ एबेर उन जनम इन बाद्‍दा शेलह नाक सौ मुर वर्ष ताका जीत्‍ता ईत्‍तुन अदिक आऊनोर अदिक भी पोर पारगोळ पैदा आदुर.

¹⁶ एबेर याग चौतीस वर्ष इनव आदुन आग आऊन से पेलेग पैदा आदुन.

¹⁷ अदिक पेलेग उन जनम इन बाद्‍दा एबेर नाक सौ तीस वर्ष ताका जीत्‍ता ईत्‍तुन, अदिक आऊनोर अदिक भी पोर पारगोळ पैदा आदुर.

¹⁸ याग पेलेग तीस वर्ष इनव आदुन आग आऊन से रू पैदा आदुन.

¹⁹ अदिक रू उन जनम इन बाद्‍दा पेलेग येढ्‍ढ सौ ऊम्बत वर्ष ताका जीत्‍ता ईत्‍तुन, अदिक आऊनोर अदिक भी पोर पारगोळ पैदा आदुर.

²⁰ रू याग बत्‍तीस वर्ष इनव आदुन आग आऊन से सरूग पैदा आदुन.

²¹ सरूग उन जनम इन बाद्‍दा रू येढ्‍ढ सौ येळ वर्ष ताका जीत्‍ता ईत्‍तुन, अदिक आऊक भी पोर पारगोळ पैदा आदुर.

²² याग सरूग तीस वर्ष ईनव आदुन रा आऊन से नाहोर पैदा आदुन.

²³ नाहोर उन जनम इन बाद्दा सरूग येढ्‍ढ सौ वर्ष जीत्‍ता ईत्‍तुन, अदिक आऊक भी पोर पारगोळ पैदा आदुर.

²⁴ याग नाहोर उनतीस वर्ष इनव आदुन रा आऊन से तेरह पैदा आदुन.

²⁵ तेरह उन जनम इन बाद्‍दा नाहोर ऊंद सौ उन्‍नीस वर्ष ताका जीत्‍ता ईत्‍तुन, अदिक आऊक भी पोर पारगोळ पैदा आदुर.

²⁶ तेरह याग सत्‍तर वर्ष इनव आदुन आग आऊन से अब्राहम, नाहोर अदिक हारान पैदा आदुर.

²⁷ तेरह उन वंशावली ईद हुन. तेरह देल अब्राहम, नाहोर अदिक हारान पैदा आदुर; अदिक हारान से लूत पैदा आदुन.

²⁸ हारान उन मृत्यु आऊन आप्प तेरह अन जीवन काल दा का कसदी अन ऊर हेसुर इन नगर दा आत्त, जो आऊन जन्म भूमी ईरोद.

²⁹ अब्राहम अदिक नाहोर येढ्‍ढु मुंदुर मदा माळदुर. अब्राहम उन हिंग्‍स उन हेसुर सारै अदिक नाहोर उन हिंग्‍स उन हेसुर मिल्‍का ईरोद. ईक आ हारान उन पोर ईरोर, जो मिल्‍का अदिक यिस्‍का येढ्‍ढु मुंदुरव आप्‍प ईरोन.

³⁰ सारै रा बाँझ ईरोर; आकी चिकोर आगीदील.

³¹ तेरह तान पार अब्राहम, अदिक तान नाती लूत, जो हारान उन पार ईरोन, अदिक तान सास्सा सारै, जो आऊन पार अब्राहम उन हिंग्‍स ईरोर, आ सप्‍पा मुंदुरी हुडुकु कसदी अन ऊर नगर टु होटकु कनान द्‍याश होगली इक होट्टुर; लेकीन हारान हेसुर इन द्‍याश दा पोहचुस्कु अल्‍या ईरली कुरतुर.

³² याग तेरह येढ्‍ढ सौ अईद वर्ष इनव आदुन; आग हारान द्‍याश दा सोतोदुन.