1 הקורינתיאנים 5

1 א מִפִּי־כֹל יָצְאָה הַשְּׁמוּעָה כִּי־זְנוּת בְּקִרְבְּכֶם וּזְנוּת אֲשֶׁר אֵין גַּם־בְּקֶרֶב הַגּוֹיִם כִּי־יְגַלֶּה אִישׁ אֶת־עֶרְוַת אָבִיו׃ 2 ב וְאַתֶּם תַּרְחִיבוּ פֶה וְלֹא תִתְאַבְּלוּ עַד־אֲשֶׁר הִכָּרֵת יִכָּרֵת הָאִישׁ הָעֹשֶׂה זֹאת מֵעֲדַתְכֶם׃ 3 ג וְאָנֹכִי אַף כִּי מֵרָחוֹק אָנִי הִנְנִי עֹמֵד אֶצְלְכֶם בְּרוּחִי וּכְדַיָּן בֵּינֵיכֶם כְּבָר חָרַצְתִּי מִשְׁפַּט הָעֹשֶׂה זֹאת׃ 4 ד כִּי תִתְאַסְּפוּ בְּשֵׁם אֲדֹנֵינוּ יֵשׁוּעַ הַמָּשִׁיחַ וְגַם־רוּחִי בְתוֹכְכֶם עִם־גְּבוּרָה מֵאֵת אֲדֹנֵינוּ יֵשׁוּעַ הַמָּשִׁיחַ׃ 5 ה וְאָז תִּתְּנוּ אֶת־הָאִישׁ הַזֶּה לִידֵי הַשָּׂטָן לְכַלוֹת אֶת־הַבָּשָׂר וּלְהָבִיא תְשׁוּעָה לָרוּחַ בְּיוֹם יֵשׁוּעַ אֲדֹנֵינוּ׃ 6 ו לֹא־טוֹב הַדָּבָר אֲשֶׁר תִּתְהַלְּלוּ בְמוֹ־פִיכֶם הֲלֹא יְדַעְתֶּם כִּי שְׂאֹר מְעַט יַחֲמִיץ אֶת־כָּל־הָעֲרִיסָה׃ 7 ז בַּעֲרוּ אֶת־הַשְּׂאֹר הַיָּשָׁן מִקִּרְבְּכֶם לְמַעַן תִּהְיוּ לַעֲרִיסָה חֲדָשָׁה לְחַלַּת מַצָּה כִּי גַם־מָשִׁיחַ זֶבַח פִּסְחֵנוּ הָקְרַב בַּעֲדֵנוּ׃ 8 ח וּבְכֵן נָחֹג אֶת־הֶחָג לֹא־בִשְׂאֹר יָשָׁן וְלֹא־בִשְׂאֹר רֹעַ וְרֶשַׁע כִּי אִם־בְּמַצּוֹת תֹּם וֶאֱמֶת׃ 9 ט כָּתַבְתִּי אֲלֵיכֶם בְּמִכְתָּבִי לְבַל תִּתְעָרְבוּ עִם־אַנְשֵׁי זְנוּנִים׃ 10 י לֹא אָמַרְתִּי כָזֹאת עַל־אַנְשֵׁי זְנוּנִים בָּעוֹלָם אוֹ עַל־בֹּצְעֵי בֶצַע וְאַנְשֵׁי חָמָס וְעֹבְדֵי אֱלִילִים כִּי אִם־כֵּן הַמִּצְוָה עֲלֵיכֶם לָצֵאת מִן־הָעוֹלָם׃ 11 יא אֲבָל כָּתַבְתִּי כָזֹאת לְבַל תִּתְעָרְבוּ עִם־אִישׁ אֲשֶׁר בְּשֵׁם אָח יִקָּרֵא וְהוּא אִישׁ זְנוּנִים אוֹ־בֹצֵעַ בֶּצַע אוֹ־עֹבֵד אֱלִילִים אוֹ מְגַדֵּף אוֹ סֹבֵא יַיִן אוֹ אִישׁ חָמָס הוּא הָאִישׁ אֲשֶׁר עִמּוֹ לֹא תֹאכֵלוּ׃ 12 יב כִּי מַה־לִּי לִשְׁפֹּט אֶת־אֵלֶּה אֲשֶׁר מִחוּץ לַעֲדָתֵנוּ רַק אֵלֶּה אֲשֶׁר בְּקִרְבֵּנוּ הֵם אֹתָם אַתֶּם שֹׁפְטִים׃ 13 יג אֲבָל אֵלֶּה אֲשֶׁר מִחוּץ אֱלֹהִים יִשְׁפֹּט אֹתָם וְאַתֶּם בַּעֲרוּ אֶת־הָרָע מִקִּרְבְּכֶם׃