Nɨawari 137

1 Wawiruniya hatetsitayaritsie tepetiyaxikekai, ‘ana Kerutsareme teha’eriwatɨ tepetitsuanakai. 2 Mɨkɨ Kiekaritsie hapuri kɨyeyari meti’utsie mana takanarite tepeɨkɨwɨwɨtɨwakai. 3 Mana kiekatari memɨtatsi’upɨretsutaxɨ, mepɨtatsihe’aitɨakai kwikari temetikwikakɨ, tate’uximayatsitɨwamete xekeneyutemamawieka mepɨtatehekɨhɨawekai, mɨpaɨ mepɨtatehetihɨawekai: «Xekeneutakwika tahetsiemieme xeime kwikari Kerutsareme mieme». 4 Tame tepɨkayɨwawe kwikari Yawé hetsiemieme temutikwikani xeime kwieyaritsie paitɨ. 5 Kerutsareme, Kerutsareme, xɨka ne ‘uxa’atɨni nemetsihatɨmaiyake, nemamá netserie mieme ke’utawani. 6 Xɨka nekametsiha’eriwatɨ nehayani, netemawierikakɨ xɨka nemetsihatɨmaiya, neneni ke’anatixitekieni. 7 Yawé, ’erumitsixi keniwara’eriwani, kepauka Kerutsareme muka’unixɨ. Mɨpaɨ mepɨte’uhiwakai: «Naime, naime xekeneuka’una tsutɨmeyari ‘ɨarime». 8 ‘Ekɨta Wawiruniya niweya, ‘uxa’atɨni pekanika’unariemɨkɨ, ‘aixɨa ke’itɨarieka kemɨ’aneta ’ekɨ mɨmetsika’una kepemɨtatsi’uyuri tame. 9 ‘Aixɨa ke’itɨarieka kemɨ’ane tɨɨri muwatiwiya meta ‘aitsie muwatitetsewani.