प्रेरितगोळ 4

¹ याग पतरस अदिक यूहन्ना लॉकुर से ईद अनोर, रा याजक अदिक मंदिर इन रखवाली माळावाळेर्द शासक अदिक सदूकी आंदुर मा येरकु बंदुर.

² यतिकी आंदुर हापाळ सिट्टी बंदुर कि पतरस अदिक यूहन्ना लॉकुरी उपदेश कोळतेला यीशु उन सोत्‍तुर दा टु जित्‍ता आगोद द्वारा अदिक यीशु उन उदाहरण कोट कोटकु सोत्‍तुर दा टु जीत्‍ता आगोद प्रचार माळतोगोर.

³ आंदुर आंदरी हुडुकु दुसरा दिन ताका जयल दा ईटदुर यतिकी द्याव मुळकेगित.

⁴ लेकीन वचन इक केळावाळेर दा टु हापाळ मुंदुर विश्वास माळदुर, अदिक आंदुर गिनती अईद हजार मंळसागोळ्द हात्‍तीपास आगेत.

⁵ दुसरा दिशी यरूशलेम दा यहूदी अधिकारीगोळ अदिक स्याणा लॉकुर अदिक न्यायशास्त्र अन्द गुरुगोळ,

⁶ अदिक महायाजक हन्ना अदिक कैफा अदिक यूहन्ना अदिक सिकन्दर अदिक यास महायाजक इन घराना नोर ईरोर, सप्पा यरूशलेम दा जमा आदुर.

⁷ आंदुर पतरस अदिक यूहन्ना अक न्याड्या निदरूसकु केळली कुरतुर कि “नीव ईद क्याल्सा याता सामर्थ्य देल अदिक याता हेसुर देल माळीर.”

⁸ आग पतरस पवित्र आत्मा देल परिपुर्ण आगकु आंदुर से अंदुन, “हे लॉकुर्दव अधिकारी अदिक स्याणा लॉकुरा.

⁹ ई लंगळा मंळसा अन्द सांगुळ जो भलाई माळकु आग्याद, अगर ईंद नाम से आऊन बारा दा केळकु आगतद, कि आव ह्यांग वळ्लेव आदुन.

¹⁰ रा नीव सप्पा अदिक पुरा इस्त्राएली लॉकुर जान्स कोमी कि यीशु मसीह नासरी इन हेसुर दा जो सामर्थ्य आद अदुर द्वारा ई लंगळा मंळसा नीम मुंद भला चंगा निदुरकु आन, या यीशु अक नीव क्रूस मा येर्सदिर, अदिक परमेश्वर सोत्‍तुर दा टु जित्‍ता माळदुन.

¹¹ शास्त्र दा लिख्सकु आद, ईव यीशु अदा कल्ल हुन यारी नीव राजमिस्त्रीगोळ बेकार मान्सदिर अदिक आव हापाळ महत्वपुर्ण कल्ल आगेदुन.

¹² यावारा दुसरा अन्द द्वारा उद्धार ईला; यतिकी स्वर्ग इन ल्यालमा मंळसागोळ दा अदिक यातोदु दुसरा हेसुर कोटकु आगीदील, यार्द द्वारा नामी उद्धार सिकुल.”

¹³ याग आंदुर पतरस अदिक यूहन्ना अन्द हिम्मत नोळदुर, अदिक ईद अरतुर कि इंदुर अनपढ़ अदिक साधारण मंळसा आर, रा आश्चर्य माळदुर; बाक आंदरी अरतुर, कि इंदुर यीशु उन सांगुळ ईतार.

¹⁴ आ लंगळा मंळसा अक जो वळ्लेव आगीदुन, पतरस अदिक यूहन्ना अन्द सांगुळ निदुर्त नोळकु, आंदुर विरोध दा येनु अन सकिदील.

¹⁵ लेकीन आंदरी सभा अन्द व्हार्या होगोद आग्या कोटकु, आंदुर तांदुर दा विचार माळली कुरतुर,

¹⁶ अदिक अनली कुरतुर, “नाव ई मंळसागोळ सांगुळ येन माळेव? यतिकी यरूशलेम इन सप्पा ईरावाळेर मा प्रगट आद, कि इंदुर द्वारा ऊंद प्रसिद्ध चमत्कार तोर्सकु आग्याद, अदिक नाव अदुर्द इनकार माळ सकालेव.

¹⁷ इदुरसाटी कि ई मात लॉकुर दा मात्‍त यक्कुल फैलुस बाळुल, नाव आंदरी धमकुसेव, कि आंदुर यीशु उन हेसुर देल बाक यातोदु मंळसा से मातगोळी हेळतीदील.”

¹⁸ आग आंदुर पतरस अदिक यूहन्ना अक कारदुर अदिक चेतावनी कोटकु ईद अंदुर, “यीशु उन हेसुर देल येनु अच माताळ बाळेतीर अदिक कल्स बाळेतीर.”

¹⁹ लेकीन पतरस अदिक यूहन्ना आंदरी उत्‍तर कोट्टुर, “नीवा न्याय माळी; येन ईद परमेश्वर उन नजर दा भला आद कि नाव परमेश्वर उन मात से यक्कुल नीम मात केळेव.

²⁰ यतिकी ईद रा नाम से आगसकाल कि जो नाव नोळेव अदिक केळेव, अद अनतीदिल.”

²¹ आग आंदुर आंदरी मात्‍त यक्कुल धमकी कोटकु बिट बुटुर, यतिकी आंदरी समझ दा बंदिदील कि आंदरी ह्यांग दण्ड कोट्टेव, यतिकी जो घटना आगीत अदुर कारण सप्पा लॉकुर परमेश्वर उन बळाई माळतोगोर.

²² आ लंगळा मंळसा, यार मा ईद चंगाई इन चमत्कार तोर्सकु आगीत, चालीस साल से यक्कुल उमर ईनव ईरोन.

²³ पतरस अदिक यूहन्ना बिटकु तान संगीगोळ हात्‍ती बंदुर, अदिक जो येनारा प्रधान याजकगोळ अदिक स्याणा लॉकुर आंदुर से अंदीदुर, आंदरी केळ्स बुटुर.

²⁴ ईद केळकु विश्वासीगोळ ऊंद मन आगकु धोळ्द आवाज देल परमेश्वर से अंदुर, हे स्वामी, नी आवा हुय याव स्वर्ग अदिक पृथ्वी अदिक समुद्र अदिक जो येनारा अऊर्दा आद माळ्या.

²⁵ नी पवित्र आत्मा अन द्वारा तान सेवक नाम पुर्वज दाऊद उन बाय देल अंद, गैरयहूदीगोळ हल्ला येती मचुसदुर? अदिक द्याश-द्याश इन लॉकुर येती बिना मतलब इन मातगोळ्द विचार माळदुर?

²⁶ प्रभु अदिक आऊन मसीह अन्द विरोध दा पृथ्वी इन राजा निदुरदुर, अदिक अधिकारीगोळ ऊंद सांगुळ जमा आगेदुर.

²⁷ यतिकी खराखुरा नीन पवित्र सेवक यीशु उन खिलाप दा, यार्द नी अभिषेक माळ्द, हेरोदेस अदिक पुन्तियुस पिलातुस भी गैरयहूदीगोळ अदिक इस्त्राएलीगोळ सांगुळ ई नगर दा जमा आदुर,

²⁸ आंदुर जमा आदुर यतिकी नीन ताकत अदिक इच्छा अन अनुसार जो येनारा पयले अच निश्चित आगेगीत अद पुरा आगुल.

²⁹ ईग हे प्रभु, आंदुर धमकीगोळी नोळ; अदिक तान दासगोळी ईद इजाजत कोळ कि नीन वचन हापाळ हिम्मत देल केळसुल.

³⁰ चंगा माळोर साटी नी तान कय मुंद माळ कि चमत्कार अदिक अदभुत क्याल्सा नीन पवित्र सेवक यीशु उन हेसुर देल माळकु आगुल.

³¹ याग आंदुर प्रार्थना माळ कोंडुर, रा अद जागा यल आंदुर जमा ईरोर हालुसेत, अदिक आंदुर सप्पा मुंदुर पवित्र आत्मा देल परिपुर्ण आगेदुर, अदिक परमेश्वर उन वचन हिम्मत देल केळ्सतेला ईत्‍तुर.

³² विश्वास कळावार्ळेद मंडली ऊंद चित्त अदिक ऊंद मन इन ईरोद, ईल ताका कि यावारा भी तान धन सम्पत्ति तान ईला अनतोगोन, लेकीन सप्पा येनारा गुट दा ईरोद.

³³ प्रेरित बळा सामर्थ्य देल प्रभु यीशु उन जित्‍ता आगोद गवाही कोळ्त ईत्‍तुर अदिक आ सप्पा मुंदुर मा हापाळ अनुग्रह ईरोद.

³⁴ आंदुर दा याऊ भी गरीब बेळावाळा ईला ईरोन; यतिकी यार्द हात्‍ती जागा अदिक मान्नागोळ ईरव, आंदुर अवरी मार-मोटकु, मार्द वस्तुगोळ्द दाम तरोर,

³⁵ अदिक अवरी प्रेरितगोळ्द कालगोळ मा ईटतोगोर; अदिक ह्यांग यारी जरवत ईरतोगोद, अदुर अनुसार हर ऊंद मंळसा अक कोट बुळतोगोर.

³⁶ यूसुफ हेसुर ईनव साइप्रस नगर इन ऊंद लेवी ईरोन यार्द हेसुर प्रेरितगोळ बरनबास मतलब हिम्मत कोळावाळा ईटीदुर.

³⁷ आऊन थ्वाळासा जागा जमीन ईरोद, यदरी आव मारदुन, अदिक दाम इन पैस्या तनकु प्रेरितगोळ्द कालगोळ मा ईट बुटुन.