1 הקורינתיאנים 1

1 א פּוֹלוֹס הַשָּׁלִיחַ אֲשֶׁר בָּחַר־בּוֹ יֵשׁוּעַ הַמָּשִׁיחַ בִּרְצוֹן אֱלֹהִים אֲנִי וְסוֹסְתְּנִיס אָחִינוּ׃ 2 ב אֶל־עֲדַת אֱלֹהִים בְּקֹרִנְתּוֹס הַבְּחִירִים וְהַקְּדשִׁים אֲשֶׁר בְּיֵשׁוּעַ הַמָּשִׁיחַ הִתְקַדָּשׁוּ עִם כָּל־הַקֹּרְאִים בְּכָל־מָקוֹם בְּשֵׁם יֵשׁוּעַ הַמָּשִׁיחַ הוּא אֲדֹנֵיהֶם וַאֲדֹנֵינוּ׃ 3 ג חֶסֶד וְשָׁלוֹם יִתֵּן לָכֶם אֱלֹהִים אָבִינוּ וַאֲדֹנֵינוּ יֵשׁוּעַ הַמָּשִׁיחַ׃ 4 ד אֲבָרֵךְ אֶת־אֱלֹהַי תָּמִיד עַל־חַסְדּוֹ אֲשֶׁר גָּמַל עֲלֵיכֶם בְּיֵשׁוּעַ הַמָּשִׁיחַ׃ 5 ה כִּי בוֹ מְצָאתֶם אוֹן לָכֶם בַּכֹּל בְּכָל־מַדָּע וְהַשְׂכֵּל׃ 6 ו כַּאֲשֶׁר עֵדוּת הַמָּשִׁיחַ נֶאֶמְנָה בָכֶם׃ 7 ז עַד אֲשֶׁר־לֹא חֲסַרְתֶּם מְאוּמָה מִכָּל־מַתַּת־יָהּ וְעֵינֵיכֶם צֹפִיּוֹת לְהִגָּלוֹת נִגְלוֹת פְּנֵי אֲדֹנֵינוּ יֵשׁוּעַ הַמָּשִׁיחַ׃ 8 ח אֲשֶׁר גַּם־הוּא יְכוֹנֵן אֶתְכֶם עַד־הַקֵּץ לְבִלְתִּי יִמָּצֵא בָכֶם שֶׁמֶץ דָּבָר בְּיוֹם אֲדֹנֵינוּ יֵשׁוּעַ הַמָּשִׁיחַ׃ 9 ט כִּי נֶאֱמָן הוּא הָאֱלֹהִים אֲשֶׁר נִקְרֵאתֶם בּוֹ לְדָבְקָה בִּבְנוֹ יֵשׁוּעַ הַמָּשִׁיחַ אֲדֹנֵינוּ׃ 10 י וַאֲנִי דֹרֵשׁ מִכֶּם אַחַי בְּשֵׁם אֲדֹנֵינוּ יֵשׁוּעַ הַמָּשִׁיחַ לְדַבֵּר כֻּלְּכֶם פֶּה אֶחָד וְאַל־תִּתְגֹּדְדוּ לִפְלַגּוֹת כִּי אִם־הִתְחַבְּרוּ יַחְדָּו בְּלֵב אֶחָד וּבְעֵצָה אֶחָת׃ 11 יא כִּי הֻגַּד־לִי אַחַי מִפִּי בְנֵי־בֵית כְּלוֹאָה כִּי־דִבְרֵי רִיבוֹת בְּשַׁעֲרֵיכֶם׃ 12 יב וְהִנֵּה זֶה דְבָרִי אִישׁ אִישׁ מִכֶּם אֹמֵר אֲנִי לְפוֹלוֹס אוֹ אֲנִי לְאַפּוֹלוֹס אוֹ אֲנִי לְכֵיפָא אוֹ אֲנִי לַמָּשִׁיחַ׃ 13 יג הֲכִי נֶחֱלַק הַמָּשִׁיחַ הֲנִצְלַב פּוֹלוֹס בַּעַדְכֶם אוֹ הֲנִטְבַּלְתֶּם בְּשֵׁם פּוֹלוֹס׃ 14 יד שׂוֹשׂ אָשִׂישׂ בֵּאלֹהִים כִּי לֹא־טָבַלְתִּי אִישׁ מִכֶּם זוּלָתִי קְרִסְפּוֹס וְגָיוֹס׃ 15 טו פֶּן־יֹאמְרוּ כִּי־נִטְבַּלְתֶּם בִּשְׁמִי׃ 16 טז אַךְ טָבַלְתִּי גַם אֶת־בְּנֵי־בֵית סְטְפָנוֹס וּמִלְּבַד אֵלֶּה אֵינֶנִּי יֹדֵעַ עוֹד אִם־טָבַלְתִּי אִישׁ אַחֵר׃ 17 יז כִּי לֹא שְׁלָחַנִי הַמָּשִׁיחַ לְטַבֵּל כִּי אִם־לְבַשֵּׂר וְלֹא־בְחָכְמַת שְׂפָתַיִם פֶּן־יִהְיֶה צְלַב הַמָּשִׁיחַ לְתֹהוּ׃ 18 יח כִּי־פִתְגָּם הַצְּלַב כִּפְתַיּוּת הוּא לָאֹבְדִים וְלָנוּ הַנּוֹשָׁעִים הוּא גְּבוּרַת אֱלֹהִים׃ 19 יט כִּי־כָתוּב אֲאַבֵּד חָכְמַת חֲכָמִים וּבִינַת נְבוֹנִים אַסְתִּיר׃ 20 כ אַיֵּה חָכָם אַיֵּה סֹפֵר אַיֵּה שֹׁקֵל חִקְרֵי הָעוֹלָם הֲלֹא סִכֵּל אֱלֹהִים אֶת־חָכְמַת הָעוֹלָם הַזֶּה׃ 21 כא כִּי אַחֲרֵי אֲשֶׁר הָעוֹלָם בְּחָכְמָתוֹ לֹא יָדַע אֶת־הָאֱלֹהִים בָּאָה חָכְמַת אֱלֹהִים וּרְצוֹנוֹ בְּסִכְלוּת הַבְּשׂרָה לְהוֹשִׁיעַ אֶת־הַמַּאֲמִינִים׃ 22 כב כִּי הַיְּהוּדִים שֹׁאֲלִים אוֹת וְהַיְּוָנִים מְבַקְשִׁים חָכְמָה׃ 23 כג וַאֲנַחְנוּ מְבַשְּׂרִים בְּאָזְנֵיהֶם הַמָּשִׁיחַ הַנִּצְלָב לַיְּהוּדִים לְמִכְשׁוֹל וְלַיְּוָנִים לְסִכְלוּת׃ 24 כד אַךְ לִבְחִירִים גַּם־לִיהוּדִים גַּם־לִיְוָנִים מָשִׁיחַ גְּבוּרַת אֱלֹהִים וְחָכְמַת אֱלֹהִים׃ 25 כה כִּי סִכְלוּת אֱלֹהִים טוֹבָה מֵחָכְמַת אָדָם וְרִפְיוֹן יְדֵי אֱלֹהִים אֵיתָן מִכֹּחַ גָּבֶר׃ 26 כו הֲלֹא תִרְאוּ מִי אַתֶּם אַחַי קְרוּאֵי־יָהּ לֹא רַבִּים חֲכָמִים לְעֵינֵי בָשָׂר לֹא רַבִּים גִּבֹּרֵי חַיִל וְלֹא רַבִּים נְדִיבֵי אָרֶץ׃ 27 כז כִּי הַפְּתָאיִם בְּעֵינֵי הָעוֹלָם בָּחַר בָּם אֱלֹהִים לְהַכְלִים אֶת־הַחֲכָמִים וּרְפֵי הַיָּדַיִם בְּעֵינֵי הָעוֹלָם בָּם בָּחַר לְהַכְלִים אֶת־הָאֵיתָנִים׃ 28 כח וְדַלַּת עַם הָאָרֶץ וְהַנִּבְזִים אֲשֶׁר כְּאֶפֶס נֶחְשָׁבוּ בָּחַר בָּם אֱלֹהִים לַעֲשׂוֹת לְאֶפֶס אֶת־הָאֹמֵר אֲנִי וְאַפְסִי עוֹד׃ 29 כט לְמַעַן לֹא־יִתְהַלֵּל כָּל־בָּשָׂר לִפְנֵי הָאֱלֹהִים׃ 30 ל אַךְ אַתֶּם מֵאִתּוֹ הִנְּכֶם בְּיֵשׁוּעַ הַמָּשִׁיחַ אֲשֶׁר הָיָה לָנוּ לְחָכְמָה מִיַּד הָאֱלֹהִים לְצַדְּקֵנוּ לְקַדְּשֵׁנוּ וְלִפְדּוֹת אֶת־נַפְשֵׁנוּ׃ 31 לא וְכֵן יָקוּם הַדָּבָר כַּכָּתוּב הַמִּתְהַלֵּל יִתְהַלֵּל בַּיהוָֹה׃