दानिय्येल 7

¹ बेबीलोन द्याश इन राजा बेलशस्सर उन राज्‍यकाल इन पयला वर्ष दा दानिएल ऊंद कांसा अदिक अनेक दर्शन नोळदुन याग आव हासक्या मा मिंगोन. आव कांसा अक लिख्स बुट्टुन अदिक कांसा अन्द सारांश हेळदुन.

² दानिएल अंदुन, “ना ईळ्लक इक ईद दर्शन नोळदीन. ना नोळदीन कि आकाश इन नाकु दिशागोळ टु आँधी महासागर मा बरेत्याद.

³ आग महासागर दा टु नाक धोळ-धोळ पशु होट्टव. ईव नाकु पशु आबुर-दाबुर से अलग ईरव.

⁴ पयला पशु हुल्ल इन घाई ईरोद, पर अदुर दा गरूड़ इन पंख हतकु ईरव. याग ना अदरी नोळीन आग अदुर पंख कितकु आदव. अदरी भूमी मा टु नेगुकु आगीत अदिक मंळसा अन्द घाई अदरी येढ्ढ कालगोळ मा नीदरूस्कु आत. आऊक मंळसा अन्द दिल कोटकु आत.”

⁵ दूसरा पशु भालु उन घाई ईरोद. अद हिंद इन कालगोळ बल मा नीदुरकु ईरोद. अदुर्द हल्लगोळ्द न्याड्या मुर पसलिगोळ ईरव. यावारा अनोर, “येळ अदिक हापाळ मांस तिन.”

⁶ “अदुर बाद्दा ना ऊंद अदिक पशु उक नोळदिन. अद चिता अन्द घाई ईरोद. लेकीन अदुर्द बेन मा पक्षिगोळ घाई नाक पंख ईरव. अदुर नाक ताल्ला ईरव. अदरी शासन माळोद अधिकार कोटकु आत.”

⁷ “इदुर बाद्दा ना ईळ्लक इन दर्शनगोळ दा चौथा पशु नोळदीन. अद नोळदुर दा भयानक, डरावना अदिक हापाळ धोळ्द ईरोद. अदुर बाय दा लोहा अन्द धोळ-धोळ हल्ल ईरव. अद सप्पा येनारा तिनोद अदिक तुकळा-तुकळा माळ बुळोद. जो अदुर्द बाय दा मिक्कोद, अदरी अद तान पंजागोळ देल मेट्ट बुळोद. अद पयलेवाळा मुरू पशुगोळ से अलग ईरोद. अदुर हत्त सींग ईरव.

⁸ ना अदुर सींगगोळ इक ध्यान देल नोळदीन. अदा समय आ सींगगोळ न्याड्या टु ऊंद मात सींग होळ्त, अदुर कारण मुर सींग जड़ टु कितदेव. ईद सींग स्यांणद ईरोद, अदिक इदुर दा मंळसा अन्द कण्णगोळ घाई कण्ण ईरव. इदुर दा बाय भी ईरोद, जो धोळ मातगोळ माताळोद.”

⁹ “ना दर्शन दा नोळदिन कि सिंहासन ईटकु आव, अदिक ऊंद प्राचीन युग-गंळ्स विराजमान आदुन. आऊन फळक्या बरफ इन घाई बिळीद ईरोद; अदिक ताल्ला अन्द चुट्टी शुद्ध चुट्टी इन घाई चमकदार ईरव. आऊन सिंहासन अग्निमय ईरोद; अदिक सिंहासन इन कालगोळ धधकुस्तेला ज्‍वालागोळ घाई.

¹⁰ आऊन मुंद टु अग्‍नि-ज्‍वाला होळोद, हजारों-हजार सेवक आऊन प्रशंसा माळोर; अदिक हजार-लाख लॉकुर आऊन मुंद कय-जोळ्सकु नीदुरकु ईरोर. न्‍याय माळोर साटी दरबार हतकु ईरोद; अदिक व्यवस्था अन ग्रंथ तेरूकु ईरव.”

¹¹ “याग अद सींग धोळ मात माताळोद, आग अदुर दण्ण देल नान ध्‍यान पशु उन दी होत. ना नोळदिन कि पशु उन वध माळ बुट्टुर. अदुर्द शरीर नष्‍ट माळ बुट्टुर, अदिक अदुर्द लाश बेक्की दा होताकोर साटी कोट्ट बुट्टुर.”

¹² मिक्कु पशुगोळ्द अधिकार ताकोमकु आत, लेकीन आंदुर जीव थ्वाळासा समय इन साटी ऊळ्सकु आत.

¹³ “ना ईळ्लक इन दर्शन दा ईद नोळदीन: आकाश इन मेघगोळ सांगुळ मंळसा अन्द पार उन घाई यावारा बरेत्यान. आव प्राचीन युग-गंळ्स उन हात्ती बंदुन, अदिक आऊन मुंद प्रस्‍तुत आदुन.”

¹⁴ आग प्राचीन युग-गंळ्स आऊक शासन इन अधिकार, महिमा अदिक राज्‍य प्रदान माळदुन ताकी पृथ्‍वी इन पुरा कौमगोळ, राष्ट्र अदिक अलग-अलग भाषागोळ माताळावाळेर लॉकुर आऊन स्यावा माळुल. आऊन शासन यागलु खतम आगावाळा शासन हुन; जो यागलु खतम आगतीदील; आऊन राज्‍य युगानुयुग अटल आद, अदुर्द यागलु नाश आगतीदील.

¹⁵ नान-दानिएल उन अन्‍त:करण चिंतित आगेत. मन दा नोळ्त ई दर्शनगोळ नान इक व्‍याकुल माळ बुट्टव.

¹⁶ अत: ना स्यावा माळावाळेर दा टु यावारा ऊंद मंळसा अन मुंद होदीन अदिक आऊन से ई दर्शनगोळ्द वास्‍तविकता अन्द बारा दा केळदिन. आव नान इक हेळदुन अदिक नान मा ई दर्शनगोळ्द मतलब प्रकट माळदुन.

¹⁷ आव अंदुन, “ईव नाक धोळ पशु नाक महान राजागोळ हुळ, जो पृथ्‍वी मा पैदा आदार.

¹⁸ लेकीन सर्वोच्‍च परमेश्‍वर उन पवित्र लॉकुर अच राज्‍य इक प्राप्‍त माळ्यार. आंदुर सदा-सर्वदा आ राज्‍य मा अधिकार माळ्यार, युगानुयुग ताका.”

¹⁹ “आग नान इच्छा आत कि ना चौथा पशु उन बारा दा आऊन से वास्‍तविक मात केळाईन. ईव पशु अन्य मुरू पशुगोळ से अलग ईरोद. अद नोळदुर दा बड़ा भयानक ईरोद. अदुर हल्ल लोहा अन्द अदिक नख पीतल इन ईरव. अद सप्पा येनारा तिनोद अदिक तुकळा-तुकळा माळ बुळोद. जो अदुर बाय दा मिक्कोद, अवरी अद तान पंजागोळ देल मेट्ट बुळोद.

²⁰ ना अदुर्द हत्त सिंगगोळ्द बारा दा भी केळदीन, जो अदुर्द ताल्ला मा ईरोद. ना अदुर से आ स्यांण सींगगोळ बारा दा भी केळदीन जो हत्त सींगगोळ न्याड्या होटीत, अदिक अदुर कारण मुर सींग बिदोगीदव, अदुर कण्णगोळ ईरव, अदिक अदुर दा धोळ मात माताळोद बाय ईरोद, अदिक अन्य संगी-सींगगोळ दा हापाळ धोळ भयानक प्रतीत आगोद.”

²¹ याग ना ई सींग मा नगर माळदीन, आग नान इक कांळ्सकु बिळ्त कि ई सींग परमेश्‍वर उन पवित्र लॉकुर से युद्ध छेळ्स बुटाद अदिक ईद आंदुर मा प्रबल आगेत.

²² यागासताका आव अति प्राचीन बरालुन, अदिक परमप्रधान इन पवित्र लॉकुर न्यायी न ठहरूसुल, अदिक आ पवित्र लॉकुर्द राज्यधिकारी आगोद समय बनकु पहुचुसाल्द.

²³ आव अंदुन, “आ चौथा पशु उन अर्थ, ऊंद चौथा राज्य आद, जो पृथ्वी मा आगकु अदिक सप्पा राज्यगोळ से अलग ईत्तीत, अदिक पृथ्वी इन नाश माळ्यान, अदिक तान पंजागोळ दल मेटकु चूर–चूर माळ्यान.

²⁴ अदुर्द हत्त सींगगोळ्द ईद मतलब आद: ई राज्‍य दा टु हत्त राजा पैदा आदार, अदिक अदुर बाद्दा ऊंद अदिक राजा पैदा आदान. आव तान पयले नोर राजागोळ से अलग ईत्तान, अदिक तान उदय देल मुर राजागोळ इक कोंद बुट्टान.

²⁵ ईव राजा सर्वोच्‍च परमेश्‍वर उन निन्‍दा माळ्यान, अदिक आऊन भक्‍तगोळ इक पिसुस बुट्टान. ईव निर्धारित हाब्‍ब इन समय इक अदिक व्यवस्था अक बदलुसोद प्रयत्‍न माळ्यान; सर्वोच्‍च परमेश्‍वर उन भक्‍त साढ़े मुर वर्ष ताका ईऊन कय दा सौप्सकु आदाव.

²⁶ आग सर्वोच्‍च परमेश्‍वर उन दरबार न्‍याय इन साटी कुरतीत; अदिक आ राजा अन्द कय देल आऊन राज्‍य-सत्ता कसुकु आदीत आऊन शासन पुरा तरीका देल नष्‍ट आगेदीत, आऊन पुरा अंत आगेदीत.

²⁷ राज्‍य अदिक शासन, पुरा आकाश इन ल्‍यालमा पृथ्‍वी इन सप्पा राज्‍यगोळ्द महानता, सर्वोच्‍च परमेश्‍वर उन पवित्र लॉकुर्द समूह अक कोटकु आदीत. आंदुर राज्‍य यागलु खतम ईला आगावाळा राज्‍य ईत्तीत; पृथ्‍वी इन सप्पा शासक आंदुर्द स्यावा माळ्यार आंदुर आऊन आग्या अन्द पालन माळ्यार.”

²⁸ दर्शन इन वास्‍तविक मतलब इन चर्चा ईल खतम आत. लेकीन यल ताका नान संबंध आद, नान विचारगोळ नान इक व्‍याकुल माळ बुट्टव. नान मार्रा अन्द रंग बदलुसेत. लेकीन ई मात ना तान मन दा अच ईटदीन, अदिक यारूकु हेळीदिल.