आमोस 3

¹ हे इस्त्राएलीगोळा, ईद वचन केळी जो यहोवा नीम बारा दा मतलब आ सप्पा कुल इन बारा दा अंदान यदरी ना मिस्त्र द्याश टु तंदीन.

² “धरती इन सप्पा कुलगोळ दा टु ना सिर्फ नीम मा का मन हचीन. ई कारण ना नीम सप्पा अपराधगोळ्द दण्ड कोळाईन.”

³ “अगर येढ्ढ मंळसा आबुर दाबुर सांगुळ सहमत हैलेच; रा येन आंदुर ऊंद सांगुळ नळु सक्यार?

⁴ येन हुल्ल बिना शिकार इन आळी दा डकरूसित? येन हारोद हुल्ल बिना येनारा हुडुकु तान गुफा दा टु गुर्रासीत?

⁵ येन पक्षी बिना फंदा हचकु फसुसीत? येन बिना येनारा फसुसकु फंदा जमीन मा ऊचकुसित?

⁶ येन यातारा नगर दा नरसिंगा ऊयदुर मा लॉकुर नळ्गतीदील? येन यहोवा अन बिना कळुद यातारा नगर दा येनारा विपत्ति बिद्दीत?

⁷ ईदा प्रकार देल प्रभु यहोवा तान दास भविष्यवक्तागोळ मा तान भेद बिना प्रगट माळ्द येनु उच ईला माळ्यान.

⁸ हुल्ल डकरूस्त; याव अंजतीदील? परमेश्वर यहोवा अंदुन, याव आन जो भविष्यवाणी माळतीदील?”

⁹ अश्दोद इन गढ़ अदिक मिस्त्र द्याश इन गढ़ मा प्रचार माळकु अनी: “सामरिया पहाळीगोळ मा जमा आगकु नोळी कि अदुर दा येन अच धोळ्द हल्ला अदिक अदुर न्याड्या येन अच अत्याचार इन क्याल्सा आगेत्याव!”

¹⁰ यहोवा अन ईद वाणी आद, “जो लॉकुर तान गढ़गोळ दा उपद्रव अदिक डकैती इन धन जमा माळकु ईटतार, आंदुर सरका क्याल्सा माळोद जान्सालुर अच.”

¹¹ ई कारण परमेश्वर यहोवा ईद अनतान: “द्याश इन घेर्सावाळा दुश्मन आदान, अदिक आव नीन ताकत मुरदान, अदिक नीन गढ़ लुट्सकु आदव.”

¹² यहोवा ईद अनतान: “याता प्रकार देल चरवाहा हुल्ली इन बाय दा टु येढ्ढ कालगोळ या किव इन ऊंद तुकळा बिळ्सतान, हांगा इस्राएली लॉकुर, जो सामरिया दा हासक्या अन ऊंद क्वाना या रेशमी गद्दी मा कुर्तकु ईरतार, आंदुर भी बिळ्सकु आदार.”

¹³ सेनागोळव परमेश्वर, प्रभु यहोवा अन ईद वाणी आद, “नोळी, अदिक याकूब उन घराना से खिलाप गवाही कोळी;

¹⁴ याता समय ना इस्राएली अदुर अपराधगोळ्द दण्ड कोळाईन, अदा समय ना बेतेल इन वेदीगोळी भी दण्ड कोळाईन, अदिक वेदी इन सींग मुर्दकु जमीन मा बिदोदाव.”

¹⁵ ना ठंडी इन गढ़ इक अदिक बिसुल माळग्या अन गढ़, येढ्ढु उक केडाईन; अदिक हत्तीहल्ल इन बनुस्द गढ़ भी नष्ट आदाव, अदिक धोड्डेव धोड्डेव मान्ना नष्ट आगेदव. यहोवा अन ईदा वाणी आद.