गलातिगोळ 1

¹ पौलुस उन दी टु यारी प्रेरित निवळुस्कु आत जो ना मंळसागोळ दी टु अदिक ना मंळसा अन द्वारा, उलटा यीशु मसीह अदिक परमेश्वर आप्प उन द्वारा, याव आऊक सोत्‍तुर दा टु जित्‍ता माळदुन, प्रेरित हुन

² अदिक सप्पा विश्वासी वार्टुर दी टु जो नान सांगुळ आर, गलातिया अन मंडलीगोळी शुभकामनागोळ कळदुर दा शामिल आर:

³ नाम परमेश्वर आप्प अदिक प्रभु यीशु मसीह अन दी टु नीमी अनुग्रह अदिक शांती कोळतेला ईरूल.

⁴ प्रभु यीशु मसीह तान तान इक नाम पापगोळ साटी कोट बुट्टुन, ताकी नाम परमेश्वर अदिक आप्प उन इच्छा अन अनुसार नामी ई वर्तमान बुरा युग देल बिळसुसुल.

⁵ परमेश्वर उन स्तुति अदिक महिमा हमेशा आगतेला ईरूल. आमीन.

⁶ नानी आश्चर्य आगतद कि याव नीमी मसीह अन अनुग्रह देल कार्सदुन आऊन से नीव ईट जल्दी तिर्गकु दुसरा अच प्रकार इन खुशखबरी इन दी झुक्सली हतदीर.

⁷ लेकीन अद दुसरा खुशखबरी इच हैलेच: लेकीन मात ईद आद कि यास हिंग आर जो नीमी उलझन दा हाक्‍क बुळतार, अदिक मसीह अन खुशखबरी इक बिगळुसोद चाहासतार.

⁸ लेकीन अगर नाव, या स्वर्ग टु यावारा स्वर्गदूत भी खुशखबरी इक बिटकु जो नाव नीमी प्रचार माळकु केळसेव, यावारा अलग खुशखबरी नीमी प्रचार माळकु केळसुल, जो आ खुशखबरी टु अलग आद, रा आंदुर शापित आदार.

⁹ ह्यांग नाव पयले अंद कोंडेव, हांग अच ना ईग मात्‍त अनतीन कि आ खुशखबरी इक बिटकु यदरी नीव ग्रहण माळीर, अगर यावारा मात्‍त खुशखबरी केळ्सतान, रा शापित आगुल.

¹⁰ ईग ना येन मंळसागोळी मान्सतीन या परमेश्वर उक? येन ना मंळसागोळी समझुसोद चाहासतीन? अगर ना ईगासताका मंळसागोळी इच समझुसतेला ईरायदीन रा मसीह अन दास ईला आगायदीन.

¹¹ हे वार्टुरा अदिक आकतींगेरा, ना नीमी हेळ बुळतीन कि जो खुशखबरी ना केळ्सदीन, अद मंळसागोळ्द आल्लच.

¹² यतिकी अद नानी मंळसा अन दी टु पोहचुसीदील, अदिक ना नानी केळ्सकु आत, लेकीन यीशु मसीह अन प्रकाशन देल सिक्त.

¹³ यहूदी मत दा जो पयले नांद चाल चलन ईरोद अदुर्द बारा दा नीव केळ कोंडीर कि ना परमेश्वर उन मंडली इक हापाळ अच सतुसीन अदिक नाश माळ तोगीन.

¹⁴ तान हापाळ सा जातीवाळेर से जो नान अवस्था अन ईरोर, यहूदी मत दा यक्कुल वाळुसतेला होगतोगोद अदिक तान आप्प दादागोळ परंपरागोळ साटी हापाळ अच उत्साही ईरीन.

¹⁵ लेकीन परमेश्वर उन, याव नान मोय इन गर्भ टु अच नानी ठहरूसदुन अदिक तान अनुग्रह देल कार्स बुट्टुन,

¹⁶ याग इच्छा आत कि नान दा तान पार उक प्रगट माळुल कि ना गैरयहूदीगोळ दा आऊन खुशखबरी केळसाईन, रा ना मास अदिक रक्ता देल सलाह ताकोंडीन,

¹⁷ अदिक ना यरूशलेम इक आंदुर हाती होदीन जो नान से पयले प्रेरित ईरोर, लेकीन अरब इक ओळेदीन अदिक बाक अल टु दमिश्क इक वापस बंदीन.

¹⁸ बाक मुर वर्ष इन बाद्दा ना कैफा टु मुलाकात माळोर साटी यरूशलेम होदीन, अदिक आऊन हाती पंदरा दिन ताका ईत्‍तीन.

¹⁹ लेकीन प्रभु उन वार्ट याकूब उक बिटकु अदिक प्रेरितगोळ दा टु यारूकु नोळीदील.

²⁰ जो मातगोळ ना नीमी लिख्सतीन, नोळी, परमेश्वर उक उपस्थित जान्सकु अनतीन कि अव ख्वाटा हैलेच.

²¹ इदुर बाद्दा ना सीरिया अदिक किलिकिया अन ऊरगोळ दा बंदीन.

²² लेकीन यहूदिया अन मंडलीगोळ जो मसीह दा ईरोर, नान बाय यागलु ईला नोळीदुर;

²³ लेकीन ईदा केळतोगोर कि जो नामी पयले सतुस तोगोन, आव ईग अदा विश्वास इन खुशखबरी केळ्सतान यारी पयले नाश माळतोगोन.

²⁴ अदिक आंदुर नान बारा दा परमेश्वर उन महिमा माळतोगोर.