निर्गमन 8

¹ आग यहोवा मात्‍त मूसा से अंदुन, “फिरौन उन हात्ती होगकु अन, ‘यहोवा नीन से ईत्‍ता प्रकार देल अनतान: नान प्रजा अन लॉकुरी होगगोळ यदुर देल आंदुर नान आराधना माळ्‍यार.

² लेकीन अगर आंदरी होगगोळतीदील रा केळ, ना भ्यापकागोळी कळुकु नीन सप्‍पा द्‍याश इक हानि पोहुचुसावाळा आईन.

³ अदिक नील गांगा भ्यापकागोळ देल तुम्‍मेदित, अदिक अव नीन भवन दा, अदिक नीन हासक्‍या मा, अदिक नीन कर्मचारीगोळ मान्‍नगोळ दा, अदिक नीन प्रजा मा उलटा नीन भट्‍टागोळ अदिक हीठ कालसोद पात्रगोळ दा भी येरेदाव;

⁴ अदिक नीन मा, अदिक नीन प्रजा अदिक नीन कर्मचारीगोळ, सप्‍पा मुंदुर मा भ्यापकागोळ येरेदाव.’”

⁵ बाक यहोवा मूसा अक आग्‍या कोट्‍टुन, “हारून से अंदकोम कि गांगागोळ, नयरगोळ, अदिक झीलगोळ म्‍याकुच कय वाळुसकु कोल इन सांगुळ भ्यापकागोळी मिस्त्र द्‍याश मा येर्सकु तरूल.”

⁶ इदुरसाटी हारून मिस्त्र द्‍याश इन जलाशयगोळ म्‍याकुच तान कय वाळुसदुन; अदिक भ्यापकागोळ मिस्त्र द्‍याश मा येरकु अदरी होच बुट्‍टव.

⁷ अदिक जादूगरगोळ भी हांगा तंत्र-मंत्र देल मिस्त्र द्‍याश मा भ्यापकागोळ येर्सकु तंदुर.

⁸ आग फिरौन मूसा अदिक हारून उक कारसुसकु अंदुन, “यहोवा से विनती माळी कि आव भ्यापकागोळी नान से अदिक नान प्रजा से दुर माळुल; अदिक ना इस्त्राएली लॉकुरी होगगोळाईन. यदुर देल आंदुर यहोवा साटी बलिदान माळुल.”

⁹ आग मूसा फिरौन से अंदुन, “ईट मात साटी नी नानी आदेश कोळ कि ईग ना नीन अदिक नीन कर्मचारीगोळ, अदिक प्रजा अन निमित्त याग विनती माळाईन, कि यहोवा नीन हात्‍ती टु अदिक नीन मान्‍नगोळ दा टु भ्यापकागोळी दुर माळुल, अदिक अव सिर्फ नील गांगा दा सिकुल?”

¹⁰ आव अंदुन, “नाळ.” आव अंदुन, “नीन वचन इन अनुसार आदीत, यदुर नीनी ईद भास आगेगुल कि नाम परमेश्वर यहोवा अन तुल्‍य दुसरा याऊ हैलेच.

¹¹ अदिक भ्यापकागोळ नीन हात्‍ती टु अदिक नीन मान्‍नगोळ दा टु अदिक नीन कर्मचारीगोळ अदिक प्रजा अन हात्‍ती टु दुर आगकु सिर्फ नील गांगा दा अच ईत्‍ताव.”

¹² आग मूसा अदिक हारून फिरौन उन हात्‍ती टु होटोदुर; अदिक मूसा आ भ्यापकागोळ बारा दा, यहोवा अन दुहाई कोट्‍टुन जो आव फिरौन मा कळीदुन.

¹³ अदिक यहोवा मूसा अन अना हिसाब देल माळदुन; अदिक भ्यापकागोळ मान्‍नगोळ, आंगुळगोळ, ऊरगोळ अदिक केईगोळ दा सोतोदव.

¹⁴ अदिक मिस्त्री लॉकुर जमा माळकु अऊर्द ढेर हच बुट्‍टुर, अदिक पुरा द्‍याश वास देल तुम्‍मेत.

¹⁵ लेकीन याग फिरौन नोळदुन कि ईग आराम सिक्‍याद आग यहोवा अन कहना अन अनुसार आव मात्‍त तान मन कठोर माळदुन, अदिक आंदुर केळीदील.

¹⁶ बाक यहोवा मूसा से अंदुन, “हारून उक आग्‍या कोळ, ‘नी तान कोल वाळुसकु जमीन इन गागरा मा बडु, यदुर देल अद मिस्त्र द्‍याश तीम दा पिसोर्‍यागोळ बनसेगुल.’”

¹⁷ मुंद आंदुर हांगा माळदुर; मतलब हारून कोल इक हुडुकु कय वाळुसकु जमीन इन गागरा मा बळदुन, आग मंळसा अदिक जनावरगोळ येढ्‍ढु मा पिसोर्‍यागोळ आगेदव, अदिक सप्‍पा मिस्त्र द्‍याश दा भुमी इन गागरा पिसोर्‍यागोळ बन्‍सेदव.

¹⁸ आग जादूगरगोळ चाहासदुर कि तान तंत्र-मंत्रगोळ्द शक्‍ति देल नाव भी पिसोर्‍यागोळ तंदेव, लेकीन आंदुर सफल आग सकीदील. ई प्रकार मंळसागोळ अदिक जनावरगोळ येढ्‍ढु मा पिसोर्‍यागोळ बन्सकु ईत्‍तव.

¹⁹ आग जादूगरगोळ फिरौन से अंदुर, “ईद रा परमेश्वर उन कय इन क्‍याल्‍सा हुन.” तरी भी यहोवा अन कहना अन अनुसार फिरौन उन मन कठोर आगतेला ईत्‍त, अदिक आव मूसा अदिक हारून उन मात मान्‍सीदील.

²⁰ बाक यहोवा मूसा से अंदुन, “व्हातऱ्या का येदकु फिरौन उन मुंद निदरेत, आव रा नील गांगा अन्द किनारा मा बंदान, अदिक आऊन से अनेत, ‘यहोवा नीन से ईद अनतान: नान प्रजा अन लॉकुरी होगगोळ कि आंदुर नान आराधना माळुल.

²¹ अगर नी नान प्रजा अक होगगोळतीदील रा केळ, ना नीन मा अदिक नीन कर्मचारीगोळ अदिक नीन प्रजा मा, अदिक नीन मान्‍नगोळ दा झुण्‍ड इन झुण्‍ड नॉणगोळी कळाईन; अदिक मिस्त्रीगोळ मान्‍ना अदिक आंदुर ईरा जागा भी नॉणगोळ देल तुम्‍मेदीत.

²² लेकीन आ दिशी ना गोशेन द्‍याश इक यदुर दा नान प्रजा ईरतद ब्‍यार्र माळाईन, अदिक अदुर दा नॉणगोळ्‍द झुण्‍ड ईरतीदील; यदुर देल नी जान्‍स कोम कि पृथ्‍वी इन न्याड्या दा ना अच यहोवा हुईन.

²³ अदिक ना तान प्रजा अदिक नीन प्रजा दा अंतर पैदा माळाईन. ईद चिन्‍ह चमत्कार नाळ आदीत.’”

²⁴ अदिक यहोवा हांगा माळदुन, अदिक फिरौन उन भवन अदिक आऊन कर्मचारीगोळ्‍द मान्‍नगोळ दा, अदिक सप्‍पा मिस्त्र द्‍याश दा नॉणगोळ्‍द झुण्‍ड इन झुण्‍ड तुम्‍मेदव, अदिक नॉणगोळ मारा देल आ द्‍याश नष्‍ट आत.

²⁵ आग फिरौन मूसा अदिक हारून उक कारसुसकु अंदुन, “नीव होगकु तान परमेश्वर उन साटी ईदा द्‍याश दा बलिदान येरसी.”

²⁶ मूसा अंदुन, “हींग माळोद उचित हैलेच; यतिकी नाव तान परमेश्वर यहोवा अन साटी मिस्त्रीगोळ्द हिंग घृणित वस्‍तु बलिदान येरसेव; अदिक अगर नाव मिस्त्रीगोळ नोळ्‍त आंदुर्द घृणित वस्‍तु बलिदान येरसेव रा येन आंदुर नाम मा पथराव माळतीदील?

²⁷ नाव सुनसान आळी दा मुर दिन इन हादी मा होगकु तान परमेश्वर यहोवा अन साटी ह्यांग आव नाम से अंदान हांग अच अल नाव बलिदान येरसेव.”

²⁸ फिरौन अंदुन, “ना नीमी आळी दा होगगोळाईन कि नीव तान परमेश्वर यहोवा अन साटी बलिदान येरसी; सिर्फ यक्कुल दुर होगबाळेतीर, अदिक नान साटी प्रार्थना माळी.”

²⁹ आग मूसा उत्तर कोट्टुन, “केळ, ना नीन हात्‍ती टु व्‍हार्या होगकु यहोवा से प्रार्थना माळाईन कि नॉणगोळ्द झुण्‍ड नीन, अदिक नीन कर्मचारीगोळ, अदिक प्रजा अन हात्‍ती टु नाळ अच दुर माळाईन; लेकीन फिरौन मुंद कपट माळकु नामी यहोवा अन्द साटी बलिदान माळली होगोर साटी मना माळबाळुल.”

³⁰ आग मूसा फिरौन उक बिट्ट बुट्टुन अदिक आऊन हात्‍ती टु व्‍हार्या होगकु यहोवा से प्रार्थना माळदुन.

³¹ अदिक यहोवा मूसा अन अना हिसाब देल नॉणगोळ्‍द झुण्‍डगोळी फिरौन, अदिक आऊन कर्मचारीगोळ, अदिक आऊन प्रजा से दुर माळदुन; ईल ताका कि ऊंद भी नॉण मिक्‍कु ईतीदील.

³² आग फिरौन ई घन भी तान मन इक कठोर माळदुन, अदिक आ लॉकुरी होग गोटीदील.