1 थिस्सलुनीकियो 5

¹ पर भैय्या अर बहिन हुन तुम खुद अच्छी तरीका से जाना हैं कि प्रभु को दिन रात को चोर को जसो आहे। एकोलाने ऐको सही बखत को बारे म तुमरो लाने कुछु लिखन की जरूरत नी हाय।

² काहेकि तुम खुद अच्छी तरीका से जाना हैं कि प्रभु को दिन रात म आन वालो एक चोर को जसो आन वालो हैं।

³ जब अदमी हुन बोलत होये, “सब कुछ सान्ति हैं, अर कुछ डर नी हाय,” ते उन पा एकाएक अकाल आ जाएगो, जे तरीका से गरभ वाली पर दुख; अर वी कोई भी तरीका से नी बचन का।

⁴ पर भैय्या हुन अर बहिन हुन!, तुम तो इंधारो म नी हाय कि उ दिन तुम पा चोर को समान आ ख पकडे।

⁵ काहेकि तुम सब ज्योति की संतान हैं अर दिन की संतान आय; हम न रात का हैं अर न इंधारो का हैं।

⁶ एकोलाने हम दुसरा को समान सोते नी रैय पर जगते अर भागते सोते रहे।

⁷ काहेकि जो सोवा हैं वी रात ही ख सोवा हैं, अर जो नसा म धुत रहवा हैं, वी रात ही ख नसा म धुत रहवा हैं।

⁸ पर हम जो दिन का हैं, विस्वास अर प्रेम को कवच पहिन ख अर उध्दार की आसा को टोपा पहिन ख सतर ख रहे।

⁹ काहेकि परमेस्वर न हम का घुस्सा को लाने नी, पर एकोलाने ठहरायो हैं कि हम अपनो प्रभु यीसु मसी को दुवारा उध्दार प्राप्त करे।

¹⁰ मसी हमरो लाने एकोलाने मरियो, जसो हम चाहे जिन्दा रैय या मर गया होय, सब मिलका ओको ही संग जीएँ।

¹¹ एकोलाने एक दुसरा का सान्ति देव अर एक दुसरा ख बढ़ान को काम करो जसा कि तुम करते भी जावा हैं।

¹² अरे भैय्या हुन हम तुम से एक विनती करा हैं। तुम वी इंसान हुन कि इज्जत करनो, जो तुमरो बीच म मेहनत करा हैं, अर प्रभु म तुमारा अगुवा हैं, अर तुम ख ग्यान सिखावा हैं, उनकी इज्जत करो।

¹³ तुम प्रेम को संग उनकी खूब इज्जत करो, काहेकि वी तुमरो लाने मेहनत करा हैं। आपस म मिल जुल ख रहनो।

¹⁴ अरे भैय्या हुन अर बहिन हुन, हम तुम से विनती करा हैं कि तुम आलसी हुन ख समझाते रहनू, काम चोर हुन ख हिम्मत देव, कमजोर हुन ख समालो, अऊर सब को संग मेल जोल को व्यवहार करो।

¹⁵ सतर का रहनु! कोई, कोई से बुराई को बदला बुरई नी करन को; पर हमेसा भलाई करन पर तैयार रहनो, एक दुसरो म अर सब से ही भी भलई की बात करनो।

¹⁶ हमेसा खुस रैयनो।

¹⁷ हमेसा बिनती करते रहनु।

¹⁸ हर बात म परमेस्वर को धन्यवाद करते रहनो; काहेकि तुमरो लाने मसी यीसु म परमेस्वर कि यई मरजी हैं।

¹⁹ आत्मा ख मत बुझानो।

²⁰ भविस्यवानी हुन का बेकार मत समझनो।

²¹ सब बात हुन का परखो; जे अच्छी हैं ओखा पकड़ ख रहनू।

²² सब तरीका की बुराई से बचियो रहनु।

²³ सान्ति को परमेस्वर खुद ही तुम ख पुरी तरीका से सुध्द करे; अर तुमरी आत्मा अर जान अर सरीर हमरो प्रभु यीसु मसी को आन तक पुरा-पुरो अर बेकसुर सभल ख रहे।

²⁴ तुमका बुलान वालो परमेस्वर सच्चो हैं अर उ असो ही करेगों।

²⁵ अरे भैय्या हुन, तुम हमरो लाने भी बिनती करनु।

²⁶ सब भई बंद हुन ख प्रेम को सुध्द चुम्मा से सम्मान करनु।

²⁷ मी तुम ख प्रभु की कसम देऊ हैं कि या चिठ्टी सब भई हुन ख पढ़ ख सुनाई जाय।

²⁸ हमरो प्रभु यीसु मसी कि किरपा तुम पा होती रैय।