भजन-संहिता 88

1 हे यहोवा, तेंह ओ परमेसर अस, जऊन ह मोर उद्धार करथे; रात अऊ दिन मेंह तोला पुकारथंव। 2 मोर पराथना ह तोर करा हबरे; मोर पुकार कोति अपन कान ला लगा। 3 मेंह बहुंत समस्या म पड़े हंव अऊ मोर परान ह मिरतू के लकठा म हवय। 4 मोर गनती ओमन म होवथे, जऊन मन कबर म जावथें; मेंह एक निरबल मनखे सहीं हो गे हवंव। 5 मोला मरे मनखेमन के संग अलग रखे जावथे, जइसे कि मारे गय मनखेमन कबर म पड़े रहिथें, जेमन ला तेंह फेर सुरता नइं करस, जेमन के तेंह देखरेख नइं करस। 6 तेंह मोला सबले खाल्हे के खंचवा, सबले जादा अंधियार वाले गहरई म रखे हस। 7 तोर कोप ह मोर ऊपर बहुंत भड़के हवय; तेंह मोला अपन जम्मो लहरामन ले बियाकुल कर दे हस। 8 तेंह मोर सबले घनिस्ट संगीमन ला मोर ले दूरिहा कर दे हस अऊ ओमन बर मोला घिनौना बना दे हस। मेंह कैद हो गे हंव अऊ भाग नइं सकंव; 9 मोर आंखीमन दुख के मारे धुंधला गे हवंय। हे यहोवा, मेंह तोला हर दिन पुकारथंव; मेंह तोर कोति अपन हांथ पसारथंव। 10 का मरे मनखेमन ला तेंह अपन अद्भूत काम देखाथस? का ओमन मरे म ले फेर जी जाथें अऊ तोर परसंसा करथें? 11 का कबर म तोर मया के, अऊ बिनास म तोर बिसवासयोग्यता के घोसना करे जाथे? 12 का तोर अद्भूत काम अंधियार के जगह, या तोर धरमी काम अपमान के जगह म जाने जाथे? 13 पर हे यहोवा, मेंह तोला मदद बर पुकारथंव; बिहनियां मोर पराथना ह तोर करा हबरथे। 14 हे यहोवा, तेंह काबर मोला छोंड़ देथस अऊ काबर अपन मुहूं ला मोर ले छुपा लेथस? 15 मेंह अपन जवानी के समय ले दुख भोगे हंव अऊ मिरतू के लकठा म रहे हंव; मेंह तोर आतंक ला सहे हंव अऊ मेंह निरास हंव। 16 तोर कोप ह मोर ऊपर छा गे हवय; तोर आतंक ह मोला नास कर दे हवय। 17 दिन भर ओमन बाढ़ के पानी सहीं मोर चारों कोति रहिथें; ओमन पूरा-पूरा मोला अपन म समा ले हवंय। 18 तेंह मोर ले मोर संगी अऊ परोसीमन ला लेय ले हस— अंधियार ह मोर सबले नजदीकी संगी अय।