Nɨawari 146

1 Yawé kenɨawarieka. Ne’iyari, Yawé kenenɨawani. 2 Ne Yawé nepɨnɨawani kenemɨreutere, mexixi ne’ayeniere, nɨawari Kakaɨyari hetsiemieme neputikwikani. 3 Teɨteri memɨtɨrɨkawi wahetsie xepɨkatewiyani, mɨkɨta mepɨkwiwawe xeikɨa, mepɨkayuwawe memɨxetawikweitsitɨanikɨ. 4 Kepauka mɨmɨni tumuanari kanayeimɨkɨ xeikɨa, ‘ana kemɨtiku’eriwakai naitɨ katineuyewemɨkɨ. 5 ‘Aixɨa kani’itɨarieka kemɨ’ane Kakuwu kakaɨyarieya miparewie, meta kemɨ’ane Yawé mɨtakwewie yukakaɨyari, 6 muyuawi meta kwie mɨtiutiwewi, haramara meta yunaitɨ titamexi mana memɨteye’uwa, mɨkɨ matsi yurikɨ xeikɨa katinikuxatani. 7 Yawé memɨnanaimarie wahetsie ‘aixɨa katiniyurieka, memɨyehakakwitɨwe katiniwamikwani meta memanutaxɨriwa kaniwaranayexɨnani. 8 Yawé memɨkahauneniere kaniwaranutanieritɨwani, Yawé mematixɨri kaniwaranuku’uitɨwani, Yawé kaniwanaki’erieka ‘aixɨa memɨte’u’uwa. 9 Yawé ku’uwamete kaniwa’ɨwiyani, nutuite meta wiuraxi kaniwaparewieka, peru ‘axateyuruwamete kememɨteku’eriwa kananutunani. 10 Kerutsareme ‘aku, Yawé keti’aitani yuheyemekɨ. ‘Akakaɨyari keti’aitani yuheyemekɨ. Yawé kenɨawarieka.