Nɨawari 24

1 Yawé kwie naitɨ pɨtipiinieya meta hetsiena naitɨ mɨtixuawe, kwie naitɨ kemɨnena, meta keyupaɨmetɨ mana memɨte’u’uwa, 2 mɨkɨ haramara heima kwie ‘unetɨaka, haa panuyetuaxɨa. 3 ¿Kemɨ’ane Yawé hɨrieyaritsie panutiyeiwe? ¿Kemɨ’ane tukieya muyepatsieta pautahawe? 4 Kemɨ’ane ‘aixɨa mɨtiyuriene meta yu’iyaritsie mɨ’itiya, kemɨ’ane kakaɨyarixi tixaɨtɨ memɨkateyunaki’erie mɨkawarayexeiya meta mɨkatiyɨhɨritɨa ti’itawatɨ. 5 Kemɨ’ane mɨpaɨ mɨ’ane Yawé ‘aixɨa kaniyurieka, Kakaɨyari ‘iwikweitsitɨwame hetsiena mieme heitseriemekɨ yakatiniyuriemɨkɨ. 6 Mɨpaɨ kani’aneni nuiwari kemɨ’ane mɨmetsi’ayexeiya, kemɨ’ane memɨmetsikuwaɨtɨwe, Kakuwu Kakaɨyarieya. 7 Kitenie xekeneyuyepiexɨa, ‘itupari meripaitɨ xemumiemete xekeneyuyepiexɨa, Ti’aitame witsimɨ’ane kaneutahamɨkɨ. 8 ¿Kemɨ’ane mɨkɨ Ti’aitame witsimɨ’ane pɨhɨkɨ? Yawé, mɨtɨrɨkaɨye meta mɨrayu’iwa, Yawé, kwinimieme mɨreuyutamiewe. 9 Kitenie xeketeneuyepiexɨa, ‘itupari meripaitɨ xemumiemete xekeneyuyepiexɨa, Ti’aitame witsimɨ’ane kaneutahamɨkɨ. 10 ¿Kemɨ’ane mɨkɨ Ti’aitame witsimɨ’ane pɨhɨkɨ? Yawé Naimekɨmɨtɨrɨkaɨye kanihɨkɨtɨni, mɨkɨ Ti’aitame witsimɨ’ane kanihɨkɨtɨni.