Nɨawari 99

1 Yawé ti’aitame kanihɨkɨtɨni: nuiwarite meke’utiyɨyɨakani. Mɨkɨ yuteɨtamete watsata yu’uweni kaniukeka: kwie ke’utayuaneni. 2 Yawé kanimariweni Tsiyuni hetsie, meta kanimariweni yunaime teɨteri waheima. 3 ‘Aixɨa keraniuwani hetsiena mieme mɨmariwekɨ makaxiwatɨ: mɨkɨ kanipatsieka. 4 Ti’aitame pemɨtɨrɨkaɨye, ‘aixɨa mɨti’ane pemɨtinaki’erie: ’ekɨ mɨtiheitserie pepɨtiukaye meta Kakuwu hetsie ‘aixɨa pepɨtiyuriene heitseriemekɨ. 5 Yawé hetsiemieme witsixekenaitɨkani mɨtakakaɨyari: hetɨana xekenetihɨxima’uweni: mɨkɨ kanipatsieka. 6 Muitsexi ‘Aruni hamatɨa, mawari wewiwamete wahamatɨa mepaye’ukai, meta Tsamuheri, kemɨ’ane memehɨawekai wahamatɨa. Yawé meputahɨawixɨ, mɨkɨta pɨwaruta’ei, 7 haiwitɨritsie ‘amuwekaitsie paitɨ kaniwarutahɨawe. Mekaneye’atɨani ‘aitsikateya, ‘inɨari niukiyari mɨwayetuiritsie. 8 Yawé meta takakaɨyari, ’ekɨ pepɨwaruta’ei, ’ekɨ wahetsiemieme Kakaɨyari petiwareuyehɨwirietɨ pepatɨa, meta kepauka pemɨwaru’uximatɨa ‘axamete’uyurieku. 9 Yawé hetsiemieme witsixekenaitɨkani mɨtakakaɨyari: xekenayexeiyani tukitana: Kanipatsieka Yawé takakaɨyari.