Nɨawari 112

1 Yawé kenɨawarieka. ‘Aixɨa kani’itɨarieka kemɨ’ane Yawé mayemakaxe meta kaniyutemawieka ‘aitsikaya ‘aye’atɨatɨ. 2 Heitseriemekɨ yamemɨtekahu waniwema ’ena kwiepa mekatenita’aitakuni, meta ‘aixɨa mekani’itɨariekakuni. 3 Yukie waɨkawa piinite mepɨtehexeiyani, meta yuheyemekɨ ‘aixɨa mepɨteyurieka. 4 ‘Aixɨa memɨte’u’iyari mekanihekɨariwiyarieka yɨwipa. Kakaɨyari ‘aixɨa pɨtiuka’iyari, pɨtiyukanenimaya meta heitserie pɨtiyuriene. 5 ‘Aixɨa pɨ’itɨarie kemɨ’ane mɨtiyuniniɨtɨwa piinite ‘aixɨa ‘anemekɨ, meta ‘aixɨa ‘anemekɨ yupiinitsie mɨti’uximaya. 6 ‘Aixɨa mɨtiuka’iyari yuheyemekɨ pukuxaxatsiwani, hatsuakutɨma ‘axamɨti’ane pɨkare’iwa. 7 Pɨkatimani kepauka niuki ‘axa’aneme mɨtaxatɨarieni, ‘iyarieya heitserie ‘aixɨa pɨtiyɨkɨhɨaweni Yawé hetsie yuri ti’erietɨ. 8 ‘Iyarieya pɨxewini, pɨkaheumaka, ‘ariketa memeye’unie puwaxeiya me’atixɨriekame. 9 Tixaɨtɨ memɨkatehexeiya pɨtiwamikwa tita mɨrexeiya, ke’aixɨa mɨtiyuriene yuheyemekɨ katiniyurieneni, kemɨtiyurieneni ‘aixɨa ‘anemekɨ pɨmatiwani. 10 ‘Axamɨtiuka’iyari mɨkɨ pɨtixeiya, hikɨ pɨyeha’ani, yutame ‘utaxikauteketɨ ‘atsipɨyɨni. ‘Axateyuruwamete kememɨteku’eriwa mɨkɨ yapɨkatikɨyɨne.