आमोस 7

¹ परमेश्वर यहोवा नानी ईद तोर्सदुन: अदिक ना येन नोळतीन कि आव हिंदळा काड्डा अन ऊगुसोद सुरवात दा हत्तीफाफा पैदा माळदुन; अदिक अद राजा अन फसल कटनी इन बाद्दा अन हिंदळा काड्डा ईरोद.

² याग अव सप्पा काड्डा तिन कोंडव, आग ना अंदीन, “हे परमेश्वर यहोवा, माफ माळ! ईलारा याकूब ह्यांग संची ईर सक्यान? आव याट कमजोर आन!”

³ ईदुर बारा दा यहोवा तान मन बदलुसदुन, अदिक अंदुन, “ईत्ता मात ईग आगतीदील.”

⁴ परमेश्वर यहोवा नानी ईद तोर्सदुन: अदिक येन नोळतीन कि परमेश्वर यहोवा बेक्की इन द्वारा मुकदमा लळुसली कारदुन, अदिक आ बेक्की देल महासागर वंळ्गेत, अदिक जमीन भी भस्म आगली हत्तेगीत.

⁵ आग ना अंदीन, “हे परमेश्वर यहोवा, ऊंजाईर! ईलारा याकूब ह्यांग संची ईर सक्यान? आव ह्यांग कमजोर आन.”

⁶ ईदुर बारा दा भी यहोवा पछतासदुन; अदिक परमेश्वर यहोवा अंदुन, “ईत्ता मात बाक यागलु आगतीदील.”

⁷ आव नानी ईद भी तोर्सदुन: ना नोळदीन कि प्रभु गोला हचकु बनुस्द यातारा दिवाल मा निदुरकु आन, अदिक आऊन कय दा गोला आद.

⁸ यहोवा नान से अंदुन, “हे आमोस, नीनी येन कांळ्सकु बिळतद?” ना अंदीन, “ऊंद गोला.” आग परमेश्वर अंदुन, “नोळ, ना तान प्रजा इस्त्राएल इन बीच दा गोला हचाईन. ना ईग आंदरी बिळतीदील.

⁹ इसहाक उन धोळ जागागोळ नाश माळाईन, अदिक इस्त्राएल इन पवित्रस्थान सुनसान आगेदव, अदिक ना यारोबाम उन घराना मा तलवार जेडुतेला चढ़ाई माळाईन.”

¹⁰ आग बेतेल इन याजक अमस्याह इस्त्राएल इन राजा यारोबाम उन हात्ती बातणी कळुदुन, “आमोस इस्त्राएल इन घराना अन बीच दा नीन से साजीस इन योजना माळ्यान; आऊन सप्पा वचनगोळी द्याश सहन माळ सकाल.

¹¹ यतिकी आमोस ईद अनतान, ‘यारोबाम तलवार देल कोंदकु आदान, अदिक इस्राएल तान द्याश टु बन्दी माळकु तेगुकु आदार.’”

¹² आग अमस्याह आमोस से अंदुन, “हे दर्शन नोळावाळा, ईल टु होटकु यहूदा द्याश दा ओळेग, अदिक अल्या रोट्टी तिनतोग, अदिक अल्या भविष्यवाणी माळतोग;

¹³ लेकीन बेतेल दा मात्त यागलु भविष्यवाणी माळबाळेत, यतिकी ईद राजा अन पवित्रस्थान अदिक राज नगर हुन.”

¹⁴ आमोस उत्तर कोटकु अमस्याह से अंदुन, “ना न रा भविष्यवक्ता ईरीन, अदिक न भविष्यवक्ता अन पार; ना रा जनावरगोळी आळसावाळा, अदिक उम्बर इन मार्रगोळी छाट्सावाळा ईरीन,

¹⁵ अदिक यहोवा नानी म्यांडा मर्रीगोळ्द हींद हींद वयाळदुर देल कारूकु अंदुन, ‘होग, नान प्रजा इस्राएल से भविष्यवाणी माळ.’

¹⁶ इदुरसाटी ईग नी यहोवा अन वचन केळ, नी अनत्या, ‘इस्राएल इन खिलाप भविष्यवाणी माळबाळ; अदिक इसहाक उन घराना अन खिलाप घळी घळी वचन केळ्सबाळ.’

¹⁷ ई कारण यहोवा ईद अनतान: ‘नीन आर्त नगर दा वेश्या आगेदार, अदिक नीन पार पोरगोळ तलवार देल कोंदकु आदार, अदिक नीन जमीन दॉरा हाक्कु वाट्सकु आदीत; अदिक नी खुद अशुद्ध द्याश दा सोत्या, अदिक इस्राएल तान द्याश टु बन्दी माळकु तेगुकु आदार.’”