आमोस 1

¹ तकोआवासी आमोस जो म्यांडा-मर्रीगोळ्द आळसावाळेर दा टु ईरोन, आऊन ई वचन हुव जो आव यहूदा अन राजा उजिय्याह अन, अदिक योआश उन पार इस्त्राएल इन राजा यारोबाम उन दिनगोळ दा, भूकम्प से येढ्‌ढ साल पयले, इस्त्राएल इन बारा दा दर्शन नोळकु अंदुन:

² “यहोवा सिय्योन टु गरजुस्यान, अदिक यरूशलेम टु तान शब्द केळस्यान; आग चरवाहगोळ्द चराईगोळ विलाप माळ्याव, अदिक कर्मेल पहाळी इन चोटीगोळ झुलसुसेदाव.”

³ यहोवा ईद अनतान: “दमिश्क इन मुर येन, उलटा नाक अपराधगोळ कारण ना आऊन दण्ड बिळतीदील; यतिकी आंदुर गिलाद इक लोहा अन हल्लगोळ देल मेट बुटार.

⁴ इदुरसाटी ना हजाएल इन गढ़ दा बेक्की हचाईन, अदिक अदुर देल बेन्हदद इन गढ़ भी भस्म आगेदव.

⁵ ना दमिश्क इन प्रवेश द्वारगोळी मुर्द बुळाईन, अदिक आवेन हेसुर इन तराई इन ईरावाळेरी अदिक बेतएदेन इन मान्या ईरावाळेर राजदण्डधारी इक नष्ट माळाईन; अदिक अराम इन लॉकुर बन्दी आगकु कीर नगर इक होदार, यहोवा अन ईदा वचन आद.”

⁶ यहोवा ईद अनतान: गाजा अन घळी घळी अपराध माळोद कारण ना आऊन दण्ड बिळतीदील; यतिकी आंदुर सप्पा लॉकुरी बन्दी माळकु ओतुर कि आंदरी एदोम उन वश दा माळ बुळुल.

⁷ इदुरसाटी ना गाजा अन दिवाल दा बेक्की हचाईन अदिक अदुर देल आऊन भवन भस्म आगेदव.

⁸ ना अश्दोद इन ईरावाळेरी अदिक अश्कलोन इन राजदण्डधारी इक नष्ट माळाईन; ना तान कय एक्रोन उन खिलाप नळसाईन, अदिक मिग्द पलिश्ती लॉकुर नष्ट आदार, परमेश्वर यहोवा अन ईदा वचन आद.

⁹ यहोवा ईद अनतान: “सोर इन घळी घळी अपराध माळोद कारण ना आऊन दण्ड बिळतीदील; यतिकी आंदुर सप्पा लॉकुरी बन्दी माळकु एदोम उन वश दा माळ बुट्टुर अदिक वार्ट उन सांगुळ माळ्द वाचा अक याद माळीदील.

¹⁰ इदुरसाटी ना सोर इन दिवाल मा बेक्की हचाईन, अदिक अदुर देल आऊन भवन भी भस्म आगेदव.”

¹¹ यहोवा ईद अनतान: “एदोम इन घळी घळी अपराध माळोद कारण ना आऊन दण्ड बिळतीदील; यतिकी आव तान वार्ट उक तलवार हुडुकु तुकाळ्सदुन अदिक येनु उच दया माळीदील, लेकीन सिट्ट देल आंदरी हमेशा हरूतेला अच ईत्तुन, अदिक तान रोष इक अनन्त काल ताका बनुस्कु ईत्तुन.

¹² इदुरसाटी ना तेमान शहर दा बेक्की हचाईन, अदिक अदुर देल बोस्रा अन गढ़ भस्म आगेदव.”

¹³ यहोवा ईद अनतान: “अम्मोन उन घळी घळी अपराध माळोद कारण ना आऊन दण्ड बिळतीदील यतिकी आंदुर तान सीमा अक वाळुसोर साटी गिलाद क्षेत्र अन आर्तेर जो व्हाट्टा दी ईरोर आंदुर व्हाट्टा सिळ बुट्टर.

¹⁴ इदुरसाटी ना रब्बा अन शहर इन दिवार दा बेक्की हचाईन, अदिक अदुर देल आऊन गढ़ भी भस्म आगेदव. आ लळाई इन दिशी ललकार आदीत, अद आंधी उलटा माट्या अन दिन ईत्तीत;

¹⁵ अदिक आंदुर राजा तान अधिकारीगोळ समेत गुलामी दा होदान,” यहोवा अन ईदा वचन आद.