निर्गमन 39

¹ बाक आंदुर नीळा, जांभळा अदिक क्याचांद रंग इन कळुस्द कपळा पवित्रस्थान इन स्यावा अन साटी, अदिक हारून उन साटी भी पवित्र कपळा माळदुर; याता प्रकार देल यहोवा मूसा अक आग्या कोटीदुन.

² आव विशेष प्रकार इक कपळा अन्द व्हान्ना, अदिक नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा अन बनुसदुन.

³ अदिक आंदुर व्हान्ना पीठ्स पीठ्सकु अदुर्द पतरी माळदुर, बाक पतरीगोळी कडु कडुकु तार माळदुर, अदिक कुशल कारागीरगोळ आ तारगोळी नीळा, जांभळा अदिक क्याचांद रंग इन कपळा दा, अदिक सुक्ष्म सन इन कपळा दा कळाई इन बनावट देल मिलुस बुट्टुर.

⁴ एपोद इन जोळ्सली आंदुर अदुर बाक्कागोळ माकळोद बंधन माळदुर, अद तान येढ्ढु क्वानागोळ से जोळ्सकु आत.

⁵ अदिक अदुर कसुसोर साटी जो काळ्सद पट्टा अदुर मा बनुस्त, अद अदुर सांगुळ बिना जोळ इन, अदिक अदुर्दा बनावट इन अनुसार, मतलब व्हान्ना अदिक नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा अन बनुस्त; याता प्रकार देल यहोवा मूसा अक आग्या कोटीदुन.

⁶ आंदुर सुलैमानी मणि कडुकु अऊर दा इस्त्राएल इन हन्नेळ पारगोळ हेसुर, ह्यांग छापा अगुळकु आगतद हांगा अगुळदुर, अदिक व्हान्ना नव खानगोळ दा जळुस बुट्टुर.

⁷ अदिक आव आंदरी एपोद इन बाक्का अन बन्धनगोळ मा हचदुन, यदुर देल इस्त्राएलीगोळ लॉकुर साटी याद माळसुसावाळा मणि ठहरूसुल; याता प्रकार देल यहोवा मूसा अक आग्या कोटीदुन.

⁸ आव सीनाबन्द इक एपोद इन घाई व्हान्ना अन, अदिक नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा दा बेल बुटा अन क्याल्सा माळदुन.

⁹ सीनाबन्द चौकोन बनुस्त; अदिक आंदुर अदरी दोहरा माळदुर, अदिक अद दोहरा आगकु ऊंद बित्ता ऊद्द अदिक ऊंद बित्ता चौळा आत.

¹⁰ अदिक आंदुर अदुर दा नाक लाईन दा मणि हाकदुर. पयला लाईन दा माणिक्य; पुखराज, अदिक लालड़ी हाकदुर;

¹¹ अदिक दुसरा लाईन दा मरकत, नीलमणि, अदिक हीरा;

¹² अदिक तीसरा लाईन दा लशम, सुर्यकांत, अदिक नीलम;

¹³ अदिक चौथा लाईन दा फिरोजा, सुलैमानी मणी, अदिक यशब हाकदुर; ई सप्पा अलग अलग सीना अन खानगोळ दा हाक्कु आदव.

¹⁴ अदिक ई मणि इस्त्राएल इन पारगोळ्द हेसुरगोळ गिनती इन अनुसार हन्नेळ ईरव; हन्नेळ गोत्रगोळ दा टु ऊंद ऊंद हेसुर ह्यांग छापा अगुळकु आगतद हांगा अगुळकु आत.

¹⁵ अदिक आंदुर सीनाबन्द मा डोरीगोळ घाई गुथुस्द खरा व्हान्ना अन जंजीर माळकु हचदुर;

¹⁶ बाक आंदुर व्हान्ना नव येढ्ढ खाना, अदिक व्हान्ना अन येढ्ढ कळीगोळ माळकु येढ्ढु कळीगोळी सीनाबन्द इन येढ्ढु क्वाना मा हचदुर;

¹⁷ आग आंदुर व्हान्ना नव येढ्ढु गुथुस्द जंजीरगोळी सीनाबन्द इन क्वाना माकळोद येढ्ढु कळीगोळ दा हचदुर.

¹⁸ अदिक गुथुस्द येढ्ढु जंजीरगोळ्द मिक्द येढ्ढु क्वानागोळी आंदुर येढ्ढु खानागोळ दा हाक्कु, विशेष कपळा अन्द मुंद येढ्ढु बाक्का अन बन्धनगोळ मा हचदुर.

¹⁹ आग आंदुर व्हान्ना अन अदिक येढ्ढ कळीगोळ माळकु सीनाबन्द इन येढ्ढु क्वाना मा अदुर आ कोर मा, जो एपोद इन बुळ्क इन भाग दा ईरोद, हचदुर.

²⁰ अदिक आंदुर व्हान्ना अन मात्त येढ्ढ कळीगोळ भी माळकु एपोद इन येढ्ढु बाक्का अन बन्धनगोळ मा ल्यालमा टु अदुर मुंद, अदिक जोळ इन हात्ती विशेष कपळा अन्द काळुस्द पट्टा मा म्याकुच हचदुर.

²¹ आग आंदुर सीनाबन्द इक अदुर कळीगोळ द्वारा एपोद इन कळीगोळ दा नीळा फिता देल हींग कटदुर कि अद एपोद इन काळुस्द पट्टा अन म्याकुच ईरूल, अदिक चपरास एपोद देल अलग आग सकबाळुल; ह्यांग यहोवा मूसा अक आग्या कोटीदुन.

²² बाक एपोद इन कुर्ता पुरा नीळा रंग इन माळकु आत.

²³ अदिक अदुर बनावट हींग आत कि अदुर न्याड्या गोठ इन गड्डा अन घाई ऊंद गड्डा बनुस्त, अदिक गड्डा अन नाकु दी ऊंद कोर बनुस्त कि अद हरूबाळुल.

²⁴ आंदुर अदुर्द ल्यालमा अन घ्यारा दा नीळा, जांभळा अदिक क्याचांद रंग इन कपळा अन अनार माळदुर.

²⁵ आंदुर शुद्ध व्हान्ना अन घंटीगोळ भी माळकु बागा अन ल्यालमा अन घ्यारा अन नाकु दी अनारगोळ्द बीचोबीच हचदुर;

²⁶ मतलब बागा अन ल्यालमागोळ्द घ्यारा अन नाकु दी ऊंद व्हान्ना अन घंटी, अदिक ऊंद अनार, बाक ऊंद व्हान्ना अन घंटी, अदिक ऊंद अनार हचकु आत कि अवरी हाक्कु स्यावा टहल माळुल; ह्यांग यहोवा मूसा अक आग्या कोटीदुन.

²⁷ बाक आंदुर हारून, अदिक आऊन पारगोळ साटी बनुस्द सुक्ष्म सन इन कपळा अन अंगरखा,

²⁸ अदिक सुक्ष्म सनी इन कपळा अन पगळी, अदिक सुक्ष्म सन इन कपळा अन सुंदर टोपीगोळ; अदिक सुक्ष्म सनी इन कपळा अन जंग्यागोळ,

²⁹ अदिक सुक्ष्म सन इन कपळा अन अदिक नीळा, जांभळा अदिक क्याचांद रंग इन कढ़ाई इन क्याल्सा माळ्द पगळी; ई सप्पा अक याता प्रकार देल यहोवा मूसा अक आग्या कोटीदुन हांगा माळदुन.

³⁰ बाक आंदुर पवित्र मुकुट इन पट्टी शुद्ध व्हान्ना अन माळदुर; अदिक ह्यांग छापा दा हांगा अदुर दा ई अक्षर अगुळकु आदव, मतलब “यहोवा अन साटी पवित्र.”

³¹ अदिक आंदुर अदुर दा नीळा जाळी हचदुर, यदुर देल अद म्याकुच पगळी मा ईरूल, याता प्रकार देल यहोवा मूसा अक आग्या कोटीदुन.

³² ईत्ता प्रकार देल मिलाप इन तम्बु उन निवास इन सप्पा क्याल्सा खतम आदव, अदिक याता याता क्याल्सा अन आग्या यहोवा मूसा अक कोटीदुन, इस्त्राएलीगोळ अदुर्दा अनुसार माळदुर.

³³ आग आंदुर निवास इक मूसा अन हात्ती तंदुर: मतलब घुंडीगोळ, पाटीगोळ, बेंडगोळ, खम्बागोळ, कुर्चीगोळ आदि सप्पा सामान समेत तम्बु;

³⁴ अदिक क्याचांद रंग देल रंगुस्द म्यांडागोळ्द तोगुल इन होदोद, अदिक सूइसगोळ तोगुल इन होदोद, अदिक न्याड्या अन पळदा;

³⁵ डंडा सहित साक्षीपत्र इन सन्दुक, अदिक प्रायश्चित इन झाकनी;

³⁶ सप्पा सामान समेत मेज, अदिक भेंट इन रोट्टीगोळ;

³⁷ सप्पा सामान सहित दिवट, अदिक अदुर सजावट इन दिंग्या, अदिक ऊजुळ कोळोर साटी याण्णा;

³⁸ व्हान्ना अन वेदी, अदिक अभिषेक इन याण्णा; अदिक सुगन्धित धूप, अदिक तम्बु उन दरवाजा अन पळदा;

³⁹ पीतळ इन झंझरी, डण्डागोळ अदिक सप्पा सामान समेत पीतळ इन वेदी; अदिक पाया सांगुळ गंगार;

⁴⁰ खम्बागोळ अदिक कुर्चीगोळ समेत आंगुळ इन पळदागोळ, अदिक आंगुळ इन दरवाजा अन पळदा, अदिक डोरीगोळ, अदिक खुटागोळ, अदिक मिलाप इन तम्बु उन निवास इन स्यावा अन सप्पा सामान;

⁴¹ पवित्रस्थान दा स्यावा टहल माळोर साटी बेल बुटा काळुस्द कपळा, अदिक हारून याजक उन पवित्र कपळा, अदिक आऊन पारगोळ्द कपळा यवरी हाक्कु आंदरी याजक उन क्याल्सा माळोद ईरोद.

⁴² मतलब जो जो आग्या यहोवा मूसा अक कोटीदुन अऊर्दा अनुसार इस्त्राएलीगोळ सप्पा क्याल्सा माळदुर.

⁴³ आग मूसा सप्पा क्याल्सा अन निरीक्षण माळकु नोळदुन कि आंदुर यहोवा अन आग्या अन अनुसार सप्पा येनारा माळदुर. अदिक मूसा आंदरी आशीर्वाद कोट्टुन.