מעשים 26

1 א וְאַגְרִפַּס אָמַר אֶל־פּוֹלוֹס הִנֵּה נָתוּן לְךָ לְדַבֵּר כֹּל לְמַעַן תִּצְטַדָּק אָז הֵרִים פּוֹלוֹס אֶת־יָדוֹ וַיִּצְטַדֵּק לֵאמֹר׃ 2 ב הַמֶּלֶךְ אַגְרִפַּס בְּאָשְׁרִי הַיּוֹם לִהְיוֹת תְחִנָּה לְהִצְטַדֵּק לְפָנֶיךָ עַל־כֹּל אֲשֶׁר הַיְּהוּדִים יַרְשִׁיעֻנִי׃ 3 ג כִּי כָל־חֻקֵּי הַיְּהוּדִים וְחִקְרֵי מִשְׁפְּטֵיהֶם אַתָּה יֹדֵעַ הֵיטֵב וּבְכֵן אֶתְחַנֶּן־לְךָ הַקְשִׁיבָה לִּי בְּאֹרֶךְ רוּחֶךָ׃ 4 ד אֶת־אָרְחוֹת חַיַּי מֵאָז הַחִלֹּתִי לָלֶכֶת בָּהֶם מִנְּעוּרַי בְּקֶרֶב עַמִּי וּבִירוּשָׁלָיִם כָּל־עַם הַיְּהוּדִים יֹדְעִים׃ 5 ה וַאֲשֶׁר מֵעוֹדִי הֵם יַכִּירוּ בִי לוּ יֹאבוּ וִיעִדֻנִי כִּי חָבֵר הָיִיתִי לַעֲדַת הַפְּרוּשִׁים הַדְּבֵקִים בַּתּוֹרָה לְכָל־מִשְׁפָּטֶיהָ וּפִקּוּדֶיהָ בְּכָל־מְאֹדָם וּכְמֹהֶם חָיִיתִי׃ 6 ו וְעַתָּה עַל־דִּבְרַת תּוֹחַלְתִּי לִמְלֹאת דְּבַר הָאֱלֹהִים אֲשֶׁר דִּבֶּר לַאֲבֹתֵינוּ אֲנִי עֹמֵד הַיּוֹם לַמִּשְׁפָּט׃ 7 ז אִם לֹא כָּל־שְׁנֵים עָשָׂר שְׁבָטֵינוּ מְיַחֲלִים כֵּן וּמִתְפַּלְּלִים עַל־כָּכָה לַיְלָה וְיוֹמָם בִּגְלַל הַתּוֹחֶלֶת הַזֹּאת הַמֶּלֶךְ הַיְּהוּדִים יַרְשִׁיעֻנִי׃ 8 ח הַאֻמְנָם אֵינְכֶם מַאֲמִינִים כִּי אֱלֹהִים מְחַיֶּה מֵתִים׃ 9 ט וַאֲנִי גַּם־אֲנִי דִמִּיתִי לְהַכְזִיב אֶת־שֵׁם יֵשׁוּעַ הַנָּצְרִי וּלְמָרֲרֵהוּ הַרְבֵּה׃ 10 י אֲשֶׁר כֵּן עָשִׂיתִי בִירוּשָׁלַיִם וְרַבִּים מֵהַקְּדוֹשִׁים כִּלֵּאתִי בְּבָתֵּי הַכְּלָאִים בָּרִשְׁיוֹן אֲשֶׁר קִבַּלְתִּי מֵאֵת רָאשֵׁי הַכֹּהֲנִים וְכִי הוּמְתוּ נָתַתִּי צֶדֶק לְמִשְׁפָּטָם׃ 11 יא וּבְכָל־בָּתֵּי־הַכְּנֵסֶת הוֹסַפְתִּי לְיַסְּרָה אֹתָם פְּעָמִים רַבּוֹת וָאַכְבִּיד יָדִי עֲלֵיהֶם עַד־לְחָרֵף וְכֹה בְּשֶׁטֶף אַפִּי הֲצִיקוֹתִי לָהֶם גַּם־בֶּעָרִים מִחוּץ לָאָרֶץ׃ 12 יב לְבַעֲבוּר עֲשׂוֹת כָּכָה הָלַכְתִּי לְדַמָּשֶׂק בְּרִשְׁיוֹן הַכֹּהֲנִים הָרָאשִׁים וּבְמַלְּאָם אֶת־יָדִי׃ 13 יג וַיְהִי בַּדֶּרֶךְ לְעֵת הַצָּהֳרָיִם הַמֶּלֶךְ וְהִנֵּה אוֹר מִן־הַשָּׁמַיִם וְנֹגַהּ לוֹ גָּדוֹל מִנֹּגַהּ הַשֶּׁמֶשׁ וַיִּגַּהּ בַּעֲדֵנִי וּבְעַד הַהֹלְכִים עִמִּי׃ 14 יד אֲנַחְנוּ כֻלָּנוּ נָפַלְנוּ לָאָרֶץ וַאֲנִי שָׁמַעְתִּי קוֹל קֹרֵא אֵלַי בְּעִבְרִית שָׁאוּל שָׁאוּל מַה תִּרְדָּף־לִי קָשֶׁה לְּךָ לְהַכּוֹת הַדָּרְבָן אָחוֹר׃ 15 טו וָאֹמַר אֲנִי מִי אַתָּה אָדוֹן וַיֹּאמֶר הָאָדוֹן אֲנִי יֵשׁוּעַ אֲשֶׁר אַתָּה רֹדֶף־לִי׃ 16 טז אֲבָל קוּם וַעֲמֹד עַל־רַגְלֶיךָ כִּי עַל־כֵּן נִרְאֵיתִי אֵלֶיךָ לִבְחָר־בְּךָ לִמְשָׁרֵת וְעֵד לַאֲשֶׁר רָאִיתָ וַאֲשֶׁר אַרְאֲךָ עוֹד׃ 17 יז לְהַצִּילְךָ מִן־הָעָם וּמִן־הַגּוֹיִם אֲשֶׁר אֶשְׁלָחֲךָ אֲלֵיהֶם׃ 18 יח לִפְקֹחַ אֶת־עֵינֵיהֶם וְלַהֲשִׁיבָם מֵחשֶׁךְ לְאוֹרָה וּמִשִּׁלְטוֹן הַשָּׂטָן אֶל־הָאֱלֹהִים לְמַעַן יִמְצְאוּ אֶת־סְלִיחַת הַחֲטָאִים וְנַחֲלָה בְּקֶרֶב הַקְּדוֹשִׁים בְּהַאֲמִינָם בִּי׃ 19 יט עַל־כֵּן הַמֶּלֶךְ אַגְרִפַּס לֹא הִמְרֵיתִי בַּמַּרְאֶה אֲשֶׁר הָרְאֵיתִי מִן־הַשָּׁמָיִם׃ 20 כ כִּי אִם־אֶל־הַיּשְׁבִים בְּדַמֶּשֶׂק רִאשׁוֹנָה וּבִירוּשָׁלַיִם וּבְכָל־אֶרֶץ הַיְּהוּדִים וְגַם־לַגּוֹיִם קָרָאתִי לָשׁוּב וּבֹא אֶל־הָאֱלֹהִים בַּעֲשׂה טוֹב כְּיָאוּת לַשָּׁבִים בֶּאֱמֶת׃ 21 כא בַּעֲבוּר זֶה תְּפָשׂוּנִי הַיְּהוּדִים בַּמִּקְדָּשׁ וַיְבַקְשׁוּ לַהֲמִיתֵנִי׃ 22 כב וּבְעֶזְרִי מֵעִם הָאֱלֹהִים עוֹדֶנִּי חַי עַד־הַיּוֹם הַזֶּה וַאֲנִי מֵעִיד וּמְלַמֵּד בִּפְנֵי קָטֹן וְגָדוֹל רַק אֶת־זֶה אֲשֶׁר גַּם־הַנְּבִיאִים וְגַם־משֶׁה דִּבְּרוּ כִּי־הָיֹה יִהְיֶה׃ 23 כג אֲשֶׁר הַמָּשִׁיחַ יְעֻנֶּה וְרִאשׁוֹן יָקוּם מֵעִם־הַמֵּתִים לְהָאֶר־אוֹר בְּקֶרֶב הָעָם וּבְקֶרֶב הַגּוֹיִם׃ 24 כד וַיְהִי הוּא כֹה מִצְטַדֵּק וּפֶסְטוֹס קָרָא בְקוֹל רָם מְשֻׁגָּע אַתָּה פּוֹלוֹס זֹה חָכְמָתְךָ הָרַבָּה עָשְׂתָה לְּךָ שִׁגָּעוֹן׃ 25 כה וּפוֹלוֹס אָמַר לֹא פֶּסְטוֹס הַנִּכְבָּד לֹא מְשֻׁגָּע אָנֹכִי כִּי אִם־דִּבְרֵי אֱמֶת נְכֹחִים לְמֵבִין אֲנִי דֹבֵר׃ 26 כו וְהַמֶּלֶךְ אֲשֶׁר שָׂשׂ אֲנִי לְדַבֵּר לְפָנָיו הוּא יֹדֵעַ אֵת אֲשֶׁר דִּבֵּרְתִּי וַאֲנִי נוֹכַחְתִּי כִּי לֹא־נִסְתָּר מִמֶּנּוּ דָּבָר מִכָּל־הַדְּבָרִים הָאֵלֶּה כִי לֹא־בְמַחֲבֵא הָיוּ וְנַעֲלָמִים׃ 27 כז הֲמַאֲמִין אַתָּה הַמֶּלֶךְ אַגְרִפַּס בַּנְּבִיאִים אֲנִי יָדַעְתִּי כִּי מַאֲמִין הִנֶּךָ׃ 28 כח וְאַגְרִפַּס אָמַר אֶל־פּוֹלוֹס בִּמְעַט אַתָּה אֹמֵר לְפַתֹּתֵנִי כִּי־הֱיוֹת אֶהְיֶה מַאֲמִין בִּמְשִׁיחֲךָ כָּמוֹךָ׃ 29 כט וַיֹּאמֶר פּוֹלוֹס זֹאת שְׁאֵלָתִי מֵאֵת הָאֱלֹהִים כִּי־בִמְעַט אוֹ־בְהַרְבֵּה לֹא אַתָּה לְבַדְּךָ כִּי־אִם גַּם־כָּל־הַשֹּׁמְעִים אֹתִי הַיּוֹם יִהְיוּ כָמֹנִי חוּץ מִן־הַזִּקִּים הָאֵלֶּה׃ 30 ל בְּדַבְּרוֹ הַדָּבָר הַזֶּה וַיָּקָם הַמֶּלֶך וְהַפֶּחָה וּבֶרְנִיקָה וְהַיּשְׁבִים אִתָּם׃ 31 לא וּבְלֶכְתָּם נִדְבְּרוּ אִישׁ אֶל־רֵעֵהוּ וַיֹּאמְרוּ אָכֵן הָאִישׁ הַזֶּה לֹא־עָשָׂה דָבָר לִהְיוֹת לוֹ דִּין רָשָׁע לָמוּת אוֹ לְהֵאָסֵר בַּזִּקִּים׃ 32 לב וַיֹּאמֶר אַגְרִפַּס אֶל־פֶּסְטוֹס שָׁלֹחַ יְשֻׁלַּח הָאִישׁ הַזֶּה אִם־לֹא קָרָא אֶל־הַקֵּיסַר לַעֲשׂוֹת לוֹ מִשְׁפָּטוֹ׃