२ यूहन्ना 1

¹ नानी स्याणा दी टु आ निवळुस्द आर्तेर अदिक आंदुर्द चिकोरगोळव हेसुर, यार से ना खरा प्यार ईटतीन, अदिक सिर्फ ना अच ईला उलटा आंदुर सप्पा मुंदुर भी प्यार ईटतार जो सच्चाई इक अरूतार;

² अद सच्चाई जो नाम दा स्थिर ईरतद, अदिक हमेशा नाम सांगुळ अटल ईत्‍तीत;

³ परमेश्वर आप्प, अदिक आप्प उन पार यीशु मसीह दी टु अनुग्रह अदिक दया अदिक शांती, सच्चाई अदिक प्यार इन सांगुळ नाम सांगुळ ईत्‍ताव.

⁴ ना हापाळ खुश आदीन कि ना नीन थ्वाळासा चिकोर इक आ आग्या अन्द अनुसार, जो नामी आप्प उन दी टु सिकीत, सच्चाई मा नळुतेला सिक्त.

⁵ ईग हे आर्त, ना नीनी ईग यातोदु व्हाशोद आग्या ईला, लेकीन अदा जो पयले टु नाम हात्‍ती आद, लिख्सतीन; अदिक नीन से विनती माळतीन कि नाव आबुर दाबुर से प्यार ईट्टेव.

⁶ अदिक प्यार ईद हुन कि नाव आऊन आग्या अन्द अनुसार नळदेव; ईद अदा आग्या हुन जो नीव पयले टु केळीर, अदिक नीमी इदुर मा नळुली भी पायजे.

⁷ यतिकी हापाळ सा हिंग बैकुसावाळेर दुनिया दा होटकु बंदार, जो ईद मान्सालुर कि यीशु मसीह मय दा टु होटकु बंदान; बैकुसावाळा अदिक मसीह-विरोध माळावाळा ईवा हुन.

⁸ तान बारा दा सावधान ईरी, कि जो मयनत नाव माळेव अद नीम से काळुबाळुल, उलटा अदुर सप्पा प्रतिफल नीव ताकोमी.

⁹ जो यावारा मसीह अन्द शिक्षा देल मुंद वाळुसेगतान अदिक अदुर दा बन्सकु ईरालुन, आऊन हात्‍ती परमेश्वर हैलेच; जो यावारा आऊन शिक्षा दा स्थिर ईरतान, आऊन हात्‍ती आप्प भी आन अदिक पार भी.

¹⁰ अगर यावारा नीम हात्‍ती बरतान अदिक ईदा शिक्षा कोळालुन, आऊक ना रा मान्या बरगोळी अदिक ना नमस्कार माळी.

¹¹ यतिकी जो यावारा ईत्‍ता मंळसा अक नमस्कार माळतान, आव आऊन बुरा क्याल्सागोळ दा सहभागी आगतान.

¹² नानी हापाळ सा मातगोळ नीमी लिख्सव आव, लेकीन कागद अदिक स्याही देल लिखसोद चाहासालीन, लेकीन आशा आद कि ना नीम हात्‍ती बराईन अदिक आमने-सामने मातकात हेळाईन, यदुर देल नीम खुशी पुरा आगुल.

¹³ नीन निवळुस्द आकतींग इन चिकोर नीनी नमस्कार अनतार.