यहेजकेल 19

¹ इस्त्राएल इन प्रधानगोळ बारा दा नी ईद दुख इन गाना केळ्स;

² नीन मोय ऊंद ह्यांग हुल्लगीत ईरोर! आक हुलगोळ बीच दा कुरतोगोर अदिक तान चिकोर इक हारोद हुल्लगोळ बीच पाल्सतोगोर.

³ तान चिकोर दा टु आक ऊंद उक पाल्सदुर अदिक आव हारोद हुल्ल आगेदुन, अदिक अहेर हुडोद कलतोदुन; आव मंळसागोळी भी हरूकु तिंदुन.

⁴ राज्य राज्य अन लॉकुर आऊन चर्चा केळदुर, अदिक आऊक तान अगुळ्द गड्डा दा फसुसदुर, अदिक आऊन नकेल हाक्कु आऊक मिस्त्र द्याश दा ओतुर.

⁵ याग आऊन मोय नोळदुर अदिक आक धीरज ताकोमकु ईत्तुर तरी भी आकिन आशा मुरदोत, आग आक तान ऊंद चिग्द उक हुडुकु आऊक हारोद हुल्ल माळ बुट्टुर.

⁶ आग आव हारोद हुल्ल आगकु हुल्लगोळ बीच नळुली वयाळली कुरतुन, अदिक आव अहेर हुडोद कलतोदुन; अदिक मंळसागोळी भी हरूकु तिंदुन.

⁷ आव आंदुरव भवनगोळी बिगळुसदुन, अदिक आंदुर नगरगोळी ऊजाळ्सदुन बल्की आऊन गरजुसोद अंज्क इन कारण द्याश अदिक अल जो येनारा भी ईरोद सप्पा ऊजुळुसेत.

⁸ आग नाकु दीकळव राज्य राज्य अन लॉकुर तान तान प्रान्त टु आऊन विरूद्ध होटकु बंदुर, अदिक आऊन साटी जाल हचदुर; अदिक आव आंदुर अगुळकु गड्डागोळ दा फसुसेदुन.

⁹ आग आंदुर आऊन नकेल हाक्कु अदिक कठघरा दा बन्द माळकु बेबीलोन इन राजा अन हाती ओतुर, अदिक गढ़ दा बन्द माळदुर, कि आऊन बोल इस्त्राएल इन पहाळी द्याश मा बाक केळ बर बाळुल.

¹⁰ नीन मोय यार से नी पैदा आद, आक किनारा मा हच्द अंगुर इन बेली घाई ईरोर, अदिक गहरा नीर इन कारण कायगोळ अदिक खांदागोळ से तुमकु ईरोर.

¹¹ प्रभुता माळावाळा अन राजदण्डगोळ साटी अदुर दा मोटा मोटा डगालगोळ ईरव; अदिक अदुर ऊचाई ईट आत कि अद बादलगोळ बीच ताका पोहचुस्त; अदिक तान हापाळ सा डगालगोळ सांगुळ हापाळ अच लम्बा कांळ्सली कुर्त.

¹² तरी जलजलाहट इन सांगुळ ऊखळुसकु जमीन मा भिटकु आत, अदिक अदुर फुल पुरवाई हवा अन हत्तुर देल वंळ्गेत; अदिक अदुर मोटा डगालगोळ वंळ्गेदव; अदिक अव बेक्की देल भस्म आगेदव.

¹³ ईग आव आळी दा, बल्की निर्जल द्याश दा हचकु आग्याद.

¹⁴ अदुर खांदागोळ्द डगालगोळ दा टु बेक्की होळ्त, यदुर अदुर काय भस्म आगेदव, अदिक प्रभुता माळा लायक राजदण्ड इन साटी अदुर दा ईग यातोदारा मोदा डगाल ईतीदील. ईदा दुख इन गाना हुन, अदिक दुख इन गाना बन्सकु ईत्तीत.