निर्गमन 20

¹ आग परमेश्वर ई सप्पा वचन माताळदुन:

² “ना नीन परमेश्वर यहोवा हुईन, जो नीनी दासत्व अन मान्ना मतलब मिस्त्र द्याश दा टु तेगुकु तंदान.”

³ “नी नानी बिटकु दुसरा अक परमेश्वर मान्सबाळेत.”

⁴ “नी तान साटी यातोदु मुर्ति अगुळकु माळ बाळेत, ना यारदारा प्रतिमा बनुसेत, जो आकाश दा, या पृथ्वी मा, या पृथ्वी इन नीर दा आद.”

⁵ नी आंदरी दण्डवत माळबाळेत, अदिक ना आंदुर्द उपासना माळेत; यतिकी ना नीन परमेश्वर यहोवा जलन (ईर्ष्या) ईटावाळा परमेश्वर हुईन, अदिक जो नान से दुश्‍मनी ईटतार, आंदुर पारगोळ, नातु नतरागोळ, अदिक पळनातुगोळी भी पित्तरगोळ्द दण्ड कोळतोगतीन,

⁶ लेकीन जो नान से प्रेम ईटतार अदिक नान आग्यागोळी मान्सतार, आ हजारों पीढ़ीगोळ मा करूणा माळतोगतीन.

⁷ “नी तान परमेश्वर उन हेसुर व्यर्थ ताकोमबाळेत; यतिकी जो यहोवा अन हेसुर व्यर्थ ताकोंडान आव आऊक निर्दोष ठहरूसतीदील.”

⁸ “नी विश्राम दिन इक पवित्र मानसोर साटी याद ईटेत.

⁹ आर दिन रा नी मयनत माळकु तान सप्पा क्याल्सा-धंधा माळेत;

¹⁰ लेकीन सातवा दिशी नीन परमेश्वर यहोवा अन साटी विश्राम दिन आद. अदुर दा नी ना रा यातोदु प्रकार इन क्याल्सा-धंधा माळेत, अदिक ना नीन पार, ना नीन पोर, ना नीन दास, ना नीन दासगीत, ना नीन जनावर, ना यातोवारा परदेशी जो नीन फाटकगोळ्द अंदर ईरूल.

¹¹ यतिकी आर दिन दा यहोवा आकाश, अदिक पृथ्वी, अदिक समुद्र, अदिक जो येनारा अऊर दा आद, सप्पा अक बनुसदुन, अदिक सातवा दिशी विश्राम माळदुन; ई कारण देल यहोवा विश्राम दिन इक आशीष कोट्टुन अदिक अदरी पवित्र ठहरूसदुन.”

¹² “नी तान आप्प अदिक तान मोय इन आदर माळेत, यदुर देल जो द्याश नीन परमेश्वर यहोवा नीनी कोळतान अदुर दा नी हापाळ दिन ताका ईत्या.”

¹³ नी खुन माळबाळेत.

¹⁴ नी व्यभिचार माळबाळेत.

¹⁵ नी काळ्लपनी माळबाळेत.

¹⁶ नी यारदारा खिलाप ख्वाटा गवाही कोळबाळेत.

¹⁷ “नी यारदारा मान्नोद लालच माळबाळेत; ना रा यारदारा आर्त इन लालच माळेत, अदिक ना यारदारा दास-दासगीत या वस्त-वाळींद, ना यारदारा यातोदु वस्तु उन लालच माळेत.”

¹⁸ सप्पा लॉकुर गर्जन अदिक बिजली अदिक नरसिंगा अन शब्द केळ्त, अदिक धुंगा येळ्त पहाळ इक नोळतेला ईत्तुर, अदिक नोळकु, नळ्गतेला दुर निद्रेदुर;

¹⁹ अदिक आंदुर मूसा से अनली हतदुर, “नी ना नाम से मातगोळ हेळ, आग रा नाव केळ सक्केव; लेकीन परमेश्वर नाम से मात हेळबाळुल, हिंग आगबाळुल कि नाव सोतोदेव.”

²⁰ मूसा लॉकुर से अंदुन, “अंजबाळी; यतिकी परमेश्वर इदुरसाटी बंदान कि नीम परीक्षा माळुल, अदिक आऊन अंज्क नीम मन दा बन्सकु ईरूल कि नीव पाप माळतीदील.”

²¹ अदिक आ लॉकुर दुर अच निदुरकु ईत्तुर लेकीन मूसा आ घोर अंधार इन हात्ती होदुन यल परमेश्वर ईरोन.

²² आग यहोवा मूसा से अंदुन, “नी इस्त्राएलीगोळी नान ई वचन केळ्स: नीव लॉकुर खुद अच नोळीर कि ना नीम सांगुळ आकाश से मातगोळ हेळीन.

²³ नीव नान सांगुळ यारीकारा सम्मिलित माळबाळेतीर, मतलब तान साटी बेळ्ली या व्हान्ना देल देवतागोळी घळुसबाळेतीर.

²⁴ नान साटी मुण्ण इन ऊंद वेदी बनुसेतीर, अदिक तान भेड़-मर्रगोळ अदिक वस्ता-गोसीगोळ्द होमबली अदिक मेलबली इक अदुर मा येर्सेतीर; अदिक हर ऊंद जागा दा यल यल ना तान हेसुर इन याद माळसुसाईन अल अल ना बंदकु नीमी आशीष कोळाईन.

²⁵ अदिक अगर नीव नान साटी कल्लगोळ्द वेदी माळीर, रा तराशकु कल्लगोळ देल माळबाळेतीर; यतिकी यल नीव अदुर मा तान औजार हचदीर अल नीव अदरी अशुद्ध माळ बुट्टीर.

²⁶ अदिक नान वेदी मा सीळी देल यागलु येरबाळेतीर, ईलारा हिंग आगबाळुल कि नीन मय अदुर मा ऊगळा कांळ्सकु बिळुल.”