1 טימותי 5

1 א אַל־תִּגְעַר בְּזָקֵן כִּי אִם־כְּאָב תַּזְהִירֶנּוּ וְאֶת־הַצְּעִירִים כְּאַחִים׃ 2 ב אֶת־הַזְּקֵנוֹת כְּאִמּוֹת וְאֶת־הַצְּעִירוֹת כַּאֲחָיוֹת בְּמַחֲשָׁבָה כֻּלָּהּ זַכָּה׃ 3 ג כַּבֵּד אֶת־הָאַלְמָנוֹת אֲשֶׁר הֵנָּה אַלְמָנוֹת נְכֹחוֹת׃ 4 ד וְכִי־יִהְיוּ בָנִים לְאַלְמָנָה אוֹ־בְנֵי בָנִים רִאשֹׁנִים הֵם לִלְמֹד לַעֲשׂוֹת חֶסֶד עִם־בֵּית מוֹלַדְתָּם וּלְהָשִׁיב גְּמוּל לְיֹלְדֵיהֶם כִּי הַדָּבָר הַזֶּה טוֹב הוּא וְרָצוּי לִפְנֵי אֱלֹהֵינוּ׃ 5 ה אָכֵן אַלְמָנָה גַלְמוּדָה נְכֹחָה הֲלֹא הִיא אֲשֶׁר תָּשִׂים בֵּאלֹהִים מִבְטַחָהּ וְתִתְפַּלֵּל תָּמִיד תְּפִלּוֹת וְתַחֲנוּנִים לַיְלָה וָיוֹם׃ 6 ו אַךְ הָרֹדֶפֶת חַיֵּי בְשָׂרִים מֵתָה הִיא בְּחַיֶּיהָ׃ 7 ז וְאַתָּה תְּצַוֶּה כָאֵלֶּה לְבִלְתִּי יִמָּצֵא בָהֵן שֶׁמֶץ דָּבָר׃ 8 ח וּמִי הוּא אֲשֶׁר לֹא יְכַלְכֵּל קְרֹבָיו וְגַם מִבְּנֵי בֵיתוֹ יִתְעַלָּם הוּא בֹגֵד בָּאֱמוּנָה וְרַע מִמְּכַחֵשׁ בַּיהוָֹה׃ 9 ט לֹא תָבוֹא אַלְמָנָה עַל־סֵפֶר הַקָּהָל בִּלְתִּי מִבַּת־שִׁשִּׁים שָׁנָה וָמָעְלָה אֲשֶׁר הָיְתָה אֵשֶׁת אִישׁ אֶחָד׃ 10 י וְיֶשׁ־לָהּ עֵדוּת עַל־מַעֲשֶׂיהָ הַטּוֹבִים כִּי גִדְּלָה בָנִים וְאֹרְחִים הֵבִיאָה בָּיִת כִּי רָחֲצָה רַגְלֵי הַקְּדוֹשִׁים וְהוֹצִיאָה נֶפֶשׁ נַעֲנָה מִמְּצוּקוֹתֶיהָ וְכִי רָדְפָה כָּל־מַעֲשֶׂה טּוֹב׃ 11 יא אַךְ אַלְמָנוֹת צְעִירוֹת אַל־תְּקַבֵּל כִּי כַּאֲשֶׁר טָפַשׁ לִבָּן וּפָרְקוּ עֹל הַמָּשִׁיחַ מֵעַל צַוָּארָן כֵּן תֶּחֱשַׁק נַפְשָׁן לְהִבָּעֵל׃ 12 יב וְהֵנָּה עֲוֹנָן עֲלֵיהֶן כִּי הֵפֵרוּ מִבְטָא שְׂפָתֵיהֶן מֵרֹאשׁ׃ 13 יג וְהֵן הֵנָּה בַּעֲצַלְתַּיִם תִּלְמֹדְנָה לָסֹב מִבַּיִת לָבָיִת וְלֹא־לְבַד בַּעֲצַלְתַּיִם כִּי אִם־גַּם־לְבַטֵּא הֶבֶל וּלְהוֹצִיא דִבָּה וְשִׂיחַ אֲשֶׁר לֹא טוֹב׃ 14 יד וְעַל־כֵּן רְצוֹנִי כִּי תְבַקֵּשְׁנָה הַצְּעִירוֹת לְהִנָּשֵׂא לָלֶדֶת בָּנִים וְלָשׂוּם עַיִן עַל־הֲלִיכוֹת הַבָּיִת וְלֹא לָתֵת תֹּאֲנָה לְשׂוֹטֵן לְדַבֵּר שִׂטְנָה עָלֵינוּ׃ 15 טו כִּי אֲחָדוֹת כְּבָר סָרוּ אַחֲרֵי הַשָּׂטָן׃ 16 טז כִּי־תִהְיֶינָה אַלְמָנוֹת בְּבֵית בֶּן־אֱמוּנָה אוֹ בַת־אֱמוּנָה תְּכַלְכֵּל אֶתְהֶן וְלֹא תִהְיֶיןָ לְמַשָּׂא עַל־עֲדַת אֱלֹהִים לְמַעַן תַּשִּׂיג יָדָם לְכַלְכֵּל אַלְמְנוֹתֵיהֶם הַנְּכֹחוֹת׃ 17 יז הַזְּקֵנִים הַשֹּׁמְרִים מִשְׁמַרְתָּם הֵיטֵב יְכֻבְּדוּ בְּכָבוֹד מִשְׁנֶה וְיֹתֵר מֵהֶם אֲשֶׁר עֲבֹדָתָם בִּדְבַר אֱלֹהִים וּבְלִקְחוֹ׃ 18 יח כִּי־הַכָּתוּב אֹמֵר לֹא־תַחְסֹם שׁוֹר בְּדִישׁוֹ וְעוֹד נֶאֱמַר הַפֹּעֵל יֵשׁ שָׂכָר לִפְעֻלָּתוֹ׃ 19 יט עַל־זָקֵן לֹא תְקַבֵּל שִׂטְנָה בִּלְתִּי אִם־עַל־פִּי שְׁנַיִם אוֹ־שְׁלשָׁה עֵדִים׃ 20 כ וְאֵלֶּה אֲשֶׁר חָטְאוּ הוֹכֵחַ תּוֹכִיחַ אֹתָם בִּפְנֵי כֹל לְמַעַן יִשְׁמְעוּן גַּם־הֵם וְיִירָאוּן׃ 21 כא הַעִדֹתִי בְךָ הַיּוֹם נֶגֶד הָאֱלֹהִים וְיֵשׁוּעַ הַמָּשִׁיחַ וְנֶגֶד הַמַּלְאָכִים בְּחִירֵי־יָהּ לִשְׁמֹר אֶת־הַדְּבָרִים הָאֵלֶּה וְלֹא לְהַטּוֹת מִשְׁפָּט וּבְכָל־אֲשֶׁר תַּעֲשֶׂה לֹא־תִשָּׂא פְנֵי גָבֶר׃ 22 כב אַל־תִּסְמֹךְ יָדֶיךָ עַל־אִישׁ בְּחִפָּזוֹן וְלֹא תִתְעָרֵב בַּעֲוֹנוֹת אֲחֵרִים וְאֶת־טָהֳרַת נַפְשְׁךָ תִּשְׁמֹר׃ 23 כג אַל־תִּשְׁתֶּה עוֹד מַיִם כִּי אִם־קַח לְךָ מְעַט־יָיִן שִׁקּוּי לְבִטְנֶךָ כִּי חַלָּשׁ אַתָּה לָרֹב׃ 24 כד יֵשׁ בְּנֵי אָדָם אֲשֶׁר עֲוֹנוֹתָם גְּלוּיִם וּמַקְדִּימִים לָבוֹא לִפְנֵיהֶם לְמִשְׁפָּט וְיֵשׁ אֲשֶׁר עֲוֹנוֹתָם מְאַחֲרִים לָבוֹא אַחֲרֵיהֶם׃ 25 כה וּכְמוֹ כֵן גַּם־הַמַּעֲשִׂים הַטּוֹבִים נוֹדָעִים הֵם וְאֵלֶּה אֲשֶׁר לֹא־כֵן לֹא יוּכְלוּ לְהִסָּתֵר׃