Nɨawari 6

1 Yawé, pepɨkanetsi’utate’ani peha’atɨ, pepɨkanetikwinitɨaka ‘ahaxɨakɨ. 2 Yawé kenenenenimayaka nepɨmɨximeri, Yawé ‘aixɨa kenetineuka’eritɨa netaɨta nepeuhaɨtɨ. 3 Ne’iyari waɨkawa pɨyumuina, ¿kepaukake tamɨ Yawé pepɨnetsiparewieni? 4 Yawé, kenenua tukari keneneupitɨa, keneneutawikweitsitɨa ‘anaki’eriyakɨ. 5 Mɨkitɨ pɨkayɨwe mɨmatsihaye’erienikɨ, ‘ukateukieme, ¿kemɨ’ane pɨmatsitanɨawa? 6 Tsuarikɨ nepu’uxeri tɨkarikɨ, ne’itari ne’ukaikɨ pɨyuyuna, ne’utá ne’ukaikɨ nepɨhawiya. 7 Nehɨxite pɨkaheuniereri netiukakukuinetɨ, pukwixime memɨnetsi’aye’unie ya’ane mewiwiekaku. 8 Nehamatɨa xepɨka’u’uwani yunaitɨ ‘axaxemɨte’u’iyari, Yawé nehiwerika kaniu’enieni. 9 Yawé pu’enaxɨ kenemɨtitawawiri, Nenenewieri Yawé pu’eni. 10 Yunaitɨ memɨnetsi’aye’unie mekaniyutitetewiyakuni meta mekani’iyɨriekuni, kwitɨwa mepuyuta’una meyutetewiyatɨ.