यहेजकेल 28

¹ बाक यहोवा अन ईद वचन नान हाती पोहचुस्त,

² “हे मंळसा अन पारा, सोर उन प्रधान से अन, परमेश्वर यहोवा ईद अनतान: नी मन दा फुलुस्कु ईद अंद्या, ‘ना ईश्वर हुईन, ना समुद्र अन न्याड्या परमेश्वर उन आसन मा कुर्तकु आईन,’ लेकीन अगर नी तान तानीक परमेश्वर घाई तोर्सत्या, तरी भी नी ईश्वर आलच, मंळसा अच हुय.

³ नी दानिय्येल से येक्कुल बुद्धिमान रा आय; यातोदु भेद नीन से होच कोमकु ईरतीदील;

⁴ नी तान बुद्धि अदिक समझ इन द्वारा धन हासील माळ्या, अदिक तान भण्डारगोळ दा व्हान्ना अदिक चाँदी ईट्या;

⁵ नी धोळ बुद्धि देल लेन देन माळ्या यदुर देल नीन धन वाळुस्याद, अदिक धन इन कारण नीन मन फुलुस्याद.

⁶ ई कारण परमेश्वर यहोवा ईद अनतान: नी जो तान मन परमेश्वर घाई तोर्सत्या,

⁷ ईदुरसाटी नोळ, ना नीन मा हींग परदेशीगोळ से चळाई माळसुसाईन, जो सप्पा राज्यगोळ से येक्कुल हुंसात्मक आद, आंदुर नीन सुंदरता अदिक बुद्धि विरूद्ध तलवारगोळ तेगदार अदिक नीन चमकुसतेला वैभव इक छेदुस कोंडार. अदिक नीन चमक-दमक इक बिगळुसतार.

⁸ आंदुर नीनी कब्र दा ईळस्यार, अदिक नी समुद्र अन न्याड्या अन कोंदुर रिती मा सोतोद्या.

⁹ आग, येन नी तान घात माळावाळेर मुंद अनतेला ईत्या, ना परमेश्वर हुईन? नी तान घायल माळावाळेर कय दा ईश्वर ईला, मंळसा अच ठहरूस्या.

¹⁰ नी परदेशीगोळ कय टु खतनाहीन लॉकुरगोळ घाई कोंदकु आद्या; यतिकी ना अच हींग अंदीन, परमेश्वर यहोवा अन ईदा वाणी हुन.”

¹¹ बाक यहोवा अन ईद वचन नान हाती पोहचुस्त:

¹² “हे मंळसा अन सन्तान, सोर उन राजा अन बारा दा दुख इन हाळ माळकु आऊन से अन; परमेश्वर यहोवा ईद अनतान: नी रा उत्तम से भी उत्तम आय; नी बुद्धि देल भरपुर अदिक सर्वांग सुन्दर आय.

¹³ नी परमेश्वर उन अदन हेसुर इन बगीचा दा ईर्या; नीन हाती आभूषण, माणिक, पद्यराग, हीरा, फीरोजा, सुलैमानी मणी, यशब, नीलमणि, मरकद, अदिक क्याच्यान सप्पा प्रकार इन मणी अदिक व्हान्ना अन पहिनावा ईरव; नीन टापटी अदिक कोळ्लगोळ नीन दा माळकु आगीदव; या दिशी नी माळकु आगीद, अदा दिशी आंदुर भी तैयार माळकु आगीदुर.

¹⁴ नी छाऊसावाळा अभिषिक्त गिधाळ ईर्‍या, ना नीनी हींग ठहरूसीन कि नी परमेश्वर उन पवित्र पहाळी मा ईरतोग्या; नी बेक्की घाई चमकुसावाळा मणीगोळ न्याड्या नळा वयाळ्या.

¹⁵ या दिशी नी माळकु आद, अदिक या दिशी ताका नीन दा कुटीलता नोळकु आगीदील, आ समय ताका नी तान सप्पा चालचलन दा निर्दोष ईत्त.

¹⁶ लेकीन लेन देन इन हापाळ इक कारण उपद्रव देल तुमकु पापी आगेद; ईदुर देल ना नीनी अपवित्र जान्सकु परमेश्वर उन पहाळी मा ईळ्सदीन, अदिक छाऊसावाळा गिधाळ ना नीनी बेक्की घाई चमकुसावाळा मणीगोळ न्याड्या टु नष्ट माळीन.

¹⁷ सुंदरता अन कारण नीन मन फुल्सकु बंदाद; अदिक वैभव इन कारण नीन बुद्धि बीगळुसीगीत. ना नीनी जमीन मा आपळुस बुटीदीन; अदिक राजागोळ मुंद नीनी ईटदीन कि आंदुर नीनी नोळुल.

¹⁸ नीन धर्म इन क्याल्सा अन हापाळ अदिक नीन लेन देन इन कुटीलता देल नीन पवित्र जागा अपवित्र आगेदव; ईदुरसाटी ना नीनी नीन से हींग बेक्की पैदा माळदीन यदुर देल नी भस्म आद, अदिक ना नीनी सप्पा नोळावाळेर मुंद जमीन मा भस्म माळ कोंडीन.

¹⁹ द्याश द्याश इन लॉकुर दा टु यास नीनी जान्सतार सप्पा नीन कारण विस्मित आदुर; नी अंज्क इन कारण आग्या अदिक बाक यागलु नोळकु आगतीदील.”

²⁰ यहोवा अन ईद वचन नान हाती पोहचुस्त:

²¹ “हे मंळसा अन सन्तान, तान बाय सीदोन इन दी माळकु आऊन विरूद्ध भविष्यवाणी माळ,

²² अदिक अन, प्रभु यहोवा ईद अनतान: हे सीदोन, ना नीन विरूद्ध आईन; ना नीन न्याड्या तान महिमा माळसुसाईन. याग ना आऊन न्याड्या दण्ड कोळाईन अदिक आऊन दा तान इक पवित्र ठहरूसाईन, आग लॉकुर जान्स कोंडार कि ना यहोवा हुईन.

²³ ना अदुर दा मरी फैलुसाईन, अदिक आऊन सकळगोळ दा रक्ता वाहुसाईन; अदिक आऊन नाकु दी तलवार नळदव; आग आऊन न्याड्या तलवार नळदव; आग आऊन न्याड्या घायल लॉकुर बीद्दार, अदिक आंदुर जान्स कोंडार कि ना यहोवा हुईन.

²⁴ “इस्त्राएल उन घराना अन नाकु दीकळव यास राज्य आंदुर सांगुळ अभिमान इन बर्ताव माळताव, अऊर दा टु यातोदु नळावाळा मुळ्ल या कटावाळा शूल मात ठहरूसीतीदील; आग आंदुर जान्स कोंडार कि ना परमेश्वर यहोवा हुईन.

²⁵ “परमेश्वर यहोवा ईद अनतान: याग ना इस्त्राएल उन घराना अक आ सप्पा लॉकुर दा टु जमा माळाईन, यार न्याड्या आंदुर तीतर-बितर आग्यार, अदिक द्याश द्याश इन लॉकुर मुंद आंदुर द्वारा पवित्र ठहरूसाईन, आग आंदुर आ द्याश दा वास माळ्यार जो ना तान दास याकूब उक कोटीदीन.

²⁶ आंदुर अदुर दा निडर बसुसकु ईत्तार; आंदुर मान्ना माळकु अदिक अंगुर इन बगीचा हचकु निडर ईत्तार; आग ना आंदुर नाकु दीकळोर सप्पा लॉकुरी दण्ड कोळाईन जो आंदुर से अभिमान इन बर्ताव माळतार, आग आंदुर जान्स कोंडार कि आंदुर परमेश्वर यहोवा अच हुन.”