מעשים 22

1 א אֲנָשִׁים אַחִים וְאָבוֹת שִׁמְעוּ־נָא וַאֲדַבֵּרָה לְמַעַן לִפְנֵיכֶם אֶצְטַדָּק׃ 2 ב כְּשָׁמְעָם כִּי בְעִבְרִית יְדַבֵּר אֲלֵיהֶם וַיּוֹסִיפוּ עוֹד לְהַחֲרִישׁ וְהוּא אָמָר׃ 3 ג אִישׁ־יְהוּדִי אֲנֹכִי בְּעִיר טַרְסוֹס בְּקִילִיקְיָא יֻלַּדְתִּי פֹה בָּעִיר הַזֹּאת גֻּדַּלְתִּי לְרַגְלֵי גַמְלִיאֵל וַיְמַלְאֵנִי לִמּוּדֵי תוֹרַת אֲבוֹתֵינוּ לְכָל־חֻקֶּיהָ גַּם־הָיִיתִי מְקַנֵּא לֵאלֹהִים כַּאֲשֶׁר הִנְּכֶם אַתֶּם הַיּוֹם כֻּלְּכֶם׃ 4 ד וְאָנֹכִי רָדַפְתִּי אֶת־הַדֶּרֶךְ הַזֶּה עַד־לַמָּוֶת וַאֲנָשִׁים גַּם־נָשִׁים אָסַרְתִּי וָאֶתְּנֵם בְּבֵית הַכֶּלֶא׃ 5 ה כַּאֲשֶׁר כֹּה־יְעִידוּן־לִי גַּם־הַכֹּהֵן הַגָּדוֹל וְכָל־בֵּית הַזְּקֵנִים אֲשֶׁר אִמְּצוּ־לִי בְּאִגְּרוֹתֵיהֶם אֶל־הָאַחִים לֶלֶכֶת לְדַמֶּשֶׂק לַהֲבִיאָם גַּם־מִשָּׁם אֲסוּרִים לִירוּשָׁלַיִם לְמַעַן יֵעָנֵשׁוּ׃ 6 ו אֲנִי בַדֶּרֶךְ קָרוֹב לְבֹא דַמָּשֶׂק וְהִנֵּה בַּחֲצִי הַיּוֹם פִּתְאֹם אוֹר גָּדוֹל מִשָּׁמַיִם נָגַה עָלַי וַיְסֻבֵּנִי׃ 7 ז וָאֶפֹּל אַרְצָה וָאֶשְׁמַע קוֹל מִדַּבֵּר אֵלָי שָׁאוּל שָׁאוּל לָמָּה תִּרְדְּפֵנִי׃ 8 ח וָאַעַן אָנִי מִי אַתָּה אֲדֹנִי וַיֹּאמֶר אֵלַי אֲנִי יֵשׁוּעַ הַנָּצְרִי אֲשֶׁר אַתָּה מְרַדֵּף׃ 9 ט וַאֲשֶׁר הָיוּ עִמִּי רָאוּ אֶת־הָאוֹר וַיִּירָאוּ רַק אֶת־הַקּוֹל הַמְדַבֵּר אֵלַי לֹא שָׁמֵעוּ׃ 10 י וָאֹמַר וּמָה אֵפוֹא אֶעֱשֶׂה אֲדֹנִי וַיֹּאמֶר הָאָדוֹן אֵלַי קוּם וָלֵךְ לְדַמֶּשֶׂק וְשָׁם יֻגַּד לְךָ כֹּל אֲשֶׁר תְּצֻוֶּה לַעֲשׂוֹת׃ 11 יא וַאֲנִי לֹא־יָכֹלְתִּי לִרְאוֹת בְּעֵינַי כִי־כָהוּ מִפְּנֵי נֹגַהּ הָאוֹר וַיַּנְחוּנִי בְיָד הַהֹלְכִים עִמִּי וָאָבֹא לְדַמָּשֶׂק׃ 12 יב וְשָׁם אִישׁ וּשְׁמוֹ חֲנַנְיָה יְרֵא אֱלֹהִים כְּפִי הַתּוֹרָה וְרָצוּי לְכָל־הַיְּהוּדִים הַיֹּשְׁבִים שָׁם׃ 13 יג וְהוּא בָא אֵלַי וַיִּגַּשׁ וַיֹּאמַר אָחִי שָׁאוּל פְּקַח עֵינֶיךָ וּרְאֵה וּבְרֶגַע הַזֶּה נִפְקְחוּ עֵינַי וָאֶרְאֵהוּ אֹתוֹ לְפָנָי׃ 14 יד וַיֹּאמַר אֱלֹהֵי אֲבוֹתֵינוּ בָּחַר בְּךָ לָדַעַת אֶת־רְצוֹנוֹ וְלִרְאוֹת אֶת־הַצַּדִּיק וְלִשְׁמֹעַ אֶת־קוֹלוֹ מִפִּיו׃ 15 טו כִּי הָיֹה תִהְיֶה־לּוֹ לְעֵד נֶגֶד כָּל־הָאָדָם בַּדָּבָר אֲשֶׁר רָאִיתָ וַאֲשֶׁר שָׁמָעְתָּ׃ 16 טז וְעַתָּה לָמָּה תִתְמַהְמֵהַּ קוּם הִטָּבֵל וְהִתְרַחֵץ מֵחַטֹּאתֶיךָ בְּקָרְאֲךָ בְּשֵׁם הָאָדוֹן׃ 17 יז וַיְהִי בְּשׁוּבִי לִירוּשָׁלַיִם וַאֲנִי הִתְפַּלַּלְתִּי בַמִּקְדָּשׁ וְרוּחַ יְהוָֹה לְבָשָׁתְנִי׃ 18 יח וָאֵרֶא אֹתוֹ מְדַבֵּר אֵלַי חוּשָׁה מַהֲרָה מִירוּשָׁלָיִם כִּי אֶת־עֵדוּתְךָ עָלַי לֹא־יִקָּחוּ׃ 19 יט וָאֹמַר אֲדֹנִי הֲלֹא הֵם יוֹדְעִים הֵיטֵב כִּי אֲנִי הוּא אֲשֶׁר אֶת־מַאֲמִינֶיךָ כִּלֵּאתִי בְּבָתֵּי כְלָאִים וּבְבָתֵּי־הַכְּנֵסֶת הִכֵּיתִים׃ 20 כ וּבְהִשָּׁפֵךְ דַּם־סְטְפָנוֹס עֵדְךָ גַּם־אֲנִי עֲמַדְתִּי שָׁם נָטִיתִי אַחֲרֵיהֶם לַהֲמִיתוֹ וְאֶת־בִּגְדֵי מְרַצְחָיו אֲנִי נָטָרְתִּי׃ 21 כא וַיֹּאמֶר אֵלַי לֵךְ כִּי בַמֶּרְחַקִּים אֶל־הַגּוֹיִם אֲנִי אֶשְׁלָחֶךָ׃ 22 כב וַיִּשְׁמְעוּ אֹתוֹ עַד־הַדָּבָר הַזֶּה וְאָז נָתְנוּ קוֹלָם וַיִּקְרָאוּ הִכָּחֵד יִכָּחֵד אִישׁ כָּזֶה מֵעַל־פְּנֵי הָאֲדָמָה אֵין לוֹ חַיִּים׃ 23 כג וַיְהִי הֵם שֹׁאֲגִים וּפֹשְׁטִים אֶת־בִּגְדֵיהֶם וּמְעַפְּרִים בֶּעָפָר עַד־לְמָעְלָה׃ 24 כד וַיְצַו שַׂר הָאֶלֶף לַהֲבִיאוֹ אֶל־תּוֹךְ הַמְּצוּדָה וְשָׁם צִוָּה עָלָיו לְעַנּוֹתוֹ בְּמַכּוֹת אַכְזְרִיּוֹת לְמַעַן יִוָּדַע לוֹ עַל־מֶה כָּכָה עָלָיו הִתְרַגָּזוּ׃ 25 כה וַיְהִי בְּהֵאָסְרוֹ לְהֵעָנוֹתוֹ וַיֹּאמֶר פּוֹלוֹס אֶל־שַׂר־הַמֵּאָה הַנִּצָּב עָלָיו הַאַף אֻמְנָם יֶשׁ־לָכֶם הָרִשְׁיוֹן לְעַנּוֹת אֶזְרַח רוֹמִי וּמַה־גַּם בְּלֹא־דִין וּמִשְׁפָּט׃ 26 כו וְשַׂר הַמֵּאָה בְּשָׁמְעוֹ כָזֹאת מִהַר אֶל־שַׂר־הָאֶלֶף וַיְסַפֶּר־לוֹ וְגַם־אָמַר רְאֵה מָה אַתָּה אֹמֵר לַעֲשׂוֹת כִּי הָאִישׁ הַזֶּה אֶזְרַח רוֹמִי הוּא׃ 27 כז וַיָּבֹא שַׂר־הָאֶלֶף וַיֹּאמַר אֵלָיו אֱמָר־לִי הַאֻמְנָם כִּי אֶזְרַח רוֹמִי אָתָּה וַיֹּאמַר כִּדְבָרֶךָ׃ 28 כח וַיַּעַן שַׂר־הָאֶלֶף אָנִי קָנִיתִי לִי זְכוּת אֶזְרָח כָּזֹאת בְּכֶסֶף מָלֵא וַאֲנִי הֵשִׁיב פּוֹלוֹס אֲנִי גַּם־יֻלַּדְתִּי בָהּ׃ 29 כט וְעַד־מְהֵרָה הִרְפּוּ מִמֶּנוּ הַמְבַקְשִׁים לְעַנּוֹתוֹ וְשַׂר הָאֶלֶף פָּחַד בְּשָׁמְעוֹ כִּי זֶה אֲשֶׁר אֲסָרוֹ אֶזְרַח רוֹמִי הוּא׃ 30 ל בַּיּוֹם הָאַחֵר נִכְסַף לְבָרֶר־לוֹ אֶת־הַדָּבָר לַאֲמִתּוֹ עַל־מָה יַרְשִׁיעוּ אֹתוֹ הַיְּהוּדִים וַיַּתִּירֵהוּ וַיְצַו לְהִתְאַסֵּף רָאשֵׁי הַכֹּהֲנִים וְכָל־הַסַּנְהֶדְרִין וְהוּא הוֹרִיד אֶת־פּוֹלוֹס וַיַּעֲמִדֵהוּ לִפְנֵיהֶם׃