१ कुरिन्थि 9

¹ येन ना आजाद हैलेच? येन ना भी प्रेरित आल्लच? येन ना यीशु उक जो नामव प्रभु हुन, नोळीदील? येन नीव प्रभु दा नांद मेहनत इन प्रतिफल आल्लच.

² अगर ना दुसरा अन्द साटी प्रेरित आल्लच, तरी भी नीम साटी रा हुईन; यतिकी ना परमेश्वर उन क्याल्सा माळदीन, नीम प्रभु दा एकता अच नान प्रेरित आगोद प्रमाण आद.

³ जो नानी जाँच तार, आंदुर साटी ईदा नांद उत्‍तर आद.

⁴ येन नामी कमाई माळकु तिनोद कुडोद अधिकार ईलच?

⁵ येन नामी ईद अधिकार ईलच, कि यातारा मसीह आकतींग इन सांगुळ मदा माळकु आक इक हुळकु टेटेव, ह्यांग दुसरा प्रेरित अदिक प्रभु उन वार्ट अदिक कैफा माळतार?

⁶ या सिर्फ नानी अदिक बरनबास उक अच कमाई माळकु तिनोद अधिकार ईलच.

⁷ हिंग याव आन जो तांद अच खर्च मा सेना दा स्यावा माळतान? याव आन जो अंगुर इन केई हचकु अदुर्द काय तिनालुन? हिंग याव आन जो म्यांडागोळ्द रखवाली माळकु अऊर्द हाल कुडालुन?

⁸ येन ना ईव मातगोळ मंळसागोळ्द अच रीति मा अनतीन? यतिकी व्यवस्था अन्द किताब दा ईदा मात लिख्सकु आद.

⁹ येन व्यवस्था ईद अनाल्द? यतिकी मूसा अन्द व्यवस्था दा लिख्सकु आद, “दावन दा नळुतेला वस्ता अन्द बाय कट बाळेतीर.” येन परमेश्वर वस्तागोळ्द अच चिन्ता माळतान?

¹⁰ या विशेष माळकु नाम साटी अनतान. हा नाम साटी अच लिख्सकु आग्याद, यतिकी उचित आद कि नांगर नळसावाळा आशा देल केई नळसुल, अदिक दावन कोळावाळा फसल सिक्‍कोद आशा देल दावनी माळुल.

¹¹ याग नाव नीम्द साटी आत्मिक मातगोळ बोऊसदेव, अदिक अगर नाव आ शारीरिक वस्तुगोळ्द फसल कडुतेव, रा येन अद धोळ्द मात आद.

¹² अगर नीम मा दुसरा लॉकुर अधिकार जतुसतार, रा येन नाम्द नीम मा यक्कुल अधिकार हैलेच? तरी भी नाव ई अधिकार इन इस्तेमाल माळीदिल, लेकीन नाव सब येनारा सहन माळतेव कि नाम्द द्वारा मसीह अन खुशखबरी दा अळचन बरबाळुल.

¹³ येन नीव जान्सालीर कि जो मंदिर दा स्यावा माळतार, आंदुर मंदिर दा टु तिनतार; अदिक जो वेदी इन स्यावा माळतार, आंदुर वेद इन भेंट इन सहभागी आगतार?

¹⁴ ईदा रीति देल प्रभु भी ठहरूसदुन कि जो लॉकुर खुशखबरी केळ्सतार, आंदुर जीविका खुशखबरी देल आगुल.

¹⁵ लेकीन ना इदुर दा टु यातोदारा भी मात इक क्याल्सा दा तंदिदील, अदिक ना ईव मातगोळ इदुरसाटी लिख्सीदिल कि नांद साटी हिंग माळुल, यतिकी इदुर देल रा नांद सायोद अच भला आद कि यावारा नांद घमण्ड इक बेकार ठहरूसुल.

¹⁶ अगर ना खुशखबरी केळसाईन, रा नांद साटी येनु घमण्ड इन मात आलच; यतिकी ईद रा नांद साटी जरूरी आद. अगर ना खुशखबरी ईला केळसाईन, रा नान मा हाय!

¹⁷ यतिकी अगर तान इच्छा देल ईद माळतीन रा मजदूरी नानी सिकतद, अदिक अगर तान इच्छा देल माळालीन तरी भी परमेश्वर नानी ईद सौप्सदुन अदिक ईदा नांद कर्तव्य हुन.

¹⁸ रा नांद मजदूरी येन हुन? ईद कि याग ना खुशखबरी प्रचार माळाईन रा अदरी फुकट दा माळाईन, अदिक खुशखबरी दा जो नान अधिकार आद अदरी पुरा रीति देल उपयोग दा ईला तराईन.

¹⁹ यतिकी ना मंळसागोळ से आजाद आईन तरी भी ना तान तान इक सप्पा मुंदुर्द दास माळ कोंडीन कि हापाळ लॉकुरी परमेश्वर उन राज्य दा तर सकुल.

²⁰ ना यहूदीगोळ साटी यहूदी आदीन कि यहूदीगोळी परमेश्वर उन राज्य दा तर सकुल. जो लॉकुर मूसा अन्द व्यवस्था अन्द हात्‍ती आर आंदुर साटी ना व्यवस्था अन्द हात्‍ती ईला आगदुर मा भी व्यवस्था अन्द हात्‍ती आदीन कि आंदरी जो व्यवस्था अन्द हात्‍ती आर, आंदरी भी परमेश्वर उन राज्य दा तर सकुल.

²¹ जो व्यवस्थारहित आर आंदुर साटी ना यीशु मसीह जो परमेश्वर उन व्यवस्था देल रहित आईन, व्यवस्थारहित-सा आगेदीन कि जो व्यवस्थारहित आर आंदरी भी परमेश्वर उन राज्य दा तर सकुल.

²² ना निर्बलगोळ साटी निर्बल सा आगेदीन कि निर्बलगोळी जिक्सकु तराईन. ना सब मंळसागोळ साटी सब येनारा बन्सदीन कि यातोद ना यातोद रीति देल यावारा ऊंद मंळसा अन्द उद्धार माळसुसाईन.

²³ ना ईद सब येनारा खुशखबरी इन साटी माळतीन कि दुसरा अन्द सांगुळ अदुर्द भागी आगेगाईन.

²⁴ येन नीव जान्सालीर कि दवळ दा रा सप्पा अच वोळतार, लेकीन ईनाम ऊंदा मंळसा वोयतान? नीव भी ई प्रकार देल वोळी कि नीव जीत्स सकी.

²⁵ आळोद प्रतियोगिता दा भाग ताकोमावाळा हर ऊंद खिलाळी सप्पा प्रकार इन संयम ईटतान. आव रा नाश आगोद हार इन प्राप्ती इन साटी ईद सप्पा येनारा माळतार, लेकीन नाव रा आ मुकुट साटी माळतेव जो मुरझुसाल.

²⁶ इदुरसाटी ना रा ईदा रीति देल हरूतीन, लेकीन लक्ष्यहीन ईलच; ना भी ईदा रीति देल बुक्‍की देल आळतीन, लेकीन अदुर घाई ईला जो हवा पीट्सतेला आळतान.

²⁷ लेकीन ना तान मय इक बडुतीन कुटतीन अदिक वश दा तरतीन, यागल्यारा हिंग ना आगबाळुल कि दुसरा अक प्रचार माळकु ना खुद अच यातोदारा रीति देल निकम्मा ठहरूसाईन.