१ यूहन्ना 1

¹ आ जीवन इन वचन इन बारा दा जो पयले टु ईरोद. यदरी नाव केळेव, अदिक यदरी तान कण्णगोळ देल नोळदेव, उलटा यदरी नाव ध्यान देल नोळदेव अदिक कयगोळ देल मुटदेव.

² ईद जीवन प्रगट आत्‍त, अदिक नाव आऊक नोळदेव, अदिक आऊन गवाही कोळतेव, अदिक नीमी आ अनन्त जीवन इन समाचार कोळतेव जो आप्प उन सांगुळ ईरोन अदिक नाम मा प्रगट आदुन.

³ जो येनारा नाव नोळेव अदिक केळेव अदुर्द समाचार नीमी भी कोळतेव, इदुरसाटी कि नीव भी नाम सांगुळ सहभागी आगी; अदिक नाम्द ईद सहभागीता आप्प उन सांगुळ अदिक आऊन पार यीशु मसीह अन सांगुळ आद.

⁴ अदिक ई मातगोळ नाव इदुरसाटी लिख्सतेव कि नाम्द खुशी पुरा आगेगुल.

⁵ जो समाचार नाव आऊन से केळेव अदिक नीमी केळ्सतेव, अद ईद हुन कि परमेश्वर प्रकाश हुन अदिक आऊन दा येनु उच अंधकार हैलेच.

⁶ अगर नाव अंदेव कि आऊन सांगुळ नाम्द सहभागीता आद अदिक मात्‍त पाप दा नळदेव, रा नाव ख्वाटा आयेव अदिक सच्चाई मा नळालेव;

⁷ लेकीन अगर ह्यांग आव प्रकाश दा आन, हांग अच नाव भी प्रकाश दा नळदेव, रा आबुर दाबुर से सहभागीता ईटतेव, अदिक आऊन पार यीशु उन रक्ता नामी सप्पा पापगोळ देल शुद्ध माळतद.

⁸ अगर नाव अंदेव कि नाम दा येनु भी पाप ईल्लच, रा तान तान इक ध्वाका कोळतेव, अदिक नाम दा सच्चाई ईल्लच.

⁹ अगर नाव तान पापगोळी मान्स कोंडेव, रा परमेश्वर नामव पापगोळ इक माफ माळोद अदिक नामी सप्पा पापगोळ देल शुद्ध माळदुर दा विश्वासलायक अदिक न्यायी आन.

¹⁰ अगर नाव अंदेव कि नाव येनु पाप माळीदिल, रा परमेश्वर उक ख्वाटा ठहरूसतेव, अदिक आऊन वचन नाम दा हैलेच.