1 הקורינתיאנים 15

1 א וַאֲנִי הִנְנִי מוֹדִיעַ לָכֶם אַחַי עוֹד הַפַּעַם אֶת־הַבְּשׁרָה אֲשֶׁר קָרָאתִי בְאָזְנֵיכֶם הֲלֹא הִיא אֲשֶׁר קִבַּלְתֶּם וּבָהּ אַתֶּם דְּבֵקִים׃ 2 ב וְגַם־בָּהּ תִּוָּשְׁעוּן אִם־תַּחֲזִיקוּ בַדָּבָר כַּאֲשֶׁר הִגַּדְתִּי לָכֶם כִּי־לוּלֵא כֵן הֶאֱמַנְתֶּם לָרִיק׃ 3 ג בְּרֵאשִׁית כָּל־דָּבָר מָסַרְתִּי לָכֶם כַּאֲשֶׁר גַּם־אָנֹכִי קִבַּלְתִּי כִּי־מֵת הַמָּשִׁיחַ בַּעֲוֹנֵינוּ כְּפִי כִתְבֵי הַקֹּדֶשׁ׃ 4 ד וְכִי נִקְבַּר וַיָּקָם בַּיּוֹם הַשְּׁלִישִׁי כְּפִי כִתְבֵי הַקֹּדֶשׁ׃ 5 ה וְכִי נִרְאָה אֶל־כֵּיפָא וְאַחֲרֵי־כֵן אֶל־שְׁנֵים הֶעָשָׂר׃ 6 ו וְאַחֲרֵי־כֵן נִרְאָה אֶל־יֹתֵר מֵחֲמֵשׁ מֵאוֹת אַחִים כְּאֶחָד אֲשֶׁר רֻבָּם עוֹדָם חַיִּים עַד־הַיּוֹם הַזֶּה וּמִקְצָתָם נָמוּ שְׁנָתָם׃ 7 ז וְאַחֲרֵי־כֵן נִרְאָה אֶל־יַעֲקֹב וְאַחֲרֵי־כֵן אֶל־הַשְּׁלִיחִים כֻּלָּם׃ 8 ח וְאַחַר נִרְאֶה גַם־אֵלָי אֲשֶׁר־כְּנֵפֶל אָנֹכִי׃ 9 ט כִּי צָעִיר אֲנִי בֵּין הַשְּׁלִיחִים עַד אֲשֶׁר־קָטֹנְתִּי מֵהִקָּרֵא שָׁלִיחַ כִּי רָדַפְתִּי אֶת־עֲדַת אֱלֹהִים׃ 10 י אֲבָל בְּחֶסֶד אֱלֹהִים הִנְנִי כַּאֲשֶׁר אָנִי וְחָסְדּוֹ עָלַי לֹא־הָיָה לָרִיק כִּי־יֹתֵר מִכֻּלָּם עָמַלְתִּי וְלֹא אֲנִי כִּי אִם־חֶסֶד אֱלֹהִים אֲשֶׁר עִמָּדִי׃ 11 יא וְעַתָּה אִם אֲנִי אוֹ הֵם כָּזֹאת אָנוּ קֹרִאים וְכָזֹאת אַתֶּם הֶאֱמַנְתֶּם׃ 12 יב וְאַחֲרֵי אֲשֶׁר נִקְרָא כִּי־הַמָּשִׁיחַ קָם מִן־הַמֵּתִים אֵיךְ יֹאמְרוּ אֲנָשִׁים מִכֶּם כִּי־תְקוּמָה לַמֵּתִים אָיִן׃ 13 יג וְאִם־אֵין תְּקוּמָה לַמֵּתִים גַּם־הַמָּשִׁיחַ לֹא קָם׃ 14 יד וְאִם לֹא קָם הַמָּשִׁיחַ אָז הֶבֶל קְרִיאָתֵנוּ וְהֶבֶל גַּם־אֱמוּנַתְכֶם׃ 15 טו וְאַף נִמָּצֵא עֵדֵי שֶׁקֶר לֵאלֹהִים אַחֲרֵי אֲשֶׁר עֵדִים הָיִינוּ לֵאלֹהִים כִּי הֵקִים אֶת־הַמָּשִׁיחַ וְלֹא הֲקִימוֹ אִם־אֱמֶת הַדָּבָר כִּי־הַמֵּתִים לֹא יָקוּמוּ׃ 16 טז כִּי אִם־לֹא יָקוּמוּ הַמֵּתִים גַּם־הַמָּשִׁיחַ לֹא קָם׃ 17 יז וְאִם לֹא קָם הַמָּשִׁיחַ אֱמוּנַתְכֶם הֶבֶל וַחֲטָאֵיכֶם עוֹדָם עֲלֵיכֶם׃ 18 יח וְאַף הַיְשֵׁנִים בַּמָּשִׁיחַ אָבַד נִצְחָם׃ 19 יט אִם־רַק בַּחַיִּים הָאֵלֶּה שַׂמְנוּ מַחְסֵנוּ בַּמָּשִׁיחַ אָז עֲנִיִּים מְרוּדִים אֲנַחְנוּ מִכָּל־אָדָם׃ 20 כ וְעַתָּה הַמָּשִׁיחַ הִנּוֹ קָם מִן־הַמֵּתִים רֵאשִׁית הַבִּכּוּרִים מִן־יְשֵׁנֵי הַמָּוֶת׃ 21 כא כִּי־כַאֲשֶׁר הַמָּוֶת בָּא עַל־יְדֵי אָדָם כֵּן עַל־יְדֵי אָדָם תְּקוּמַת הַמֵּתִים׃ 22 כב וְכַאֲשֶׁר כֻּלָּם מֵתוּ בָאָדָם כֵּן כֻּלָּם יִחְיוּ בַּמָּשִׁיחַ׃ 23 כג וְאִישׁ אִישׁ בְּסֵדֶר נָכוֹן־לוֹ הַמָּשִׁיחַ הוּא רֵאשִׁית הַבִּכּוּרִים וְאַחֲרֵי־כֵן הַמַּאֲמִינִים בַּמָּשִׁיחַ יָקוּמוּ לְעֵת בּוֹאוֹ׃ 24 כד אַחֲרֵי־כֵן הַקֵּץ בַּהֲשִׁיבוֹ אֶת־הַמַּלְכוּת אֶל־הָאֱלֹהִים הָאָב בַּיּוֹם אֲשֶׁר יַכְחִיד כָּל־מִשְׂרָה וְכָל־שִׁלְטוֹן וּגְבוּרָה׃ 25 כה כִּי־הוּא מָלֹךְ יִמְלֹךְ עַד כִּי־יָשִׁית כָּל־אֹיְבָיו תַּחַת רַגְלָיו׃ 26 כו וְהָאֹיֵב הָאַחֲרוֹן אֲשֶׁר יִכָּחֵד הוּא הַמָּוֶת׃ 27 כז כִּי־כֹל שָׁת תַּחַת רַגְלָיו וְכַאֲשֶׁר נֶאֱמַר כֹּל שַׁתָּה תַּחַת רַגְלָיו מוּדַעַת זֹאת כִּי־הַכֹּל הוּשַׁת תַּחְתָּיו מִלְּבַד הַשָּׁת כֹּל׃ 28 כח וְכַאֲשֶׁר יִכְבּשׁ אֶת־כֹּל אָז גַּם־הַבֵּן יוּשַׁת תַּחַת הַשָּׁת־כֹּל תַּחַת רַגְלָיו לְמַעַן יִהְיֶה הָאֱלֹהִים הַכֹּל בַּכֹּל׃ 29 כט אִם לֹא־כֵן אִם אֵין תְּקוּמָה לַמֵּתִים מַה־יּוֹעִילוּ הַנִּטְבָּלִים בְּעַד הַמֵּתִים לָמָּה־זֶּה יִטָּבְלוּ בַעֲדָם וְהֵם לֹא יָקוּמוּ לְעוֹלָם׃ 30 ל וְלָמָּה־זֶּה מַשְׁלִיכִים אֲנַחְנוּ אֶת־נַפְשֵׁנוּ מִנֶּגֶד בְּכָל־רֶגַע וָרָגַע׃ 31 לא בַּעֲלִיצֻתִי אֲשֶׁר אֶעֶלְצָה בָכֶם אַחַי לִפְנֵי יֵשׁוּעַ הַמָּשִׁיחַ אֲדֹנֵינוּ הִנְנִי נִשְׁבַּעְתִּי כִּי־אָנֹכִי הוֹלֵךְ לָמוּת יוֹם יוֹם׃ 32 לב וְגַם־בְּאֶפְסוֹס הֲכִי כְדַרְכֵי אֱנוֹשׁ נִלְחַמְתִּי עִם־חַיְתוֹ יָעַר מַה־יִּתֵּן וּמַה־יּוֹסִיף לִי זֶה אִם־הַמֵּתִים לֹא יָקוּמוּ נֹאכַל וְנִשְׁתֶּה כִּי־מָחָר נָמוּת׃ 33 לג אַל־תִּשְׁעוּ בְּדִבְרֵי שָׁקֶר חֶבְרַת אֲנָשִׁים רָעִים תְּסַלֵּף אָרְחוֹת יְשָׁרִים׃ 34 לד הִתְעוֹרְרוּ בְצֶדֶק וְאַל־תֶּחֱטָאוּ כִּי־יֵשׁ אֲנָשִׁים אֲשֶׁר אֵין־בָּהֶם דַּעַת אֱלֹהִים לְבָשְׁתְּכֶם אֲנִי אֹמֵר כָּזֹאת׃ 35 לה וְכִי־יֹאמַר אִישׁ אֵיךְ יָקוּמוּ הַמֵּתִים מַה גְּוִיָּתָם בְּבוֹאָם׃ 36 לו סָכָל הֵן הַזֶּרַע אֲשֶׁר תִּזְרַע לֹא יִחְיֶה בִּלְתִּי אִם־יָמוּת רִאשֹׁנָה׃ 37 לז וְאֵת אֲשֶׁר תִּזְרַע לֹא תִזְרַע הָעֶצֶם הַהוּא אֲשֶׁר אַחֲרֵי־כֵן יִצְמָח כִּי אִם־גַּרְגַּר עָרֹם חִטָּה אוֹ זֶרַע אַחֵר׃ 38 לח רַק אֱלֹהִים יִתֶּן־לוֹ גְוִיָּה כְּפִי רְצוֹנוֹ לְכָל־זֶרַע וָזֶרַע גְּוִיָּה לְמִינֵהוּ׃ 39 לט וְלֹא כָל־בָּשָׂר וּבָשָׂר אֶחָד הוּא כִּי בְשַׂר אָדָם לְמִינוֹ וְכֵן בְּשַׂר בְּהֵמָה בְּשַׂר עוֹף וּבְשַׂר דָּגִים כָּל־אֶחָד לְמִינֵהוּ׃ 40 מ וְיֵשׁ גְּוִיּוֹת בַּשָּׁמַיִם וְיֵשׁ גְּוִיּוֹת בָּאָרֶץ אַךְ כְּבוֹד הַגְּוִיּוֹת אֲשֶׁר בַּשָּׁמַיִם שֹׁנֶה הוּא מִכְּבוֹד הַגְּוִיּוֹת אֲשֶׁר בַּאָרֶץ׃ 41 מא יֵשׁ כָּבוֹד אֶחָד לַשֶּׁמֶשׁ וְכָבוֹד אַחֵר לַיָּרֵחַ וְכָבוֹד אַחֵר לַכּוֹכָבִים כִּי־כוֹכָב מִכּוֹכָב שֹׁנֶה בִּכְבוֹדוֹ׃ 42 מב וּכְמוֹ־כֵן בִּתְקוּמַת הַמֵּתִים נִזְרַע בְּשַׁחַת־בְּלִי וְקָם לְחַיֵּי־עַד׃ 43 מג נִזְרַע בְּלֹא־כָבוֹד וְקָם בְּכָבוֹד נִזְרַע בְּלֹא־כֹחַ וְקָם בַּכֹּחַ׃ 44 מד נִזְרַע גֵּו נֶפֶשׁ חַיָּה וְקָם גֵּו אֲשֶׁר רוּחַ הוּא יֶשׁ־גֵּו נֶפֶשׁ חַיָּה וְיֶשׁ־גֵּו אֲשֶׁר רוּחַ הוּא׃ 45 מה וְכֵן כָּתוּב וַיְהִי הָאָדָם הוּא הָאָדָם הָרִאשׁוֹן לְנֶפֶשׁ חַיָּה וְהָאָדָם הָאַחֲרוֹן לְרוּחַ מְחַיֶּה׃ 46 מו וְלֹא זֶה הָרִאשׁוֹן אֲשֶׁר רוּחַ הוּא כִּי אִם־זֶה אֲשֶׁר נִשְׁמָתוֹ בְאַפָּיו וְאַחֲרָיו זֶה אֲשֶׁר רוּחַ הוּא׃ 47 מז הָאָדָם הָרִאשׁוֹן הוּא עָפָר מִן־הָאֲדָמָה וְהָאָדָם הַשֵּׁנִי הוּא הָאָדוֹן מִן־הַשָּׁמָיִם׃ 48 מח כְּמוֹ הָרִאשׁוֹן עָפָר כֵּן גַּם־בָּנָיו עָפָר הֵם וּכְמוֹ הַשֵּׁנִי מִן־הַשָּׁמַיִם כֵּן גַּם־אֵלֶּה אֲשֶׁר־לוֹ מִן־הַשָּׁמַיִם הֵם׃ 49 מט וְכַאֲשֶׁר לָבַשְׁנוּ דְמוּת הָאָדָם אֲשֶׁר יְסוֹדוֹ מֵעָפָר כֵּן נִלְבְּשָׁה דְמוּת הָאָדָם אֲשֶׁר מוֹצָאֹתָיו מִשָּׁמָיִם׃ 50 נ וְכָזֹאת אֲנִי אֹמֵר אַחַי כִּי־אֵין בְּכֹחַ בָּשָׂר וָדָם לָרֶשֶׁת מַלְכוּת הָאֱלֹהִים וּבֶן־כִּלָּיוֹן לֹא יִנְחַל אִי־כִלָּיוֹן׃ 51 נא רְאוּ הִנְנִי מְגַלֶּה סּוֹד לֹא כֻלָּנוּ נִישַׁן הַמָּוֶת אַךְ עֶצֶם נַפְשׁוֹתֵינוּ יְשֻׁנֶּה לְכֻלָּנוּ׃ 52 נב בְּרֶגַע כְּשִׁית עַיִן בִּמְשֹׁךְ הַיֹּבֵל תְּרוּעָה אַחֲרֹנָה כִּי יִתָּקַע בַּשּׁוֹפָר וְהַמֵּתִים יָקִיצוּ לְחַיֵּי עוֹלָם וְעֶצֶם נַפְשׁוֹתֵינוּ יְשֻׁנֶּה׃ 53 נג כִּי בֶן־כִּלָיוֹן זֶה יַעֲטֶה אִי־כִלָּיוֹן וּבֶן־מָוֶת זֶה יִלְבַּשׁ אַל־מָוֶת׃ 54 נד וְכַאֲשֶׁר בֶּן־כִּלָּיוֹן יַעֲטֶה אִי־כִלָּיוֹן וּבֶן־מָוֶת יִלְבַּשׁ אַל־מָוֶת אָז יָקוּם דְּבַר הַכָּתוּב בֻּלַּע הַמָּוֶת לָנֶצַח׃ 55 נה אַיֶּה נִצְחֲךָ מָוֶת אַיֵּה שֵׁבֶט אוֹנֵךָ שְׁאוֹל׃ 56 נו שֵׁבֶט הַמָּוֶת הוּא הַחֵטְא וְכֹחַ הַחֵטְא הִיא הַתּוֹרָה׃ 57 נז אַךְ בָּרוּךְ הוּא הָאֱלֹהִים אֲשֶׁר נָתַן־לָנוּ תְּשׁוּעָה נִצַּחַת בְּיַד יֵשׁוּעַ הַמָּשִׁיחַ אֲדֹנֵינוּ׃ 58 נח עַל־כֵּן הֱיוּ נְכֹנִים וּמְיֻסָּדִים אַחִים אֲהוּבִים וְלֹא תִתְמוֹטְטוּ וּבַעֲבוֹדַת אֲדֹנֵינוּ הוֹסִיפוּ לַעֲבֹד יוֹם יוֹם אַחֲרֵי אֲשֶׁר יְדַעְתֶּם כִּי־לֹא לָרִיק פְּעֻלַּתְכֶם בַּאֲדֹנֵינוּ׃