यहेजकेल 4

¹ “हे मंळसा अन सन्तान, नी ऊंद ईटा हुडु अदिक अदरी तान मुंद ईटकु अदुर मा ऊंद नगर, मतलब यरूशलेम इन ऊंद चित्र तेगु;

² आग अदरी घेर्स मतलब अदुर विरूद्‍ध किला माळ अदिक अदुर मुंद नालीगोळ कट; अदिक छावनी हाक, अदिक अदुर नाकु दी युध्द अन यंत्र हच.

³ आग नी लोहा अन तावा हुडुकु अदरी लोहा अन शहरपनाह मान्सकु तान अदिक आ नगर इन बीच नीदरूस, आग तान बाय आऊन मुंद माळकु अदुर घेराबंदी माळ, ई रीती देल; नी अदरी घेर्सकु ईटेत. ईद इस्त्राएल उन घराना अन साटी चिन्ह ठहरूसीत.”

⁴ “बाक नी ऊजवा कळ ताकोमकु इस्त्राएल उन घराना अन अधर्म तान म्याकुच ईट, यतिकी यास दिन नी ऊजवा कळ ताकोमकु मिंगतेला ईत्या, आस दिन ताका आ लॉकुर इन अधर्म इन भार सहुसतेला ईत्या.

⁵ ना आंदुर साटी अधर्म इन वर्षगोळ तुल्य नीन साटी दिनगोळ ठहरूसीन, मतलब मुर सौ नब्बे दिन; आस दिन ताका नी इस्त्राएल इन घराना अन अधर्म इन भार सहुसतेला ईर.

⁶ याग ईस दिन पुरा आगेदव, आग नी डाक्या कळ मींगकु यहूदा अन घराना अन अधर्म इन भार सहुस कोमेत; ना आंदुर साटी भी अदिक नीन साटी ऊंद वर्ष इन बदला ऊंद दिन मतलब चालीस दीन ठहरूसीन.”

⁷ नी यरूशलेम इक घेर्सोर साटी बाह तेगुकु तान बाय आत्त माळकु अदुर विरूद्‍ध भविष्यवाणी माळेत.

⁸ नोळ, ना नीनी जाळीगोळ देल जकळुसाईन, अदिक यागासताका अदुर घेर्सोद इन दिन पुरा आगाल, आगासताका नी कळ ताकोम सकतीदील.

⁹ “नी गोदी, जौ, सेम, मसूर, बाजरा, अदिक कठिया गोदी, हुडुकु ऊंद बरतन दा ईटकु अऊर देल रोट्टी माळ तोगेत. यास दिन नी कळ मा मींगकु ईत्या, आस मतलब मुर सौ नब्बे दिन ताका अदरी तीन तोगेत.

¹⁰ जो भोजन नी तिंद्या, अदरी आळु आळुकु तिनेत, मतलब रोज येढ्ढ सौ तीस ग्राम तीम तिन तोगेत, अदिक अदरी समय समय मा तिनेत.

¹¹ नीर भी आळुकु कुडु तोगेत, मतलब हर दिशी येढ्ढ गिलास कुडेत; अदिक नी नीर निश्चित समय मा कुडेत.

¹² तान भोजन जौ इन रोट्टीगोळ घाई माळकु तीन तोगेत, अदिक अदरी मंळसा अन ल्यांडा अन कुळ्लगोळ मा आंदुर नोळतेला बनुस तोगेत.”

¹³ बाक यहोवा अंदुन, “ईदा प्रकार देल इस्त्राएल आ राज्यगोळ बीच तान तान रोट्टी अशुध्दता देल तिंदार, यल ना आंदरी जबरदस्ती पोहचुसाईन.”

¹⁴ आग ना अंदीन, “हाय, यहोवा परमेश्वर नोळ, नान मन कभी अशुध्द आगीदील, अदिक ना बचपन टु हुडुकु ईगासताका खुद देल सोतकु या बीचकु आग्याद जनावर इन मास तिंदीदील, अदिक न यातोदु प्रकार इन बेकार मास नान बाय दा कभी होग्याद.”

¹⁵ आग आव नान से अंदुन, “नोळ, ना नीन साटी मंळसा अन ल्यांडा अन बदला सेंगळी ठहरूसीन, अदिक अदुर देला नी तान रोट्टी माळेत.”

¹⁶ बाक आव नान से अंदुन, “हे मंळसा अन सन्तान, नोळ, ना यरूशलेम दा अन्नरूपी आधार इक दुर माळाईन; ईदुरसाटी अलेर लॉकुर आळु आळुकु अदिक चिन्ता माळ माळकु रोट्टी तिनतोदार; अदिक आळु आळुकु अदिक दुखी आग आगकु नीर कुडुतोदार.

¹⁷ अदिक ईदुर देल आंदरी नीर अदिक रोट्टी इन कमी आदीत; अदिक आंदुर सप्पा च्या सप्पा घबरूस्यार, अदिक तान अधर्म दा फसुसकु वंळ्गेदार.”