निर्गमन 31

¹ बाक यहोवा मूसा से अंदुन,

² “केळ, ना ऊरी इन पार बसलेल उक, जो हूर उन नातु अदिक यहूदा अन गोत्र नव हुन, हेसुर ताकोमकु कारूतीन.

³ अदिक ना आऊक परमेश्वर उन आत्मा देल जो बुद्धि, हुनर, ग्यान, अदिक हर प्रकार इन क्याल्सागोळ्द समझ कोळावाळा आत्मा हुन, परिपुर्ण माळतीन,

⁴ यदुर देल आव कारीगरी इन क्याल्सा बुद्धि देल तेगु तेगुकु हर प्रकार इन बनावट दा, मतलब व्हान्ना, बेळ्ली, अदिक पीतळा दा,

⁵ अदिक जळुसोर साटी मणि कळदुर दा, अदिक हुळ्ली मा नकाशा अन क्याल्सा माळुल.

⁶ अदिक केळ, ना दान इन गोत्रवाळेर अहीसामाक उन पार ओहोलीआब उक आऊन सांगुळ माळ बुळतीन; उलटा यास दिमागदार आर आ सप्पा मुंदुर दिल दा ना बुद्धि कोळतीन, यदुर देल यास वस्तुगोळ्द आग्या ना नीनी कोटीन आ सप्पा अक आंदुर बनुसुल;

⁷ मतलब मिलाप इन तम्बु, अदिक गवाही इन चिट्टी इन सन्दुक अदिक अदुर माकळोद प्रायश्चित इन झाकनी अदिक तम्बु उन सप्पा सामान,

⁸ अदिक सामान समेत मेज, अदिक सप्पा समान समेत शुद्ध व्हान्ना अन दीवट, अदिक धूपवेदी,

⁹ अदिक सप्पा सामान समेत होमबली वेदी, अदिक पाया समेत गंगार,

¹⁰ अदिक होलदव कपळा, अदिक हारून याजक उन याजकवाळा क्याल्सा नव पवित्र कपळा, अदिक आऊन पारगोळ्द कपळा,

¹¹ अदिक अभिषेक इन याण्णा, अदिक पवित्रस्थान इन साटी सुगन्धित धूप, अदिक ई सप्पा अक आंदुर आ सप्पा आग्यागोळ्द अनुसार बनुसुल जो ना नीनी कोटीन.”

¹² बाक यहोवा मूसा से अंदुन,

¹³ “नी इस्त्राएलीगोळ से ईद भी अनेत, ‘निश्चय नीव नान विश्राम दिनगोळी मान्सेतीर, यतिकी नीम पीढ़ोन पीढ़ी दा नान अदिक नीम लॉकुर न्याड्या ईद ऊंद चिन्ह ठहरूस्याद, यदुर देल नीव ईद मात याद ईटी कि यहोवा नाम पवित्र माळावाळा हुन.

¹⁴ ई कारण नीव विश्राम दिन इक मान्सेतीर, यतिकी आव नीम साटी पवित्र ठहरूस्यान; जो आऊक अपवित्र माळुल आव जरूर कोन्सुसकु आगुल: जो यावारा आ दिनगोळ दा येनारा क्याल्सा-कळी माळुल आ मंळसा तान लॉकुर न्याड्या दा टु नष्ट माळकु आगुल.

¹⁵ आर दिन रा क्याल्सा-कळी माळकु आगुल, लेकीन सातवा दिन परम विश्राम इन दिन अदिक यहोवा अन साटी पवित्र आद; इदुरसाटी जो यावारा विश्राम इन दिन दा येनारा क्याल्सा-कळी माळुल आव जरूर कोन्सुसकु आगुल.

¹⁶ इदुरसाटी इस्त्राएली विश्राम दिन इन मान्सतोगुल, उलटा पीढ़ोन पीढ़ी दा अदरी हमेशा अन वाचा अन विषय जान्सकु मानसुल.

¹⁷ अद नान अदिक इस्त्राएलीगोळ न्याड्या दा हमेशा ऊंद चिन्ह ईत्तीत, यतिकी आर दिन दा यहोवा आकाश अदिक धरती इक बनुसदुन, अदिक सातवा दिशी विश्राम माळकु तान जीव ठंडा माळदुन.’”

¹⁸ याग परमेश्वर मूसा से सीनै पहाळी मा हिंग मात माळ कोंडुन, आग आव आऊक तान बेळ्ल देल लिख्सद गवाही कोळावाळा कल्ल इन येढ्ढु तखतगोळ कोट्टुन.