१ तीमुथियुस 3

¹ ईद मात सही आद अगर यावारा तान मन दा सोचतान कि स्याण्णा आगोद चाहासतान, आव भला क्याल्सा अन इच्छा माळतान.

² ईद जरूरी आद कि स्याण्णा निर्दोष, अदिक ऊंदा हिंग्स उन गंळ्स, शालीन, आत्मसंयमी, आदरणीय, अतिथी-सत्कार माळावाळा, अदिक कलसोर दा निपुण ईरूल.

³ कुडावाळा या बडाबडी माळावाळा ईला ईरूल; बल्‍की मुलायम ईरूल, अदिक ना झगळेलु, अदिक ना धन इन लालची ईरूल.

⁴ तान मान्ना अन वळ्लीद व्यवस्था माळुल, अदिक तान चिकोर चिंळ्गेर अनुशासन दा ईटकु आंदुर से आदर ताकोमावाळा ईरूल.

⁵ अगर यावारा तान मान्ना अन्द अच व्यवस्था माळोद ईला जान्सतीदान, रा परमेश्वर उन मंडली इन रखवाली ह्यांग माळ्यान?

⁶ बाक ईद कि आव विश्वास दा परीपक्व ईरूल, ईदारा हिंग आगबाळुल कि अभिमान माळकु शैतान उन घाई दण्ड पाऊसुल.

⁷ अदिक मंडली इन व्हार्या दा भी आऊन हेसुर आगुल, हिंग आगबाळुल कि अपमानीत आगकु शैतान उन फासा दा फसुसेगुल.

⁸ हांग अच मंडली अन्द सेवकगोळी भी गंभीर आग पायजे, येढ्ढ रंगवाळेर, कुडावाळेर अदिक नीच कमाई इन लोभ माळावाळेर ईला ईरूल;

⁹ लेकीन विश्वास इन भेद इन शुद्ध विवेक इक गहराई देल हुडुकु ईटुल.

¹⁰ अदिक आंदुर पयले परख आगुल, आग अगर निर्दोष होट्टुर रा बाक मंडली इन सेवक उन क्याल्सा माळुल.

¹¹ ईदा प्रकार देल आंदुर हिंग्सुर भी आदर ताकोमा लायक आर्तेर ईरूल; अदिक अपमान इन मातगोळी माळावळतेर ईला ईरूल, लेकीन शालीन अदिक सप्पा मातगोळ दा विश्वास इन लायक ईरूल.

¹² मंडली इन सेवक ऊंदा हिंग्स उन गंळ्स ईरूल अदिक चिकोर चिण्ग अदिक तान मान्ना अन्द वळ्लीद व्यवस्था माळोद जानसुल.

¹³ यतिकी जो मंडली इन सेवक वळ्लीद क्याल्सा माळतार, आंदुर तान साटी वळ्लीद पद अदिक मसीह यीशु दा जो आंदुर्द विश्वास आद, अदुर्दा महान साहस हासिल माळतार.

¹⁴ ना नीन हात्‍ती राटनेरी बरोद आशा ईटदुर मा भी ई चिट्ठी नीनी इदुरसाटी लिख्सतीन,

¹⁵ कि अगर नान बंदुर दा समय आगुल, रा नी जान्स कोम कि परमेश्वर उन घराना दा जो जित्‍ता परमेश्वर उन मंडली आद अदिक जो सच्चाई इन खंबा अदिक पायवा आद, लॉकुर आपस दा ह्यांग बर्ताव माळ पायजे.

¹⁶ ईदुर दा संदेह हैलेच कि भक्ति इन भेद गंभीर आद, मतलब अद जो मय दा प्रगट आत, आत्मा दा न्यायी ठहरूस्त, स्वर्गदूतगोळ इक कांळ्सदुन, गैरयहूदीगोळ दा आऊन प्रचार आत, दुनिया दा आऊन मा विश्वास माळकु आत, अदिक महिमा दा म्याकुच नेगुकु आदुन.