यहेजकेल 42

¹ बाक आव नानी व्हार्या आंगुळ दा उत्तर इन दी वोतुन, अदिक नानी आ येढ्ढ कोठरीगोळ हाती तंदुन जो भवन इन आंगुळ इन मुंद अदिक अदुर उत्तर इन दी ईरोद.

² सौ कय इन दुरी मा उत्तरी दरवाजा ईरोद, अदिक चौळाई पचास इक इन ईरोद.

³ बुळ्कळोद आंगुळ इन ईप्पत कय मुंद अदिक व्हार्या आंगुळ इन फर्ची इन मुंद मुरु मंजील दा सज्जा ईरोव.

⁴ कोठरीगोळ मुंद बुळ्क इन दी होगोद हत्त कय चौळा ऊंद हादी ईरोद; अदिक कय तीम इन ऊंद अदिक हादी ईरोद; अदिक कोठरीगोळ्द दरवाजा उत्तर इन दी ईरोव.

⁵ म्याकुच कोठरीगोळ श्याण्णेव ईरव, मतलब सज्जागोळ कारण अव ल्यालमा अदिक न्याड्या अन कोठरीगोळ से श्यांण्द ईरोद.

⁶ यतिकी अव मुर मंजील ईरोद, अदिक आंगुळगोळ घाई अऊरव खंबा ईला ईरव; ई कारण म्याकुच इन कोठरीगोळ ल्यालमा अदिक न्याड्या अन कोठरीगोळ से श्याण्णेव ईरव.

⁷ जो दिवाल कोठरीगोळ मुंद व्हार्या आस पास ईरव मतलब कोठरीगोळ मुंद व्हार्या आंगुळ इन दी ईरव, अदुर लंबाई पचास कय इन ईरोद.

⁸ यतिकी व्हार्या अन आंगुळ कोठरीगोळ पचास कर लंबा ईरोद, अदिक मंदिर इन मुंद इन अलंग सौ कय इन ईरोद.

⁹ ई कोठरीगोळ ल्यालमा पूर्व इन दी हादी ईरोद, येल लॉकुर व्हार्या अन आंगुळ टु इऊर दा होगतोगोर.

¹⁰ आंगुळ इन दिवाल इन चौळाई दा पूर्व इन दी अलग अलग जागा अदिक भवन येढ्ढु उन मुंद कोठरीगोळ ईरव.

¹¹ अऊर मुंदळोद हादी उत्तरी कोठरीगोळ हादी घाई ईरोद; अऊर लंबाई-चौळाई बराबर ईरोद अदिक निकास अदिक ढंग अऊर दरवाजा अन घाई ईरव.

¹² दक्षिणी कोठरीगोळ दरवाजा अन अनुसार हादी इन ताल्ला मा दरवाजा ईरोद, मतलब पूर्व इन दी दिवाल इन मुंद, येल टु लॉक अऊर दा प्रवेश माळ तोगोर.

¹³ बाक आव नान से अंदुन, “ईव उत्तरी अदिक दक्षिणी कोठरीगोळ जो आंगुळ इन मुंद आव, अव अच पवित्र कोठरीगोळ हुव, यदुर दा यहोवा अन हाती होगावाळेर याजक परमपवित्र वस्तुगोळ तीन तोदार, अव परमपवित्र वस्तुगोळ, अदिक अन्नबली, अदिक पापबली, अदिक दोषबली, अल्या ईट्यार; यतिकी अद जागा पवित्र आद.

¹⁴ याग याग याजक लॉकुर बुळ्क होदार, आग आग होळा समय आंदुर पवित्र जागा टु व्हार्या आंगुळ दा हींग अच होळतीदील, मतलब आंदुर पयले तान स्यावा टहल इन कपळा पवित्र जागा दा ईट कोंडार; यतिकी ईव कोठरीगोळ पवित्र आव. आग आंदुर दुसरा कपळा हाक्कु साधारण लॉकुर जागा दा होदार.”

¹⁵ याग आव बुळ्कळोद भवन इन नाप्स कोंडुन, आग नानी पूर्व दिशा अन फाटक इन हादी टु व्हार्या वोतकु व्हार्या अन जागा नाकु दी नाप्सली कुरतुन.

¹⁶ आव पूर्वी इक नाप्सोद बास देल नाप्सकु अईद सौ बास इन पाऊसदुन.

¹⁷ आग आव उत्तरी इक नाप्सोर बास देल नाप्सकु अईद सौ बास इन पाऊसदुन.

¹⁸ आग आव दक्षणी इक नाप्सोर बास देल नाप्सकु अईद सौ बास इन पाऊसदुन;

¹⁹ अदिक पश्चिम इन दी तिर्गकु आव नाप्सोर बास देल नाप्सकु अदरी अईद सौ बास इन नोळदुन.

²⁰ आव आ जागा अन नाकु सीमागोळ नाप्सदुन, अदिक अदुर नाकु दी ऊंद दिवाल ईरोद, अद अईद सौ बास लंबा अदिक अईद सौ बास चौळा ईरोद, अदिक ईदुरसाटी बन्सकु ईरोद कि पवित्र अदिक सर्वसाधारण इक अलग अलग माळुल.