भजन-संहिता 40

1 मेंह धीरज धरके यहोवा के डहार देखेंव; ओह मोर तरफ धियान दीस अऊ मोर गोहार ला सुनिस। 2 ओह मोला चीखला ले भरे खंचवा ले, चीखला अऊ दलदल ले बाहिर निकालिस; अऊ मोला चट्टान ऊपर ठाढ़ करिस अऊ ठाढ़ होय बर मोला एक मजबूत जगह दीस। 3 ओह मोला एक नवां गीत दीस, हमर परमेसर के इस्तुति करे बर एक ठन भजन दीस। बहुंते जन देखहीं अऊ यहोवा के भय मानहीं अऊ ओकर ऊपर भरोसा करहीं। 4 धइन अय ओ मनखे, जऊन ह यहोवा ऊपर भरोसा रखथे, जऊन ह घमंडी मनखेमन कोति नइं देखय, या ओमन कोति नइं देखय, जेमन लबरा देवतामन ऊपर अपन मन लगाथें। 5 हे यहोवा मोर परमेसर, तेंह बहुंते अद्भूत काम करे हस, अऊ हमर बर बहुंते चीजमन के योजना बनाय हस। काकरो तुलना तोर से नइं करे जा सकय; यदि मेंह तोर काममन के चरचा करंव अऊ ओमन के बारे बतावंव, त ओमन अतेक जादा हवंय कि ओमन के गनती नइं करे जा सकय। 6 बलिदान अऊ भेंट तेंह नइं चाहय— पर मोर कान ला तेंह खोल दे हस — होम-बलिदान अऊ पाप-बलिदान तेंह नइं चाहय। 7 तब मेंह कहेंव, “मेंह इहां हंव, मेंह आय हंव— मोर बारे म ये बात ह किताब म लिखे हवय। 8 हे मोर परमेसर, मेंह तोर ईछा ला पूरा करे चाहथंव; तोर कानून ह मोर हिरदय म बसे हवय।" 9 मेंह तोर धरमीपन के काम के बखान बड़े सभा म करथंव; हे यहोवा, जइसे कि तेंह जानत हस, मेंह अपन मुहूं ला बंद नइं रखंव। 10 मेंह तोर धरमीपन ला अपन हिरदय म नइं छुपावंव; मेंह तोर बिसवासयोग्यता अऊ तोर उद्धार के काम के बारे म गोठियाथंव। मेंह बड़े सभा ले तोर मया अऊ तोर बिसवासयोग्यता के बात ला नइं छुपावंव। 11 हे यहोवा, मोर ऊपर ले अपन दया ला झन हटा; तोर मया अऊ बिसवासयोग्यता हमेसा मोर बचाव करय। 12 काबरकि अनगिनत समस्यामन मोला घेरे हवंय; मोर पापमन मोला दबा ले हवंय, अऊ मेंह देख नइं सकत हंव। ओमन के संखिया मोर मुड़ के चुंदी ले घलो जादा हवय, एकरसेति मोर मन ह टूट गे हवय। 13 हे यहोवा, किरपा करके मोला बचा ले; हे यहोवा, मोर मदद करे बर जल्दी आ। 14 जऊन मन मोर परान लेय चाहथें, ओ जम्मो झन लज्जित होवंय अऊ घबरावंय; ओ जम्मो, जऊन मन मोर बिनास के ईछा रखथें, ओमन कलंकित होके पाछू हटंय। 15 जऊन मन मोला ये कहिथें, “अहा! अहा!” ओमन अपन ही लज्जा म चकित होवंय। 16 पर ओ जम्मो, जऊन मन तोर खोज म रहिथें, ओमन तोर कारन आनंद मनावंय अऊ खुस होवंय; जऊन मन तोर उद्धार के मदद चाहथें, ओमन हमेसा कहंय, “यहोवा महान ए!" 17 पर जहां तक मोर बात ए, मेंह गरीब अऊ जरूरतमंद अंव; परभू ह मोर बारे म सोचय। तेंह मोर मददगार अऊ मोर छुड़ानेवाला अस; तेंह मोर परमेसर अस, मोर मदद करे म देरी झन कर।