यहेजकेल 31

¹ हनुंद वा वर्ष इन तीसरा तींगुळ इन पयला दिन इक यहोवा अन ईद वचन नान हाती पोहचुस्त:

² “हे मंळसा अन सन्तान, मिस्त्र अन राजा फिरौन अदिक आऊन भीळ से अन, तान बळाई दा नी यार घाई आय.

³ नोळ, अश्शूर रा लबानोन उन ऊंद देवदार ईरोन यारव सुन्दर सुन्दर शाखागोळ, घना सावली कोळोद अदिक हापाळ ऊँचा ईरोद; अदिक अदुर फुगनी बादलगोळ ताका पोहचुसोद.

⁴ नीर अदरी वाळुस्त, अदिक गहरा नीर इन कारण अद ऊँचा आत, यदुर देल गांगागोळ अदुर जागा अन नाकु दी वाहुसोद; अदिक अदुर नालीगोळ होटकु मैदान इन सप्पा मार्रगोळ हाती पोहचुसोद.

⁵ ई कारण अदुर ऊचाई मैदान इन सप्पा मार्रगोळ से येक्कुल आत; अदुर डगालगोळ हापाळ आदव, अदिक अदुर शाखागोळ लम्बा आगेदव, यतिकी याग अव होट्टव, आग अवरी हापाळ नीर सीक्त.

⁶ अदुर डगालगोळ दा आकाश इन सप्पा पक्षीगोळ बसेरा माळतोगोव, अदिक अदुर खांदी इन ल्यालमा मैदान इन सप्पा प्रकार इन जीवजन्तु पैदा आगव; अदिक अदुर सावली दा सप्पा धोड्डेव जातीगोळ ईरतोगोव.

⁷ अद तान वाळ अदिक तान डगालगोळ्द लम्बाई इन कारण सुन्दर आत; यतिकी अदुर जळ हापाळ नीर इन हाती ईरोद.”

⁸ परमेश्वर उन बाळी इन देवदार भी अदरी ईला होचकोम सकोर, सनौबर अदुर डगालगोळ घाई भी ईला ईरव, अदिक न अर्मोन मार्र अदुर खांदीगोळ तुल्य ईरव; परमेश्वर उन बाळी इन भी यातोदु मार्र सुंदरता दा अदुर बराबर ईला ईरोद.

⁹ ना अदरी डगालगोळ्द बहुतायत देल सुन्दर माळीदीन, ईल ताका कि अदन इन सप्पा मार्र जो परमेश्वर उन बाळी दा ईरव, अदुर से डाह माळ तोगोव.

¹⁰ “ई कारण परमेश्वर यहोवा ईद अंदान: अदुर ऊचाई जो वाळुसीग्याद, अदिक अदुर वाळ जो बादलगोळ ताका पोहचुस्याद, अदिक तान ऊचाई इन कारण अदुर मन जो फुलुसीग्याद,

¹¹ इदुरसाटी जातीगोळ दा जो सामर्थी आन, ना आऊंद अच कय अदरी माळ कोमाईन, अदिक आव सही दा अदुर से बुरा व्यवहार माळ्यान. आऊन दुष्टता अन कारण ना आऊक तेगु बुटीन.

¹² परदेशी, जो जातीगोळ दा भयानक लॉकुर आर, आंदुर अदरी कडुकु भीट्ट बुट्टार, अदुर डगालगोळ पहाळी मा, अदिक सप्पा तराईगोळ दा केळकु आदव, अदिक अदुर सप्पा खांदागोळ द्याश इन सप्पा नाला दा मुर्दकु बीदकु ईत्तव, अदिक जाती जाती इन सप्पा लॉकुर अदुर सावली इक बिटकु वोळेदार.

¹³ अदुर बीदकु मार्र मा आकाश इन सप्पा पक्षी बसेरा माळेव; नीन खांदागोळ मा आळी दाकळव जनावर ईरली कुरतव.

¹⁴ ईद इदुरसाटी आग्याद कि नीर इन हाती इन सप्पा मार्रगोळ दा टु याऊ तान ऊचाई वाळुस बाळुल, न तान फुगनी इक बादलगोळ ताका पोहचुस्यान, अदिक अऊर दा टु यास नीर पाऊसकु मजबुत आगेग्याव अव ऊँचा आगदुर कारण ताल्ला नेगुबाळुल; यतिकी अव भी सप्पा अन सप्पा कब्र दा नळ्सकु मंळसागोळ घाई मृत्यु इन वश माळकु अधोलोक दा हाक्कु आदव.”

¹⁵ “परमेश्वर यहोवा ईद अनतान: याता दिशी आव अधोलोक दा ईळदान, आ दिशी ना विलाप माळाईन अदिक गहरा समुद्र अक ढाप्स कोंडीन, अदिक गांगा अन हापाळ नीर रूकसेत; अदिक अदुर कारण ना लबानोन मा उदासी छाऊसदीन, अदिक मैदान इन सप्पा मार्र मूर्छित आदव.”

¹⁶ याग ना अदरी कब्र दा नळ्सकु आर आंदुर हाती अधोलोक दा भीट्ट बुट्टीन, आग अदुर बीळोद आवाज देल जाती जाती थरथरूसेत, अदिक अदन इन सप्पा मार्र मतलब लबानोन इन वळ्लेव वळ्लेव मार्रगोळ, यास अदुर से नीर पाऊसोर, आ सप्पा अधोलोक दा शांती पाऊसदुर.

¹⁷ अव भी अदुर सांगुळ तलवार देल कोंदकु आर आंदुर हाती अधोलोक दा ईळदोदव; मतलब अव जो अदुर भुजा ईरव, अदिक जाती जाती इन बीच अदुर सावली दा ईर तोगोव.

¹⁸ “इदुरसाटी महिमा अदिक बळाई इन बीच बारा दा अदन इन मार्रगोळ दा टु नी यार घाई आय? नी रा अदन इन अदिक मार्रगोळ सांगुळ अधोलोक दा ईळ्सकु आद्या, अदिक खतनाहीन लॉकुर बीच तलवार देल कोंदकु आर आंदुर सांगुळ बिदकु ईत्या. फिरौन तान सप्पा भीळ-बाळ सांगुळ हिंगा ईत्तान, परमेश्वर यहोवा अन ईदा वाणी आद.”